برازيليانىڭ ريو-دە-جانەيرو قالاسىندا وتكەن وليمپيالىق ويىنداردىڭ ءىزى سۋىماي جاتىپ, بىرقاتار ەلدەردىڭ سپورتشىلارى ءدۇبىرلى دودادا جەڭىپ العان جۇلدەلەرىنەن ايىرىلىپ جاتىر. حالىقارالىق دوپينگكە قارسى اگەنتتىك سپورتشىلاردىڭ جۇلدەسىن تىيىم سالىنعان مەديتسينالىق پرەپاراتتاردى قولدانعانى ءۇشىن تارتىپ الىپ وتىر.
سولاردىڭ ءبىرى – قىرعىزستاننىڭ اۋىر اتلەتى يززات ارتىقوۆ وليمپيادادا العان قولا مەدالىنەن ايىرىلدى. حالىقارالىق دوپينگكە قارسى اگەنتتىكتىڭ اربيتراجدى سوتى سپورتشىنىڭ قانىنان ستريحنين ءدارىسىنىڭ تابىلعانىن ايتىپ, ونى قولا جۇلدەگەر اتاعىنا لايىقسىز دەپ تانىدى. ستريحنين – ۋلى ءدارى. سولاي بولا تۇرا, ادام ونى قاجەتتى مولشەردە قابىلداسا, ونىڭ دەنە جانە جۇرەك بۇلشىق ەتتەرىنە جاقسى اسەر ەتەدى. بۇل ءدارى سپورتشىلار اراسىندا ءحىح عاسىردىڭ سوڭى مەن حح عاسىردىڭ باسىندا كەڭىنەن تارالعان. سودان كەيىن ول جان-جانۋارلار مەن جاندىكتەرگە قارسى پەستيتسيد رەتىندە قولدانىلعان. ياعني, ۋلاۋ ءۇشىن پايدالانىلعان. كەڭەس وداعى كەزىندە ءدارى ەگەۋقۇيرىقتاردى ءولتىرۋ ءۇشىن ساتىلعان.
ەندى يززات ارتىقوۆ اتالعان اگەنتتىكتىڭ اربيتراجدى سوتىنىڭ شەشىمىمەن بەلگىلى ءبىر مەرزىمگە سپورتتان شەتتەتىلدى. ول وليمپيادادا 69 كيلوعا دەيىنگى سالماقتا كۇش سىناسىپ, قىرعىزستانعا جالقى جۇلدە جەڭىپ العان بولاتىن.
داستان كەنجالين