جۋىقتا جەنەۆادا جۇمىس ساپارىمەن بولعان سەنات توراعاسى قاسىم-جومارت توقاەۆ بىرقاتار حالىقارالىق ۇيىمداردىڭ باسشىلارىمەن كەزدەسۋلەر وتكىزدى, دەپ حابارلادى پارلامەنت سەناتىنىڭ ءباسپاسوز قىزمەتى.
بۇۇ باس حاتشىسىنىڭ ورىنباسارى, بۇۇ-نىڭ جەنەۆاداعى بولىمشەسىنىڭ باس ديرەكتورى مايكل ميوللەرمەن كەزدەسۋ بارىسىندا حالىقارالىق كۇن ءتارتىبىنىڭ وزەكتى پروبلەمالارى, بۇۇ-نىڭ قارۋسىزدانۋ جونىندەگى كونفەرەنتسياسىنىڭ قىزمەتى بويىنشا پىكىر الماسۋ بولدى. م.ميوللەر قازاقستاندى 2017-2018 جىلدارعا بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋىمەن قۇتتىقتاپ, ەلىمىزگە وسى جاۋاپتى ميسسيانى جۇزەگە اسىرۋدا تابىس تىلەدى.
پرەزيدەنت نۇرسۇلتان نازارباەۆتىڭ «الەم. XXI عاسىر» مانيفەسىنىڭ نەگىزگى ەرەجەلەرىنە اڭگىمەلەسۋشىنىڭ نازارىن اۋدارا وتىرىپ, ق.توقاەۆ قازاقستاننىڭ باستاماسى بويىنشا 2015 جىلعى 7 جەلتوقساندا بۇۇ-نىڭ باس اسسامبلەياسى قابىلداعان يادرولىق قارۋدان ازات الەم قۇرۋعا قاتىستى جالپىعا بىردەي دەكلاراتسيانى ىسكە اسىرۋدىڭ ماڭىزدىلىعىن اتاپ كورسەتتى. سەنات توراعاسى بۇۇ-نىڭ جەنەۆاداعى كەڭسەسىنىڭ باسشىسىن سەمەي يادرولىق سىناق پوليگونى جابىلۋىنىڭ 25 جىلدىعىنا بايلانىستى اعىمداعى جىلعى 29 تامىزدا استانادا وتەتىن «يادرولىق قارۋسىز الەم قۇرۋ» اتتى حالىقارالىق كونفەرەنتسياعا شاقىردى.
دۇنيەجۇزىلىك ساۋدا ۇيىمىنىڭ باس ديرەكتورى روبەرتو ازەۆەدومەن كەزدەسۋ بارىسىندا جاھاندىق ساۋداداعى نەگىزگى ءۇردىستەر, ەكونوميكالىق رەفورمالار, ينۆەستيتسيالىق ساياسات جانە ەكونوميكانىڭ باسىم سەكتورلارىن قولداۋ شارالارى تۋرالى اڭگىمە بولدى. ق.توقاەۆ ر.ازەۆەدوعا پرەزيدەنت ن.نازارباەۆتىڭ سالەمىن جەتكىزە وتىرىپ, IX استانا ەكونوميكالىق فورۋمىنا ناتيجەلى قاتىسقانى ءۇشىن العىس ءبىلدىردى. سەنات باسشىسى ر.ازەۆەدوعا 2017 جىلعى ماۋسىمدا استانادا ەكسپو-2017 حالىقارالىق مامانداندىرىلعان كورمەنىڭ اشىلۋىنا ارنالعان ءىس-شارالار جايلى ايتىپ بەردى.
جوعارعى پالاتا توراعاسى قازاقستاندىق دەپۋتاتتاردىڭ ۇكىمەتپەن جانە بيزنەسپەن ءوزارا ءىس-قيمىل جاساي وتىرىپ, ەلىمىزدىڭ دسۇ-عا مۇشە بولۋى جاعدايىنداعى ۇلتتىق ەكونوميكامىز ءۇشىن قاتەرلەرگە دە, مۇمكىندىكتەرگە دە تۇراقتى نەگىزدە تالداۋ جۇرگىزەتىنىن اتاپ ءوتتى. جاڭا پارلامەنتتىك سەسسيادا پارلامەنتتىڭ زاڭ شىعارۋ قىزمەتىندە باسەكەگە قابىلەتتىلىكتى ارتتىرۋ باسىم باعىت بولىپ قالا بەرمەك. مەملەكەت باسشىسىنىڭ تاپسىرماسى بويىنشا بارلىق قارجىلىق راسىمدەردىڭ اشىقتىعىن قامتاماسىز ەتۋ ماقساتىندا بىرىڭعاي سالىق جانە كەدەن كودەكسى قارالاتىن بولادى. مونوپولياعا قارسى سالا رەفورماسى دا جالعاسىن تاپپاق.
ق.توقاەۆ حالىقارالىق قىزىل كرەست كوميتەتىنىڭ پرەزيدەنتى پەتەر ماۋرەرمەن دە كەزدەستى. قازاقستان سەناتىنىڭ سپيكەرى حقكك-نىڭ قارۋلى قاقتىعىستار جاعدايىندا ادامداردىڭ ءومىرى مەن ابىرويىن قورعاۋ, گۋمانيتارلىق كومەك كورسەتۋدى قامتاماسىز ەتۋ, سونداي-اق, حالىقارالىق گۋمانيتارلىق قۇقىقتىڭ نەگىزگى ەرەجەلەرىن ازىرلەۋ جانە ىسكە اسىرۋ ءجونىندەگى ايرىقشا ماڭىزدى قىزمەتىن اتاپ كورسەتتى. سەنات سپيكەرىنىڭ ءپىكىرىنشە, قازاقستاننىڭ 2017-2018 جىلدارعا بۇۇ قاۋىپسىزدىك كەڭەسىنىڭ تۇراقتى ەمەس ءمۇشەسى بولىپ سايلانۋىن, سونداي-اق, قازاقستاندىق اسكەري قىزمەتشىلەردىڭ حالىقارالىق ءبىتىمگەرشىلىك ميسسيالارعا قاتىسۋى ارتا ءتۇسكەنىن ەسكەرە وتىرىپ, قازىرگى كەزەڭدە قازاقستان مەن حقكك-نىڭ
ءوزارا ءىس-قيمىلى ەرەكشە ماڭىزعا يە بولۋدا.
ق.توقاەۆتىڭ بۇۇ ەۋروپالىق ەكونوميكالىق كوميسسياسىنىڭ اتقارۋشى حاتشىسى كريستيان فريس باحپەن كەزدەسۋىندە بۇۇ-نىڭ وڭىرلىك جوبالارى تۋرالى, اتاپ ايتقاندا, ورتالىق ازيا ەكونوميكالارى ءۇشىن ارنايى باعدارلاما (سپەكا) تۋرالى پىكىر الماسۋ بولدى. سەنات سپيكەرى سۋ رەسۋرستارىن باسقارۋ, ارال ءوڭىرىن وڭالتۋ, ەنەرگەتيكانى دامىتۋ پروبلەمالارىنا جانە باسقا دا ماسەلەلەرگە اڭگىمەلەسۋشىنىڭ نازارىن اۋداردى. ق.توقاەۆ وعان قازاقستاندا ەلىمىزدىڭ ەكونوميكاسى مەن قوعامدىق
تىنىس-ءتىرشىلىگىن جان-جاقتى جاڭعىرتۋعا باعىتتالعان «100 ناقتى قادام» ۇلت جوسپارىنىڭ ىسكە اسىرىلىپ جاتقاندىعى جايلى ايتىپ بەردى.