8 شىلدەدە ماسكەۋدەن اتتانعان «جىبەك جولى» راللي-مارافونىنا قاتىسۋشىلار قازاقستان اۋماعىن باسىپ ءوتىپ, قىتاي جەرىندەگى 8-كەزەڭگە جەتتى. باس-اياعى 16 كەزەڭنەن تۇراتىن مارافون 24 ءشىلدەدە بەيجىڭدە مارەگە جەتۋگە ءتيىس.
جول تالعامايتىن كولىكتەر اراسىندا قازاقستان جەرىندە ۇزدىك ناتيجە كورسەتكەن سيريل دەپرە ءازىر كوش باسىن ەشكىمگە بەرەر ەمەس. ول ءوزىنىڭ باستى قارسىلاسى سەباستەن ليوبتەن ۋاقىت ايىرماشىلىعىن 7 مينۋتقا دەيىن جەتكىزدى. جەرلەسىمىز ايدىن راقىمباەۆتىڭ ەكيپاجى دەپرەدەن 20 مينۋتقا قالىپ كەلەدى. جۇك كولىكتەرىنىڭ جارىسىندا م.ۆان دەن برينك ەكيپاجى ەكىنشى كەلە جاتقان كوزلوۆسكي ەكيپاجىنان 20 مينۋتقا ۇزاپ شىقتى.
ۇيىمداستىرۋشىلاردىڭ ايتۋىنشا, «جىبەك جولى-2016» الەمدىك راللي-مارافونداردىڭ ىشىندەگى ەڭ ۇزاعى. اڭىزعا اينالعان «پاريج-داكار» كوپكۇندىگىنىڭ ءوزى 9 300 شاقىرىم بولسا, «جىبەك جولىنىڭ» قاشىقتىعى 10 700 شاقىرىمعا تەڭ. وعان قوسا, بۇل كوپكۇندىك وتەتىن جولدىڭ بەدەرى دە سپورتشىلارعا بەيتانىس ەكەندىگى جارىستى ودان سايىن قيىنداتتى ءھام تارتىمدىلىعىن دا ارتتىرا ءتۇستى.
بۇعان دەيىن ماسكەۋدەن شىققان كولىكتەر ۋفاعا سوعىپ, ودان سوڭ قوستاناي ارقىلى استاناعا اتباسىن تىرەگەن-ءدى. ەلوردادان بالقاشقا جەتىپ ءبىر ايالداپ, الماتىعا اتباسىن تىرەگەننەن كەيىن قىتاي جەرىنە ءوتتى. جاقىن كۇندەرى گوبي ءشولىن ارتتا قالدىرۋعا ءتيىس.
«جىبەك جولى-2016» راللي-مارافونىنا الەمنىڭ 40 ەلىنىڭ 92 جۇك تالعامايتىن كولىگى, 24 جۇك كولىگى قاتىسىپ جاتىر. ولاردىڭ اراسىندا قازاقستاندىق 7 ەكيپاج دا بار. بۇعان دەيىن «داۆار» راللي-مارافونىندا بىرنەشە مارتە توپ جارعان سەباستەن ليوب, ستەفان پەترونسەل, سيريل دەپرە سىندى اۆتوسپورت الەمىنىڭ ساڭلاقتارى «جىبەك جولىندا» دا العاشقى ورىنداردى ەشكىمگە بەرەر ەمەس.
ارنۇر اسقاروۆ,
«ەگەمەن قازاقستان»