الماتىداعى قازاقستان رەسپۋبليكاسى پرەزيدەنتىنىڭ ارحيۆىندە اشىلعان «تاۋەلسىز قازاقستان تاريحىنداعى پارتيالىق قۇرىلىس» اتتى تاريحي-قۇجاتتامالىق كورمەگە كەلۋشىلەر سورەگە قويىلعان سۋرەتتەردەن حالىق پەن بيلىك اراسىنداعى تىعىز بايلانىستىڭ كۋاسى ىسپەتتى اسەر الدى. – ساياسي شارانىڭ وتۋىنە «ساياسي پارتيالار تۋرالى» قازاقستان رەسپۋبليكاسى زاڭىنىڭ قابىلدانۋىنىڭ 14 جىلدىعى سەبەپشى بولدى. تاۋەلسىز قازاقستاننىڭ 25 جىلدىق مەرەيتويى مەن ەلباسى نۇرسۇلتان نازارباەۆتىڭ بەس ينستيتۋتتىق رەفورماسىن ورىنداۋ بويىنشا «100 ناقتى قادام» – ۇلت جوسپارىن جۇزەگە اسىرۋ شەڭبەرىندە وتكىزىلىپ وتىرعان كورمەگە ەلىمىزگە تانىمال ساياساتكەرلەر مەن مەملەكەت قايراتكەرلەرىنىڭ, جاس ۇرپاق وكىلدەرىنىڭ جينالۋى سونىڭ ايقىن دالەلى, – دەدى بىزگە بەرگەن سۇحباتىندا پرەزيدەنت ءارحيۆىنىڭ جيناقتاۋ جانە قۇجاتتاما باسقارماسىنىڭ باس ساراپشىسى قۇرالاي قابدولوۆا. جۇرتشىلىققا كورمەگە قويىلعان تاريحي قۇجاتتاردىڭ تاريحى تۋرالى قىسقاشا باياندالىپ, ناقتى ءارى ايعاقتى تۇسىنىكتەمەلەر بەرىلدى. تاريحي قۇجاتتار لەگىنىڭ اراسىندا ەل پرەزيدەنتى نۇرسۇلتان نازارباەۆتىڭ 1999 جىلى رەسپۋبليكالىق «وتان» (وتچيزنا) پارتياسى ورتالىق اتقارۋ اپپاراتىنىڭ باستاۋىش پارتيا ۇيىمىنىڭ اتىنا ءوزىن پارتيا مۇشەلىگىنە قابىلداۋى تۋرالى جازعان ءوتىنىشى, حالىق قاھارمانى, عارىشكەر-ۇشقىش تالعات مۇساباەۆتىڭ حالىقارالىق عارىش ستانساسىنداعى پارتيانىڭ تۋىن كوتەرگەن قىزىقتى سۋرەتى سياقتى باسقا دا مازمۇندى فوتودەرەكتەر كەلۋشىلەردىڭ نازارىن وزىنە ەرىكسىز اۋدارتتى. بۇگىنگى تاقىرىپتىڭ مازمۇنىن اشىپ, تۇشىندىراتىن دەرەكتى فيلم كورسەتىلدى. قۇجاتتار تانىستىرىلىمىنان كەيىن قازاقستان رەسپۋبليكاسى پرەزيدەنتى ءارحيۆىنىڭ ديرەكتورى, تەحنيكا عىلىمدارىنىڭ دوكتورى, پروفەسسور بوريس جاپاروۆ شاراعا جينالعان حالىق الدىندا بىلاي دەدى: – قازاقستان پرەزيدەنتىنىڭ ءارحيۆى – قازاقستاننىڭ ساياسي تاريحىنىڭ ءارحيۆى. كەڭەس زامانىندا بۇل عيماراتتا پارتيا تاريحى ينستيتۋتى بولدى. 1917 جىلى كەڭەس ءداۋىرى ورناعاننان باستاپ, كەشەگى ىدىراعانىنا دەيىنگى, قازاقستاننىڭ 1991 جىلى تاۋەلسىزدىك العاننان باستاپ, كۇنى بۇگىنگە دەيىنگى كەزەڭدى قامتيتىن ساياسي-تاريحي قۇجاتتاردىڭ بارلىعى وسىندا ساقتالعان. تاۋەلسىزدىك العان سوڭ قازاقستان كوپپارتيالىق جۇيەگە كوشتى. 25 جىل ىشىندە پارتيا قۇرىلىسىندا قىرۋار جۇمىستار اتقارىلدى. ونداعان پارتيالار قۇرىلدى. ولاردىڭ ارقايسىسىنىڭ تاريحى ارقالاي بولىپ قالىپتاستى. دەموكراتيالىق ەلدە كوپپارتيالىق جۇيەنىڭ بولۋى – زاڭدى قۇبىلىس. ويتكەنى, كوپپارتيالىق جۇيە – حالىق پەن بيلىك اراسىنداعى التىن كوپىر. سوندىقتان كوپشىلىك نازارىنا ۇسىنىلىپ وتىرعان تاريحي قۇجاتتارىمىز تاريحي شىنايى شەجىرە دەپ ويلايمىن. كورمەگە «نۇر وتان» پارتياسى مەن ونىڭ توراعاسى ن.ءا.نازارباەۆتىڭ قىزمەتىنە بايلانىستى فوتوقۇجاتتار كەڭىنەن ۇسىنىلىپتى. ءاربىر ساياسي پارتيالاردىڭ ءاربىر كەزەڭدەردەگى جەتەكشىلەرى ولجاس سۇلەيمەنوۆ پەن عاني قاسىموۆتىڭ, ءانۋار ءالىمجانوۆ پەن ازات پەرۋاشەۆتىڭ جانە باسقالارىنىڭ فوتوسۋرەتتەرى مەن تاريحي قۇجاتتارى كورمەگە ءار بەرىپ تۇردى. دوڭگەلەك ۇستەل باسىندا فيلوسوفيا عىلىمدارىنىڭ دوكتورى ابدىمالىك نىسانباەۆ, «نۇر وتان» پارتياسى الماتى قالالىق فيليالى توراعاسىنىڭ ورىنباسارى جۇلدىز وماربەكوۆا, «نۇر وتان» پارتياسىنىڭ ارداگەرى, قازاقستان حالقى اسسامبلەياسىنىڭ مۇشەسى, فيلوسوفيا عىلىمدارىنىڭ دوكتورى قازاقباي قاسىموۆ, قازاقستان رەسپۋبليكاسى پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ الماتى بولىمشەسىنىڭ جەتەكشىسى, ساياساتتانۋشى ءمادينا نۇرعاليەۆا جانە باسقالارى پارتيا تاريحىنا بايلانىستى كوكەيدە جۇرگەن پىكىرلەرىن ورتاعا سالدى, قازاقستانداعى پارتيا قۇرىلىسى تاريحىنا بايلانىستى قىزىقتى اڭگىمە ءوربىتتى. قازاقستان رەسپۋبليكاسى پرەزيدەنتى ءارحيۆىنىڭ قورلارىنان پارتيالىق قۇرىلىس تۋرالى ارحيۆتىك ماتەريالداردىڭ كوبى جۇرتشىلىقتىڭ نازارىنا العاش رەت ۇسىنىلدى. تالعات ءسۇيىنباي, «ەگەمەن قازاقستان» الماتى سۋرەتتى تۇسىرگەن اۆتور