مادەنيەت جانە سپورت ءمينيسترى ارىستانبەك مۇحامەدي ۇلى ءۇندىستاندا شاحماتتان 20 جاسقا دەيىنگى قىزدار اراسىندا وتكەن الەم چەمپيوناتىن جەڭىپ العان حالىقارالىق دارەجەدەگى گروسسمەيستەر دينارا سادۋاقاسوۆانى قۇتتىقتادى.
«بارشا قازاقستاندىقتاردىڭ جانە ءوز اتىمنان الەم چەمپيوناتىنداعى جەتىستىگىڭىزبەن شىن جۇرەكتەن قۇتتىقتايمىن! بۇل جەڭىسىڭىزدى ەلىمىزدە زياتكەرلىك ويىن تۇرلەرىن دامىتۋعا قوسقان زور ۇلەسىڭىز دەپ بىلەمىن.
التىن مەدال – جوعارى شەبەرلىكتىڭ, ەرىك-جىگەردىڭ جانە ناعىز ەڭبەكقورلىقتىڭ جەمىسى. تورتكۇل دۇنيەنىڭ مىقتىلارى باس قوسقان ءدۇبىرلى دودادا توپ جارۋىڭىز وزگە دە جاستارىمىزعا ۇلگى بولىپ, ەلىمىزدەگى شاحماتتىڭ دامۋىنا جاڭا دەم بەرەدى دەپ ۇمىتتەنەمىن.
جاستىعىڭىزعا قاراماستان, قازاقستاننىڭ نامىسىن الەمدىك ارەنالاردا ابىرويمەن قورعاپ جۇرگەن سىزگە زور دەنساۋلىق, ەڭبەگىڭىزگە تابىس, بيىك ماقسات تىلەيمىن!», دەلىنگەن ءمينيستردىڭ قۇتتىقتاۋ حاتىندا.
داستان كەنجالين