بيىل ورال وڭىرىندە ەگىن وتە بىتىك شىقتى. كۇزدىك بيدايدىڭ شىعىمدىلىعى ورتاشا ەسەپپەن العاندا 40 تسەنتنەردەن اسىپ تۇسەدى. سوڭعى رەت قاي جىلى وسىنداي رەكوردتىق ءونىم جينالعانىن باتىسقازاقستاندىق استىق وسىرۋشىلەر ەستەرىنە تۇسىرە الاتىن ەمەس. مۇنداي جاعىمدى جايت ايماقتىڭ ەڭ استىقتى اۋدانى زەلەنوۆتا بولىپ وتىر. مۇنداعى «ماتەۆوسيان» شارۋا قوجالىعىنا قاراستى ەگىن ورىپ جۇرگەن امەريكالىق «دجون-دير» كومبايندارى تەڭىزدەي تەربەلگەن بيداي ساباقتارىن باۋداي ءتۇسىرىپ بارادى. وسى كورىنىسكە كۋا بولعان وبلىس اكىمى التاي كولگىنوۆتىڭ ءجۇزى دە تىم جايدارى كورىندى.
كوكجيەكپەن كومكەرىلگەن ەگىندىككە سۇيسىنە ءارى ريزا بولىپ تۇرعان وبلىس باسشىسى ءبىر كەزدە القاپتا ءجۇرگەندەردى تاڭ-تاماشا قالدىرىپ جاقىنداپ كەلىپ توقتاعان كومباين شتۋرۆالىنا بارىپ وتىردى. ول ەڭ اۋەلى «دجون-ديردى» باسقارۋ وتە ىڭعايلى ءارى قولايلى ەكەنىنە كوزىن جەتكىزدى. باسقارۋ كابيناسى تۇگەلدەي اينەكتەلگەن, شتۋرۆال يەسىنىڭ جان-جاعىن ءجىتى باقىلاپ وتىرۋىنا تولىق مۇمكىندىك بار. اۆتوماتتاندىرىلعان ەگىن ورۋ تەحنيكاسىندا اۋا باپتاعىش قۇرىلعىعا دەيىن ويلاستىرىلىپتى.
وبلىس اكىمى ەش تايسالماستان ونى جۇرگىزۋ تەتىگىن باسقان كەزدە دالا كەمەسى قازداي قالقىپ قوزعالا بەردى. كوپ جۇرمەي-اق جۇزدەگەن مەتر العا وزعان كەزدە ونىڭ بۋنكەرى باداناداي التىن دانگە تولدى دا قالدى. وسىلايشا ءوڭىر باسشىسى بيىلعى جىلى قامباعا قۇيىلاتىن قۇت-بەرەكە مەن ىرىسقا ءوز قولىمەن ورىلعان 48 تسەنتنەر بيدايدى قوستى. وسىندايدا تەحنيكا ءتىلىن ءبىلۋ ەش ۋاقىتتا ارتىقتىق ەتپەيتىنىنە كوزىم ودان ءارى جەتە تۇسكەندەي كۇي كەشەدى ەكەنسىڭ. ءارى تەحنيكا بولعاندا قانداي؟! زاماناۋي, ەڭ سوڭعى ۇلگىدەگى الىمدى دا, شالىمدى كومباين. ءسىرا, مۇنى وبلىس اكىمىنىڭ كوپشىلىككە كورسەتكەن تاعى ءبىر ونەگەسى دەسەك جاراسار.
تەمىر قۇسايىن,
«ەگەمەن قازاقستان»
باتىس قازاقستان وبلىسى, زەلەنوۆ اۋدانى