كەشە باس رەداكتورلار كلۋبى ەۋرازيالىق توپتىڭ قولداۋىمەن قازاق ءتىلدى جۋرناليستەر اراسىندا وتكىزىلگەن ءداستۇرلى VI «التىن قالام» بايقاۋىنىڭ جەڭىمپازدارىن ماراپاتتادى. وندا «ۇزدىك ماقالا» نوميناتسياسى بويىنشا جۇلدەلى ەكىنشى ورىندى ارىپتەسىمىز, «ەگەمەن قازاقستان» رەسپۋبليكالىق گازەتىنىڭ قوستاناي وبلىسىنداعى مەنشىكتى ءتىلشىسى ءنازيرا جارىمبەتوۆا جەڭىپ الدى.
بۇل بايقاۋدىڭ باستى ماقساتى – ەۋرازيالىق توپ كاسىپورىندارىندا جۇمىس ىستەيتىن, ءوندىرىستەگى قاراپايىم ەڭبەك ادامدارىن بۇگىنگى بەيبىت زاماننىڭ قاھارماندارى رەتىندە ۇلگى ەتىپ, ناسيحاتتاۋ. التى جىلدان بەرى جالعاسىپ كەلە جاتقان بايقاۋعا وسى جولى رەسپۋبليكالىق جانە ءوڭىرلىك باسىلىمداردىڭ, سونداي-اق, تەلەديدار, راديو جانە ينتەرنەت جاريالانىمدارىنىڭ 37 جۋرناليسى نيەت ءبىلدىرىپ, 133 ماقالا مەن بەينە-اۋديو ماتەريالدارىن جىبەرگەن ەكەن. ونىڭ اراسىندا 22 ءتىلشىنىڭ 57 ماتەريالى تالاپقا ساي دەپ تانىلىپ, كوميسسيا تالقىسىنا ءتۇسىپ, وڭ باعاسىن العان.
جۇلدەلەردى تاپسىرۋ ءراسىمىنە ERG اپپارات جەتەكشىسى سەيىتقالي راحيموۆ, باس رەداكتورلار كلۋبىنىڭ پرەزيدەنتى بيبىگۇل جەكسەنباي, «ەگەمەن قازاقستان» رەسپۋبليكالىق گازەتى» اق باسقارما توراعاسى دارحان قىدىرالى, «قازاقستان رترك» اق باسقارما ءتورايىمىنىڭ ءوندىرىس ءجونىندەگى ورىنباسارى قاينار ولجاي قاتىسىپ, جەڭىمپازداردى ماراپاتتاپ, سىيلىقتارىن تاپسىردى.
بايقاۋ جەڭىمپازدارىنا ارنالعان جۇلدە قورى 2 ملن. تەڭگە ەكەنىن ايتىپ وتكەنىمىز ءجون. «جەگەنى جانتاق, ارقالاعانى التىن» دەپ شەرحان مۇرتازا ايتقانداي, جاقسىنى دا, قيىندىقتى دا جۇگىرىپ ءجۇرىپ ەلگە جەتكىزۋگە اسىعاتىن قالامى ءجۇيرىك جۋرناليستەر مۇنداي قۇرمەتكە ابدەن لايىق. ول جونىندە ەۋرازيالىق توپتىڭ وكىلى مەن باس رەداكتورلار كلۋبىنىڭ مۇشەلەرى ايتىپ ءوتتى. استانادا ۇيىمداستىرىلعان شاراعا باق وكىلدەرىمەن قاتار ءبىرقاتار, وقىرماندار جانە كورەرمەندەر مەن تىڭدارماندار قاتىستى.
ءوز كەزەگىندە ءسوز العان «ەگەمەن قازاقستان» رگ» اق باسقارما توراعاسى دارحان قىدىرالى ءارىپتەستەردى جۇلدەلەرىمەن قۇتتىقتاي وتىرىپ, ۇنەمى ءسوز مايدانىنىڭ الدىڭعى شەبىندە ءجۇرىپ, حالىققا شىنايى اقپارات جەتكىزۋدى كاسىپ ەتكەن التىن قالام يەلەرىنە جۇرەكجاردى تىلەگىن جەتكىزدى.
التىنشى رەت وتكىزىلىپ وتىرعان «التىن قالام» بايقاۋىنىڭ بۇل جولعى جۇلدەلەرى نەگىزىنەن ايماقتارداعى جۋرناليستەردىڭ «قانجىعاسىنا» بايلاندى. سونىمەن, «ۇزدىك ماقالا» نوميناتسياسى بويىنشا 1-ورىندى «اقتوبە» گازەتىنىڭ ءتىلشىسى كامشات قوپاەۆا, 2-ورىندى «ەگەمەن قازاقستان» گازەتىنىڭ قوستاناي وبلىسىنداعى مەنشىكتى ءتىلشىسى ءنازيرا جارىمبەتوۆا يەلەندى. ال «ۇزدىك سيۋجەت» نوميناتسياسى بويىنشا 1-ورىندى «استانا» تەلەارناسىنىڭ ءجۋرناليسى ايگۇل شايحيموۆا, 2-ورىندى 24.KZ تەلەارناسىنىڭ پاۆلودارداعى مەنشىكتى ءتىلشىسى قارلىعاش قاسيەتوۆا جەڭىپ الدى. سونداي-اق, 3-ورىن «قازاقستان» رترك قاراعاندى وبلىستىق فيليالىنىڭ جۋرناليسى ءاشىمحان جانپەيىسوۆ پەن پاۆلودار وبلىستىق «حالىق» راديوسىنىڭ ءتىلشىسى راۋشان سىبانجانوۆاعا بۇيىردى.
نۇرباي ەلمۇراتوۆ,
«ەگەمەن قازاقستان»
استانا
سۋرەتتە: «التىن قالام» بايقاۋىنىڭ جۇلدەگەرى ن.جارىمبەتوۆا