موڭعوليادا تۇرار رىسقۇلوۆ تۋرالى ەكى ەڭبەك جارىق كوردى
موڭعوليا رەسپۋبليكاسىنىڭ مۇراعات باسقارماسىندا «كومينتەرن تۇرار رىسقۇلوۆتىڭ موڭعولياداعى قىزمەتى» جانە «تۇرار رىسقۇلوۆتىڭ موڭعولياداعى قىزمەتىنە قاتىستى قۇجاتتار» اتتى موڭعول تىلىندەگى قوس مونوگرافيانىڭ تانىستىرىلىمى ءوتتى. بۇل تۋرالى تۇركى اكادەمياسى حالىقارالىق ۇيىمىنىڭ (TWESCO) ءباسپاسوز قىزمەتى حابارلادى.
TWESCO-نىڭ عىلىمي جوباسى اياسىندا ازىرلەنىپ باسىلعان بۇل كىتاپتاردىڭ اۆتورلارى – تاريح عىلىمدارىنىڭ دوكتورى, مارقۇم چۋلۋن داشداۆا مەن موڭعوليا مۇراعات باسقارماسىنىڭ باستىعى, تاريح عىلىمدارىنىڭ دوكتورى يشجامتس سارۋل.
حالىقارالىق تۇركى اكادەمياسىنىڭ, موڭعوليا عىلىم اكادەمياسىنىڭ جانە «ەگەمەن قازاقستان» رەسپۋبليكالىق گازەتىنىڭ ۇيىمداستىرۋىمەن ءوتىپ جاتقان «ءتاڭىرتاۋدان وتۇكەنگە دەيىن: ۇلى دالا كوشپەندىلەرىنىڭ تاريحي-مادەني قازىنالارى» اتتى حالىقارالىق ەكسپەديتسيا بارىسىندا وتكەن جيىنعا ازەربايجان, قازاقستان, قىرعىزستان, موڭعوليا, رەسەي جانە تۇركيانىڭ قوعام قايراتكەرلەرى, تۇركىتانۋشى, موڭعولتانۋشى عالىمدار مەن جۋرناليستەر قاتىستى. سونىمەن قاتار, تانىستىرىلىمعا قاتىسقان تۇركيا عىلىم اكادەمياسىنىڭ پرەزيدەنتى ادجار احمەت جەۆات پەن تۇرىك تاريح قۇرىلىمىنىڭ توراعاسى رەفيك تۇران جاڭا باسىلىم تۋرالى پىكىرلەرىمەن ءبولىسىپ, باۋىرلاس تۇركى حالىقتارى ماقتان تۇتاتىن تۇرار رىسقۇلوۆقا دەگەن قۇرمەتى ءۇشىن موڭعوليالىق ارىپتەستەرىنە ريزاشىلىقتارىن ءبىلدىردى.
«كومينتەرن تۇرار رىسقۇلوۆتىڭ موڭعولياداعى قىزمەتىندە» تۇركى حالىقتارىنىڭ كورنەكتى مەملەكەت قايراتكەرى ت.رىسقۇلوۆتىڭ قىزمەتى موڭعوليا ارحيۆىندەگى تىڭ دەرەكتەرمەن شىنايى سومدالعان. سونىمەن قاتار, «تۇرار رىسقۇلوۆتىڭ موڭعولياداعى قىزمەتىنە قاتىستى قۇجاتتار» اتتى ەكىنشى ەڭبەكتە قايراتكەرگە قاتىستى موڭعوليا ارحيۆىندەگى قۇجاتتار جۇيەلەپ جاريالانىپ وتىر.
كىتاپتاردىڭ العىسوزىن جازعان د.قىدىرالى تانىستىرۋ راسىمىندە تۇرار رىسقۇلوۆتىڭ 1924-1925 جىلدارى كومينتەرن وكىلى رەتىندە جاڭادان قۇرىلعان جاس مەملەكەت – موڭعوليانىڭ تاۋەلسىزدىگىنىڭ العاشقى جىلدارى اتقارعان جاۋاپتى قىزمەتتەرى جونىندە توقتالدى. موڭعوليانىڭ كونستيتۋتسياسىنىڭ جازىلۋىنا, مەملەكەتتىك العاشقى قۇرىلتايدىڭ وتكىزىلۋىنە, سونداي-اق, حالىقارالىق سىرتقى قارىم-قاتىناستاردىڭ رەتتەلۋىنە قوسقان ۇلەسىن تىلگە تيەك ەتتى.
ايتا كەتەرلىگى, بۇل مونوگرافيالىق ەڭبەكتەر موڭعوليادا ارقايسىسى مىڭ دانا تارالىممەن جارىق كوردى.