جەڭىس تۋىن جەلبىرەتكەن

سپورتشىلارىمىزدى استانا قۇشاق جايا قارسى الدى استاناعا ريو-دە-جانەيرو قالاسىندا وتكەن جازعى وليمپيالىق ويىنداردان جۇلدە العان سپورتشىلارىمىز كەلدى. ولاردى استانانىڭ حالىقارالىق اۋەجايىندا قالا حالقى ەرەكشە قۇرمەتپەن, ءسان-سالتاناتپەن قارسى الدى. اۋەجايعا جينالعان جۇرتشىلىق ەلىمىزدىڭ كوك بايراعىن جەلبىرەتىپ, «العا, قازاقستان!» دەپ ۇرانداتىپ, سپورتشىلار مەن جاتتىقتىرۋشىلارعا قۇرمەت كورسەتتى. سالتاناتتى شارادا استانا قالاسىنىڭ اكىمى اسەت يسەكەشەۆ وليمپيادادان جۇلدەلى ورالعان قازاقستاننىڭ بوكستان, ەركىن كۇرەس پەن ايەلدەر كۇرەسىنەن ۇلتتىق قۇراما كوماندالارىن قۇتتىقتادى. ول ساحنا تورىنە شىعىپ, ەلىمىزگە ءتورت جىلدا ءبىر كەلەتىن دودادان جەڭىس تۋىن اكەلگەن وليمپيادا جۇلدەگەرلەرى مەن ولاردىڭ جاتتىقتىرۋشىلارىنا قاراتا ءسوز سويلەپ, بۇل جەڭىستەردىڭ ماڭىزدىلىعىن اتاپ ءوتتى. قالا اكىمى ءوز سوزىندە وليمپياداشىلاردىڭ جەڭىسى مىڭداعان جاس جىگىتتەرىمىز بەن قىز­دارىمىزدىڭ سپورتقا دەگەن قىزىعۋشى­لىقتارىن وياتقانىن, ەندى ەلىمىزدە وليمپيادا شىڭىنا شىعۋدى ومىرلىك ماقساتى ەتىپ الدىنا قوياتىن جاسوسپىرىمدەر سانى كوبەيەتىنىن, وسىنىڭ بارلىعى مەملەكەت باسشىسى نۇرسۇلتان نازارباەۆتىڭ حالىق اراسىندا سالا­ماتتى ءومىر سالتىن قالىپتاستىرۋدا, بۇقارا­لىق جانە كاسىبي سپورتتى دامىتۋدا ءجۇر­گىزىپ جاتقان سىندارلى, ساليقالى ساياساتىنىڭ ارقاسىندا مۇمكىن بولىپ وتىرعانىن اتاپ ءوتتى. وسىدان كەيىن قالا باسشىسى ءا.يسەكەشەۆ قالىپتاس­قان ءداستۇر بويىنشا وليمپيادا چەمپيونى مەن جۇلدەگەرلەرى مەملەكەت تاراپىنان ماراپاتتالاتىنىن, ولارعا ءتيىستى سىياقىمەن قوسا استانادان پاتەرلەر بەرى­لەتىنىن ايتتى. ول وسى جەردە سىي-قۇر­مەت­تىڭ باسى رەتىندە بوكسشىلار دانيار ەلەۋسىنوۆ­كە, ۆاسيلي لەۆيت پەن كۇرەس شەبەرى گۇزەل مانيۋروۆاعا جول تالعامايتىن كولىكتەردىڭ كىلتىن تابىس ەتتى. سالتاناتتى شارادا سپورتشىلار وزدەرىنە قولداۋ كورسەتكەن اعايىنعا العىس ءبىلدىردى. وندا دانيار ەلەۋسىنوۆ, گۇزەل مانيۋروۆا مەن ۆاسيلي لەۆيتتىڭ اناسى تاتيانا لەۆيت جۇرتشىلىق الدىنا شىعىپ, ەلىمىز­دە سپورتتى دامىتۋعا بارلىق جاعداي جاساپ جات­قان مەملەكەت باسشىسىنا, استانادا قالا اكىمىنە, وزدەرىن جارىسقا دايىنداعان جەكە جاتتىقتىرۋشىلارىنا, كوماندانىڭ باس جاتتىقتىرۋشىسىنا, باپكەرلەر شتابىنا ريزاشىلىقتارىن جەتكىزدى. سالتاناتتى شارا اياقتالىسىمەن سپورتشىلار جۇزدەرى بال-بۇل جانعان بالالارمەن ەستەلىك سۋرەتكە ءتۇسىپ, جانكۇيەرلەرمەن جارىس تۋرالى سىرلاسىپ, ەلگە دەگەن ساعىنىشتارىن تارقاتتى. داستان كەنجالين, «ەگەمەن قازاقستان» سۋرەتتى تۇسىرگەن ەرلان وماروۆ, «ەگەمەن قازاقستان»