«بىرەۋ تويىپ سەكىرەدى...» دەگەن ناقىلدىڭ ەسكىرمەيتىن ءتۇرى بار. بۇل دەڭگەيدەگىلەردىڭ جاس تالعامايتىنىن قايتەرسىز.
مىنانى قاراڭىز... 21 تامىز كۇنى ەڭبەكشىلدەر اۋداندىق ىشكى ىستەر بولىمىنە جەرگىلىكتى تۇرعىن قوڭىراۋ شالىپ, تانىسىنىڭ ەڭبەك اۋىلىنداعى توعاندا دەمالۋشىلارعا تاپانشامەن وق اتىپ جاتقانىن, زارداپ شەگۋشىلەردىڭ دە بارلىعىن حابارلايدى. 53 جاستا ەكەن. اتا ساقالى ومىراۋىنا تۇسكەندەيىن كىسىگە كىم سەنبەسىن. تەز ارادا تەرگەۋ-جەدەل توبى وقيعا ورنىنا جونەلتىلىپ, ارتىنان ءىىب-نىڭ جەكە قۇرامى دا جەتىپ بارعان. اينالانىڭ ءبارى ءجىتى تەكسەرىلىپ, جاقىن ماڭداعى اۋىل تۇرعىندارىنا سۇراۋ سالىندى. اقىرىندا بۇل حاباردىڭ نەگىزسىز ەكەندىگى انىقتالدى.
پوليتسەيلەر: «وۋ, مىناۋىڭىز قالاي؟» – دەگەن سۇراق قويادى عوي. جاۋاپتىڭ ءتۇرىن قاراڭىز – «ماس بولىپ قالىپپىن...». وسىنى ۇيالماي-قىزارماي ايتقان كىسىنىڭ ۇستىنەن قر قك 419-بابىنىڭ 3-تارماعىمەن قىلمىستىق ءىس قوزعالدى. بۇل دەگەنىڭىز, 3 جىلدان 7 جىلعا دەيىن بوستاندىعىن شەكتەۋ نەمەسە وسى مەرزىمگە بوستاندىعىنان ايىرۋ دەگەندى بىلدىرەدى.
ەندى «قالجىڭباس» جاستارعا كەلەيىك. اۋىلدان وقۋ وقىپ, ءبىلىم ال دەپ جىبەرگەن 20 جاستاعى قىز «كوكشەتاۋ سۋ ارناسى» كاسىپورنىنا تەلەفون شالادى. تۇنگى ءبىر جارىمدا. ول ۇرەيلى داۋىسپەن «سۋ ارناسىنىڭ» اۋلاسىنا بومبا قويىلعان دەپ حابارلايدى. پوليتسيا مەن توتەنشە جاعدايلار قىزمەتى ءدۇر سىلكىنىپ كوتەرىلدى. يت الەككە تۇسكەنمەن ەشتەڭە تابىلمادى. بۇدان نە شىقتى؟ ەرىككەن قىز كوكشەتاۋ قالالىق سوتىنىڭ ۇكىمىمەن ەكى جىلعا شارتتى تۇردە بوستاندىعىنان ايىرىلىپ تىندى.
ءدال وسىنداي جاعداي بۋراباي جانە اقكول اۋداندارىندا قايتالاندى. ەكى جىگىت ساۋدا ۇيلەرىنە جارىلعىش زات قويىلعانىن حابارلاعان. مۇندايدا «ە, سونى قويشى» دەۋگە بولمايدى. تاعى دا جۇرتشىلىقتى دۇرلىكتىرىپ, ارنايى وپەراتسيا جۇرگىزىلدى. بۇل حاباردىڭ دا شىندىققا جاناسپايتىنى انىقتالعان.
«ويلانباعان وپىق جەيدى» دەگەنىمىز وسى. ويلانايىق, اعايىن!
باقبەرگەن امالبەك,
«ەگەمەن قازاقستان»