استانا كۇنى قۇرمەتىنە ءار ءوڭىر تاماشا تارتۋلار ازىرلەگەن بولاتىن. سونىڭ ءبىرى شارداراداعى تەڭىز جاعاسىنان زاماناۋي ۇلگىدە سالىنعان ەكى قاباتتى جاڭا مۇراجاي. وبلىستىق بيۋدجەتتەن بولىنگەن 107 ملن. تەڭگەگە اۋماعى 1800 شارشى مەتر بولاتىن عيمارات قۇرىلىسىن بىلتىرعى جىلدىڭ شىلدە ايىنان باستاعان «جەر-سۋ-جول-سەرۆيس» جشس بەلگىلەنگەن مەرزىمدە ويداعىداي اياقتاپ شىقتى.
مادەنيەت وشاعىنىڭ اشىلۋ سالتاناتىندا وبلىستىق ءماسليحاتتىڭ حاتشىسى قامىتبەك ايتورەەۆ, وبلىس اكىمىنىڭ ورىنباسارى جاقىپ بوكەنباەۆ, اۋدان اكىمى ارمان ابدۋللاەۆ, وبلىستىق تاريحي-ءولكەتانۋ مۇراجايىنىڭ ديرەكتورى گۇلنار ارەنوۆا تۇرعىنداردى قۋانىشتارىمەن قۇتتىقتاپ, مۇراجاي ءۇيى الداعى ۋاقىتتا حالىقتىڭ رۋحاني ازىعىنا اينالا بەرسىن دەگەن تىلەكتەرىن ارنادى.
قۇرىلىس جۇمىسىن ءوز دارەجەسىندە جۇرگىزگەن «جەر-سۋ-جول-سەرۆيس» سەرىكتەستىگىنىڭ باس ينجەنەرى قانات ەرجىگىت جاڭا نىساننىڭ كىلتىن اۋداندىق تاريحي-ولكەتانۋ مۇراجايىنىڭ ديرەكتورى نۇرلان سىمايىلوۆقا سالتاناتتى جاعدايدا تابىستادى. مەرەكەلىك كۇيگە بولەنگەن قالا تۇرعىندارى مەن ارداگەرلەر زاماناۋي تالاپقا ساي سالىنعان قوس قاباتتى ءۇيدىڭ اسەم كوركىن قىزىقتادى. ءويتكەنى, ول ارحيتەكتۋرالىق سىمباتى مەن اۋماعى جاعىنان وبلىستاعى بىردەن-ءبىر ايشىقتى عيمارات بولىپ تابىلادى. ءارى بيىلعى ەلوردا كۇنى قۇرمەتىنە سىيعا تارتىلعان شاشۋلاردىڭ ىشىندەگى ەڭ ايتۋلىسى دەۋگە لايىق.
ءار مەملەكەتتىڭ ءتول مادەنيەتى مەن سالت-ءداستۇرى, تاريحى مەن تاعىلىمى قاشاندا مۇراجاي ءۇيى ارقىلى ناسيحاتتالىپ كەلسە, بۇل جاعىنان شاردارالىقتاردى مارقايتاتىن ۇلكەن جەتىستىك وسى بولىپ قالماق. ەندى الدا جاڭا مۇراجايدىڭ ءىشىن قۇندى جادىگەرلەرمەن تولتىرۋ مىندەتى تۇر.
ءادىل ءابدىرامانوۆ
وڭتۇستىك قازاقستان وبلىسى