«نۇر وتان» پارتياسى توراعاسىنىڭ ءبىرىنشى ورىنباسارى مەن ماڭعىستاۋ وبلىسىنىڭ اكىمى اقتاۋ قالاسىندا پارتيا بەلسەندىلەرىمەن, يمامدارمەن جانە زيالى قاۋىم وكىلدەرىمەن بىرقاتار كەزدەسۋ وتكىزدى.
بۇگىن بارشا قازاقستان جۇرتشىلىعى ەلباسىنىڭ اقتوبەدەگى جانتۇرشىگەرلىك لاڭكەستىكتىڭ قۇرباندارىن ەسكە الۋعا ارنالعان ۇلتتىق ازا تۇتۋدى جاريالاعان كەشەگى مالىمدەمەسىن تالقىلاۋدا. بۇل تاقىرىپ مۇحتار قۇل-مۇحاممەد پەن اليك ايدارباەۆتىڭ اقتاۋ قالاسىنداعى كەزدەسۋلەرىنىڭ دە نەگىزگى وزەگى بولدى.
كەزدەسۋدە لاڭكەستەردىڭ ەلدى دۇربەلەڭگە سالىپ, قوعامدا ۇرەي تۋعىزۋدى كوزدەگەنى, الايدا, ولاردىڭ بۇل ارەكەتتەرىنەن تۇك شىقپاعانى ايتىلدى. قايتا قاندى وقيعا ءبىرتۇتاس قازاقستان حالقىن ودان ءارى ۇيىستىرىپ, جۇدىرىقتاي جۇمىلدىرا ءتۇستى. بارشا قازاقستان حالقى ادامگەرشىلىكتەن ادا قاندىقول قىلمىسكەرلەردىڭ قولىنان قازا تاپقانداردىڭ تۋعان-تۋىستارى جانە جاقىن-جۋىقتارىمەن بىرگە ازا تۇتۋدا.
مۇحتار قۇل-مۇحاممەد ماڭعىستاۋلىقتارعا مەملەكەت باسشىسىنىڭ لاڭكەستەردى زاڭنىڭ بارلىق قاتاڭ تالاپتارى بويىنشا جازالاۋدى, ال تەراكت قۇرباندارىنىڭ وتباسىلارىنا قاجەتتى كومەك پەن قولداۋ كورسەتۋدى تاپسىرعانىن جەتكىزدى.
«نۇر وتان» پارتياسى ءتوراعاسىنىڭ ءبىرىنشى ورىنباسارى ءتاۋەلسىز قازاقستاننىڭ بارلىق جەتىستىگى مەن تابىستارىنىڭ بەرىك ىرگەتاسى بەيبىتشىلىك, بىرلىك جانە تۇراقتىلىق ەكەنىنە نازار اۋداردى. بۇل قاسيەتتى قۇندىلىقتار ەلىمىزدەگى بارلىق ازاماتتار تابان تىرەيتىن نەگىز بولۋى كەرەك.
مۇحتار قۇل-مۇحاممەد پارتيالاستارىن, يمامداردى, سونداي-اق, ماڭعىستاۋ وبلىسىنىڭ عىلىمي جانە شىعارماشىل زيالى قاۋىم وكىلدەرىن ەلباسىنىڭ مالىمدەمەسىن ءوڭىردىڭ ءار تۇرعىنىنا ءتۇسىندىرۋ ءۇشىن بىرىگىپ جۇمىس ىستەۋگە شاقىردى. بۇل جۇمىستاردىڭ جەرگىلىكتى جاستارعا ەرەكشە كوڭىل بولە وتىرىپ جۇزەگە اسىرىلۋى ءتيىس ەكەنى دە ءسوز بولدى.
كەزدەسۋ بارىسىندا كورەيلەر قاۋىمداستىعىنىڭ ءتورايىمى رايسا مادەنوۆا: «ءبىز تەك بىرگە عانا كەز كەلگەن قيىندىقتى ەڭسەرە الامىز. سەبەبى, ءبىز ءبىر حالىقپىز جانە ءبىزدىڭ تاعدىرىمىز دا ءبىر. ءبىز مەملەكەت باسشىسىنىڭ ءسوزىن ءار وتباسىنا جەتكىزەمىز. ءبىز ەشكىمگە تاۋەلسىزدىگىمىزدى, ءبىرلىگىمىزدى جانە جەڭىستەرىمىزدى تاعدىر ءتالكەگىنە سالۋعا جول بەرمەيمىز», – دەدى.
ءوز كەزەگىندە, «بولاشاق» پرەزيدەنتتىك باعدارلاماسى بويىنشا ۇلىبريتانيانىڭ جەتەكشى جوو-سىندا ءبىلىم العان جاس مۇنايشى مارات سيباسوۆ تاۋەلسىز, بەيبىت جانە تۇراقتى دامىپ كەلە جاتقان ەلدە تۋىپ-وسكەن قازاقستاندىقتاردىڭ جاس بۋىنى وتانىمىزدىڭ تىنىشتىعىن باعالاپ, ونى ساقتاۋدا وزگەلەردەن كوبىرەك كۇش جۇمساۋى كەرەكتىگىن ايتتى.
جەرلەستەرىنىڭ بۇل سوزدەرىنە ماڭعىستاۋ وبلىسىنىڭ باسقا دا تۇرعىندارى قولداۋ ءبىلدىردى. سونداي-اق, كاسپي مەملەكەتتىك تەحنولوگيا جانە ينجينيرينگ ۋنيۆەرسيتەتىنىڭ رەكتورى ادىلبەك بوتابەكوۆ پەن وبلىستىق قوعامدىق كەڭەستىڭ توراعاسى ساعىن قرىمقۇلوۆ تا اتالعان تاقىرىپتا ءسوز سويلەدى.
«ەگەمەن-اقپارات»