جەرلەسىمىز – «جاڭا تولقىننىڭ» جۇلدەگەرى

استانانىڭ 11 جاسار تۇرعىنى جانەل سادۋاقاس قىرىمدا وتكەن حالىق­­ارالىق «بالالار جاڭا تولقىنى-2016» جاس ورىنداۋ­شى­لار بايقاۋىندا جۇلدەگەر اتاندى. جاس ونەرپازدىڭ بىلتىرعى «جاڭا تولقىن» بايقاۋىندا ەكىنشى ورىن يەلەنگەن قازاقستاندىق ءانشى دينارا قايىروۆانىڭ شاكىرتى ەكەنىن ايتا كەتكەن ءجون. «بايقاۋ­عا قاتى­سۋىمىزدىڭ ماقساتى – جانەل­دى ورىنداۋشى رەتىندە ودان ءارى دامىتۋ, جاڭا دەڭگەيگە شىعۋ, جە­تەك­شى پروديۋسەرلەرمەن جۇمىس ىستەۋ. مەن جانەلدىڭ ونەرىن اسا جو­عارى باعالايمىن, ويتكەنى, «بالا­لار جاڭا تولقىنىنا» قاتى­سۋ­دىڭ ءوزى جەڭىس, ال جۇلدەلى ورىنعا يە بولۋ – ۇلكەن جەتىستىك. بۇل ونىڭ شىعارماشىلىق جولىندا باعىن­­دىرعان تاعى ءبىر بەلەسى, ەندى ودان ءارى ەڭبەكتەنىپ, ۆوكالدىق شەبەر­لى­گىن شىڭداۋعا سەپ بولادى», – دەيدى ول. «بالالار جاڭا تولقىنىنا» الەمنىڭ 11 ەلىنەن 8-12 جاس ارالى­عىنداعى 15 بالا قاتىستى. بايقاۋعا ەۆگەني كرىلاتوۆ, لەۆ لەششەنكو, يرينا دۋبتسوۆا, سەرگەي لازارەۆ جانە فيليپپ كيركوروۆ قازىلىق ەتتى. قازىلار القاسىنىڭ توراعاسى – رەسەيدىڭ حالىق ءارتىسى, پروديۋسەر, كومپوزيتور يگور كرۋتوي. سونىمەن, بالالار ءان باي­قاۋىن­دا ءبىرىنشى ورىندى رەسەي كونكۋرسانت­تارى – 12 جاستاعى الەكسەي زابۋ­گين جانە «ەي’ۆا» تريوسى ءبولىستى. ەكىنشى ورىن مالتادان كەلگەن 10 جاسار ەيلا مانجون مەن ارمە­نيا­نىڭ 8 جاسار ورەنى ميحايل گريگوريان­عا بۇيىر­دى. ال جۇلدەلى ءۇشىنشى ورىندى ەلىمىزدىڭ نامىسىن قورعاعان جانەل سادۋاقاس پەن 10 جاسار رەسەيلىك ماريا ميروۆايا يەلەندى. «ەگەمەن اقپارات»