اۋىلىن اباتتاندىرعان اقىن

ۇلكەن قاراتال اۋىلىندا ورازباي ەسداۋلەتوۆ ساياباعى اشىلدى ساۋىر, سايقانداي سەڭگىر تاۋلار باۋىرىنداعى زايسان اۋدانىنىڭ ۇلكەن قاراتال اۋىلىندا ۇلى وتان سوعىسىنىڭ ارداگەرى جانە ۇزاق جىل ءبىلىم بەرۋ سالاسىندا ەڭبەك ەتكەن ۇستاز ورازباي ەسداۋلەتوۆتىڭ اتىندا ساياباق اشىلىپ, زايسان قالاسىندا ءوزى تۇرعان ۇيگە ەسكەرتكىش تاقتا ورناتىلدى. ەسداۋلەتوۆتەر اۋلەتىنىڭ ۇيىمداستىرۋىمەن وتكەن اشىلۋ سالتاناتىنا وبلىس اكىمىنىڭ ورىنباسارى جاقسىلىق ومار, جاس اقىن قالقامان سارين جانە اۋىل تۇرعىندارى قاتىستى. قازاقتا تەك دەگەن كەرەمەت ۇعىم بار. ۇلىقبەك ەسداۋلەت پەن گۇلنار سالىقباەۆا سىندى قازاقتىڭ كورنەكتى اقىندارىن سىيلاعان اۋلەتتىڭ تۋعان جەرگە تاعزىم ەتىپ, اياداي اۋىل­دى اباتتاندىرۋعا ۇلەس قوسۋى­نىڭ تاربيەلىك ءمانى زور. ياعني, قاراپايىم ەڭبەگىمەن ەل ىقى­لاسىنا بولەنگەن ورازباي اقساقالدىڭ بالالارى اكە قو­لىمەن وتىرعىزىلعان ماۋەلى باقتى قورشاپ, بالالاردىڭ ويىن الاڭىن سالىپ بەردى. ءۇل­كەنقاراتالدىق تۇرعىندار باۋ اۋماعىندا بۇرىن مەكتەپ بول­عانىن ايتادى. ورازباي قارت قاي جاققا بارسا دا ءتۇرلى جەمىس اعاشتارىنىڭ كوشەتتەرىن تامىر-توپىراعىمەن اتىنا وڭگەرىپ اكەلىپ, مەكتەپ اۋلا­سىنا وتىرعىزىپ, بۋدانداس­تىرۋدى جانى سۇيەتىن ادام بولىپتى. الايدا, 1990 جىلى زايسان جەرىندەگى ءزىلزالادان كەيىن مەكتەپتى قايتا سالۋعا باس­قا ورىن تاڭدالىپ, اتالعان باۋ قا­­راۋسىز, مال كولەڭكەلەيتىن ورىنعا اينالعان. مىنە, وسى اكە باعىن جاڭارتىپ, ساياباققا اي­نال­دىرعان ەسداۋلەتوۆتەردىڭ يگىلىكتى ىسىنە اۋىلداستارى شەكسىز ريزاشىلىقتارىن ءبىلدىردى. – باياعىدا قىزىلوردانىڭ ارالىندا تۋىپ-وسكەن دوسىم جاراسقان ءابدىراش زايسانعا كەلگەنىندە: «مۇنداي شۇرايلى, كوركەم جەردە تۋعان ەكىنىڭ ءبىرى اقىن بولماي قايتەدى؟ مىقتى بولساڭدار قۇمنان باسقا تۇگى جوق ارالدان شىعىپ ولەڭ جازىپ كورىڭدەر», دەپ ازىلدەگەنى بار. راسىندا, دۇنيەنىڭ قاي شەتىندە بولسام دا, تۋعان توپىراعىما جەتەر جەر جوقتىعىن بايقادىم. تۇگىن تارتسا مايى شىعاتىن شۇرايلى ولكەدە قادا قاقسا كوكتەپ, ءوسىپ كەتەدى. قازىر استانانىڭ شەتىندەگى كەڭ دالانى قالىڭ ورمانعا اينالدىرىپ, اراسىنا قىرعاۋىلدان باستاپ ءتۇرلى جانۋاردى جىبەرىپ جاتىر. بۇل وتە تاعىلىمدى ءىس. «اتادان مال قالعانشا, تال قالسىن» دەيدى. سىزدەر دە وسى جۇماق مەكەندە اعاش ەكسەڭىزدەر قۇبا-قۇپ, – دەدى اۋىل­داس­تارىنا ۇلىقبەك ەسداۋلەت. ال و.ەسداۋلەتوۆتىڭ زايسان قالا­سىندا تۇرعان ۇيىنە ورنا­تىلعان مەموريالدىق تاقتانى وسى اۋلەتتىڭ تاعى ءبىر تالانتتى تۋماسى, ومىردەن ەرتە وتكەن تەاتر رەجيسسەرى رۇستەم ەسداۋ­لەتتىڭ وتباسى اشتى. جيىن سوڭىندا زايسان اۋدانىنىڭ اكىمى تەمىربەك قاسىمجانوۆ تۋعان جەردى كوركەيتۋگە ۇلەس قوسقان ازاماتتاردى العىس حاتپەن ما­راپاتتاپ, جەرلەستەرى اقىن ۇلىق­بەك ەسداۋلەتكە تۇلپار مىنگىزدى. دۋمان اناش, «ەگەمەن قازاقستان» شىعىس قازاقستان وبلىسى, زايسان اۋدانى سۋرەتتى تۇسىرگەن مارات سالبانوۆ