بۇگىنگىنىڭ جاستارى ءبىر بالانىڭ بەتىنە قاراپ وتىراتىن زاماننىڭ وتكەنىن تۇسىنەدى. دوساي بي بايگەل ۇلىنان قالدى دەگەن دانالىق ءسوزدى قۇيماقۇلاقتارىنا قۇيىپ العان با دەرسىڭ. شەشەن بالا سانىنا قاتىستى: «ءبىر بالاسى باردىڭ شىعار-شىقپاس جانى بار. ەكى بالاسى باردىڭ بولار-بولماس ءحالى بار. ءۇش بالاسى باردىڭ ءۇش رۋلى ەلدە مالى بار. ءتورت بالاسى باردىڭ ءتورت قۇبىلاسى تەڭ بولار. بەس بالاسى باردىڭ دەس بەرمەيتىن ءجونى بار. سەگىز بالاسى باردىڭ سەرگەلدەڭگە سالار كورى بار. توعىز بالاسى باردىڭ تولعاندىرار جولى بار. ون بالاسى باردىڭ وردا بۇزار قولى بار», دەگەن ەمەس پە؟ قازىرگى جاستاردىڭ باسىم بولىگىنىڭ ءتورت قۇبىلاسى تەڭ دەۋگە بولادى. ەشكىمگە دەس بەرمەيتىندەرى دە جەتكىلىكتى. وردا بۇزار قولى بارلار از شىعار. دەگەنمەن, وعان دا جەتەرمىز.
جاستاردىڭ وسىنداي نيەتىنە قاراي جاراتقان دا بالانى بەرىپ جاتىر. مىسالى, جاقىندا قىزىلوردا قالاسىنداعى انا مەن بالا ورتالىعىندا ەكى بىردەي ۇشەم دۇنيەگە كەلدى. بۇل ناعىز ءتاڭىردىڭ تارتۋى ەمەس پە؟! «قىزىمىز بار. ۇل كۇتىپ ءجۇر ەدىك. اللا تاعالا ءۇش بىردەي ۇلدى بەرە سالدى», – دەپ ريزاشىلىعىن ءبىلدىرىپ وتىر وتباسى يەلەرى – سالتانات پەن كارىبوز. نۇراسىل, ەراسىل, جاناسىل اتتى ءۇش بىردەي ازاماتتى جارىق ءدۇنيەگە اكەلىپ, قۋانىشى قوينىنا سىيماي وتىرعان ەرلى-زايىپتىنىڭ كوزىندە ومىرگە دەگەن ۇلكەن ىڭكارلىك بار.
ال بايقوڭىر قالاسىنىڭ تۇرعىنى الاشتىڭ ايىمى بولارداي ءۇش قىزدى بوساندى. ءامينا, ءاليما, ءلايلا اتتى كىشكەنتاي پەرىشتەلەر ءبىر اۋلەتتىڭ عانا ەمەس, تۇتاس ۇلتتىڭ ماقتانىشى بولادى عوي دەپ ۇمىتتەنەمىز. «ءۇش قىز ۋاقىتتان بۇرىن ومىرگە كەلدى. بۇگىندە ولار ءدارىگەرلەردىڭ باقىلاۋىندا. قازىر جاعدايلارى جاقسى»,– دەيدى انا مەن بالا ورتالىعىنىڭ قىزمەتكەرلەرى. «ءبىر قوزى تۋسا, ءبىر ءتۇپ جۋسان ارتىق شىعادى», دەيدى حالىق دانالىعى. ەندەشە, ومىرگە كەلگەن ۇشەمدەردىڭ دە نەسىبەسى مولىنان بولسىن دەپ تىلەيمىز.
نەسىبە دەمەكشى, بۇگىندە قازاقستان حالقى اسسامبلەياسى «اق ورامال» اتتى اكتسيا ۇيىمداستىرىپ جاتىر. وسى اكتسيانىڭ شەڭبەرىندە وبلىستىق دەنساۋلىق ساقتاۋ باسقارماسى ۇشەمدەرگە سىي-سياپات جاسادى. «قۋانىشتى بولىسسەڭ كوبەيەدى», دەگەن ءسوز وسىنداي ساتكە ارنالىپ ايتىلعان شىعار-اۋ. ءويتكەنى, بۇل ءبىر شاڭىراقتىڭ عانا ەمەس, تۇتاس حالىقتىڭ قۋانىشى بولسا كەرەك.
بۇل جىل باسىنان بەرى قىزىلوردا وبلىسىندا دۇنيەگە كەلگەن ءۇشىنشى ۇشەمدەر. ال سوڭعى التى ايدا 8 963 نارەستە ءومىرگە كەلگەن. ونىڭ 120-سى ەگىزدەر. ولاي بولسا, ءار شاڭىراقتا بەسىك تويى كوبەيسىن!
ەرجان بايتىلەس,
«ەگەمەن قازاقستان»
قىزىلوردا