تولە بي ءال-فارابيمەن قاۋىشتى

الماتى تۇرعىندارى قۋانىشىن جاسىرا الماي قالدى. بىراق... الماتىنىڭ بۇگىنگى ءنومىر ءبىرىنشى پروبلەماسى, ەڭ كوكەيكەستى ماسەلەسى – كولىك كەپتەلەگى!.. الىپ شاھاردىڭ ءبىر قيىرىنان ەكىنشى  قيىرىنا جەتۋ قيامەت-قايىمعا اينالعالى قاشان؟! اسىرەسە, تاڭەرتەڭگىلىك جانە كەشكىلىك قىزمەتكە, وقۋعا, بالاباقشاعا بارار نەمەسە قايتار كەزدەگى جول ازابىن تارتىپ جۇرگەندەر مۇنى جاقسى بىلەدى. قالانىڭ قاي بۇرىشىنا بارساڭىز دا جول بويىنداعى كۇندەلىكتى كورىنىس وسىنداي. جايسىز قۇبىلىسقا حالىقتىڭ ەتى ۇيرەنە باستادى. مۇنىڭ ءبارىن بەس ساۋساقتاي ءبىلىپ وتىرعان قالا باسشىلارى  شاھاردىڭ نەگىزگى باس جوسپارىنا سايكەس جول قاتىناسىنا قاتىستى ءتۇيىندى ماسەلەنى شەشۋگە بارىنشا كۇش سالىپ تا كەلەدى. بىراق, كولىك سانىندا شەكتەلۋ بايقالار ەمەس... قۇرىلىسى 2011 جىلى باستالىپ قازىر پايدالانۋ ۇستىندەگى الماتىنىڭ كۇنشىعىس اينالاما اۆتوموبيل جولىنىڭ (7,8 شاقىرىم) ءبىر تارماعى حالىقارالىق اۋەجايعا بارىپ تۇيىقتالاتىن جىلدام كولىك ماگيسترالى قالاداعى جول قاتىناسىنىڭ ءجۇرىسىن ءبىرشاما جەڭىلدەتكەنى راس. قالا ىشىندەگى كۇرە جولدىڭ ءبىرى – تولەبيدىڭ سول اينالما جولعا ء(ال-فارابي داڭعىلىنا) قوسىلۋىنا 110-اق مەتر  جەر قالعان ەدى! تاياۋدا ەكى كوشە قوسىلىپ, جاڭا باعىتتاعى كولىكتىك جول ايرىعى  اشىلدى. قالا تۇرعىندارى قۋانىشىن جاسىرا المادى. ساراپشىلار دا وسى جول قيىلىسى ارقىلى ءبىر تاۋلىكتە 60 مىڭ اۆتوكولىك ءجۇرىپ وتەدى, اۋماقتاعى جول كەپتەلەگى بەلگىلى ءبىر مولشەرگە ازايادى دەگەندى ايتىپ ۇلگەردى... تۇرعىنداردى جاڭا كوشە ايرىعىنىڭ اشىلۋمەن قۇتتىقتاعان قالا اكىمى باۋىرجان بايبەك «ەلباسىنىڭ سارابدال ساياساتىنىڭ ارقاسىندا ەلىمىزدىڭ بولاشاعى ءۇشىن قانشاما ينفراقۇرىلىمدىق جوبالار جۇزەگە اسىپ, جولدار سالىنىپ, جاڭادان جۇمىس ورىندارى اشىلىپ كەلەدى. الماتىنىڭ كولىك-لوگيستيكالىق مۇمكىندىگىن كەڭەيتۋ ماقساتىنداعى بۇگىنگى شارا سونداي ۇلكەن ءىستىڭ ءبىر عانا كىشكەنتاي كورىنىسى», دەدى. اتالعان جول ايرىعىنىڭ اشىلۋى راسىندا دا قالانىڭ بۇرىنعى «ساياحات» اۆتوبەكەتى اۋماعىنان باستالاتىن – رايىمبەك, ءسۇيىنباي, فۋرمانوۆ, پۋشكين, جانگەلدين كوشەلەرىندەگى كەپتەلەكتى ايتارلىقتاي ازايتادى ەكەن. بۇل دا بولسا جول-كولىك قوزعالىسىنىڭ بۇگىنگى ولشەمىندە ۇلكەن جەڭىس! قالانىڭ سولتۇستىك باعىتتاعى كولىك لەگىنىڭ كەپتە­لەكسىز ءجۇرۋىن قامتاماسىز ەتەتىن رىسقۇلوۆ پەن ساين كوشەلەرىندەگى جول ايرىعى تاياۋ ارادا بىتۋگە ءازىر. بوكەيحانوۆ كوشەسىندەگى شەڭبەرلى كوپىر الداعى 2017 جىلى پايدالانۋعا بەرىلەدى. الايدا, قالا ءۇشىن بۇل جول ايرىقتارىنىڭ قانشالىقتى جەڭىسكە بالاناتىنى جانە بەيمالىم. ويتكەنى, الماتىنىڭ وكپەسىن كۇن سايىن «تۇتىندەتىپ» قىسىپ جۇرگەن 700 مىڭنان اسا اۆتوكولىكتىڭ سانى وعان دەيىن تاعى قوسىلماسا, ازاياتىن ءتۇرى جانە بايقالمايدى... تالعات ءسۇيىنباي, «ەگەمەن قازاقستان» الماتى