ەلىمىز تاۋەلسىزدىگىن نىعايتۋعا, كەلەشەگىنە باعىت-باعدار جاساۋعا جانە بۇگىنگى زامانعى ۇستانىمىنا باستاۋ بولاتىن, زاڭدارىنىڭ نەگىزىن قالاعان اتا زاڭىمىزدىڭ قابىلدانعانىنا دا ءبىراز ۋاقىت بولدى.
ء«بىز قازاق مال باققان ەلمىز, ەشكىمگە سوقتىقپاي جاي جاتقان ەلمىز, باسىمىزدان قۇت-بەرەكە قاشپاسىن دەپ, جەرىمىزدىڭ شەتىن جاۋ باسپاسىن دەپ, نايزاعا ۇكى تاققان ەلمىز. ەشبىر دۇشپان باسىنباعان ەلمىز, باسىمىزدان ءسوز اسىرماعان ەلمىز, دوستىقتى ساقتاي بىلگەن ەلمىز, ءدام-تۇزدى اقتاي بىلگەن ەلمىز», دەپ قازىبەك بي بابامىز اتاپ كەتكەندەي, قازاق حالقى سوناۋ قازاق حاندىعىنىڭ ىرگەسى قالانعاننان بەرى سان قيلى وقيعالاردى, اۋمالى-توكپەلى كەزەڭدەردى باستان كەشتى. تاڭىرگە تاۋبە, اتا-بابالارىمىز عاسىرلار بويى ارمان ەتكەن تاۋەلسىزدىگىمىزدى الىپ, ەل بولىپ ەڭسە تۇزەدىك. قازاقستاندىق ەل باسقارۋ ۇلگىسى, ەكونوميكانى كوتەرىپ, داعدارىستان الىپ شىعۋ ءتاسىلى قاي ەلگە بولسا دا ۇلگى بولارلىقتاي. قازىرگى تاڭدا قازاقستان الەمدىك ساياساتتا, ەكونوميكادا, وزگە دە سالالاردا وزىندىك ورنى مەن ايبىندى كۇشى بار مەملەكەتكە اينالدى. كوپتەگەن حالىقارالىق ۇيىمداردىڭ مۇشەسى. تاۋەلسىزدىك ارقاسىندا قول جەتكىزگەن جەتىستىكتەرىمىز جەتەرلىك. ءاربىر قازاق ەڭسەسىن جوعارى ۇستاپ, «مەن قازاقپىن!» دەپ زور ماقتانىشپەن ايتا الاتىنداي جاعدايعا جەتتى. وسىنىڭ بارلىعى كونستيتۋتسيامىزدى قابىلداپ, مەملەكەتتىگىمىزدى نىعايتۋدىڭ ارقاسىندا مۇمكىن بولىپ وتىر. اتا زاڭىمىزدىڭ باستى كوزدەيتىن نىسانى – ادام جانە ونىڭ ءومىرى, قۇقىقتارى مەن بوستاندىقتارى. نەگىزگى زاڭىمىز تاۋەلسىز قازاقستاننىڭ قوعامدىق جانە مەملەكەتتىك قۇرىلىسىنىڭ ىرگەلى قاعيداتتارىن بەكىتىپ, دەموكراتيالىق ينستيتۋتتاردىڭ دامۋىنا قۋات بەردى. قوعامدىق تاتۋلىق پەن ساياسي تۇراقتىلىق, بۇكىل حالىقتىڭ يگىلىگىن كوزدەيتىن ەكونوميكالىق دامۋ, قازاقستاندىق پاتريوتيزم جانە مەملەكەت ءومىرىنىڭ اسا ماڭىزدى ماسەلەلەرىن دەموكراتيالىق ادىستەرمەن شەشۋ – رەسپۋبليكا قىزمەتىنىڭ تۇبەگەيلى پرينتسيپتەرى بولىپ بەكىتىلدى. دەمەك, قورىتا ايتقاندا, كونستيتۋتسيا – قازاق جەرىندە ءومىر سۇرەتىن بارلىق حالىق وكىلدەرىنىڭ بىرلىگىنە, تەڭدىگىنە كەپىلدىك بەرەتىن, سونداي-اق بارلىق بيلىك تارماقتارىنىڭ قىزمەتىنە باعىت بەرىپ وتىراتىن نەگىزگى قۇجات. ەلىمىز بەن قوعام تۇراقتىلىعىنىڭ, بولاشاققا دەگەن سەنىم مەن حالقىمىزدىڭ جاقسى تۇرمىسىنىڭ, لايىقتى ءومىرىنىڭ كەپىلى – اتا زاڭىمىزدىڭ مەرەيى ۇستەم بولا بەرسىن!
گۇلجان اجىعاليەۆا,
اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى