بۇگىن, 10 ماۋسىم كۇنى فرانتسيادا فۋتبولدان ەۋروپا چەمپيوناتى باستالادى. ول سەن-دەنيدىڭ «ستاد دە فرانس» ستاديونىندا فرانتسيا – رۋمىنيا قۇرامالارى اراسىنداعى ماتچپەن اشىلادى.
وسىعان وراي Euronews ءبىر توپ ساراپشىنىڭ چەمپيونات پەن ونىڭ فاۆوريتتەرى تۋرالى پىكىرلەرىن سۇراعان ەكەن. باسىلىمنىڭ ريمدەگى ءتىلشىسى چينتسيا ريتستسي (يتاليا) بۇعان قاتىستى اڭگىمەنى بىلاي باستايدى:
«ستارتتىق ىسقىرىقتىڭ ەستىلۋىنە ساناۋلى ساعاتتار قالدى. ءبىز وسىعان وراي وعان قاتىسۋشى كوماندالاردىڭ ءوز ماماندارىمىزدىڭ تانىستىرۋلارىنا مۇمكىندىك بەرەمىز. مەن قازىر يتاليادا تۇرعاندىقتان, اۋەلگى ءسوزى يتاليا قۇراماسىنان باستاپ كورەيىك.
جاسىراتىنى جوق, انتونيو كونتەنىڭ شاكىرتتەرى چەمپيوناتتاعى فاۆوريتتەردىڭ قاتارىنان سانالمايدى. بۇل شىنىندا دا سولاي. كوماندا قۇرامىندا جارتىلاي قورعاۋشىلار ۆەرراتتي مەن ماركيزيونىڭ بولماۋى – يتالياندار ءۇشىن ايتارلىقتاي شىعىن. سونداي-اق بۋففوندى الايىقشى. قۇرامدا «ءناپوليدىڭ» فورۆاردى لورەنتسو ينسينە سەكىلدى جاس پەرىلەر بار. كوماندا ءۇشىن كيەۆتەگى «ەۋرو-2012» فينالدا جەڭىلىپ قالۋ وسى جولى ناعىز العا ۇمتىلۋعا سەبەپ بولۋى ءتيىس. داۆيد ترەزەگەنىڭ «التىن گولى» ءۇشىن فرانتسيانىڭ ءوز الاڭىندا قارىمتا قايتارۋ اققايناردان سوراپتاۋعا جاقسى سەبەپ بولار ەدى. ەندى كەزەكتى ءوز ارىپتەستەرىمە بەرەمىن. ال ولار نە ايتار ەكەن, تىڭداپ كورەيىك».
ۆەنسان مەنار, فرانتسيا:
«مەن ايتسام, «بەنزەما-ۆالبۋەن» اراسىنداعى جانجالعا, دەشامعا قارسى راسيزم ايىبى تاڭىلىپ جاتقانىنا قاراماستان, جاراقاتتارعا, اسىرەسە, قورعانىس شەبىندەگى شەتىنەۋلەرگە قاراماستار, «ۇشتۇستىلەر» «ەۋرونى» ۇتا الار ەدى. بىرىنشىدەن, كوماندانىڭ دىڭگەگىن ەۋروپانىڭ جەتەكشى كوماندالارىندا ويناپ جۇرگەن لوريس, ماتيۋيدي نەمەسە گريزمانن سەكىلدى ويىنشىلار قۇرايدى. ەكىنشى, بۇدان دا ماڭىزدىسى, 1984 جىلى پلاتيني كومانداسى تريۋمف جاساعانداي نەمەسە 1998 جىلى زيدان مەن ونىڭ دوستارى جەڭىسكە جەتكەندەي, بۇل جولى دا فرانتسۋزدار ءوز الاڭىندا چەمپيونات قابىلداپ جاتىر. قۇداي ايتقانداي, «قۇداي ۇشتىكتى جاقسى كورەدى».
دجو اللەن, انگليا:
«ورتا جاسى 25-تەگى انگليا قۇراماسى «ەۋروعا» ءوزىنىڭ تاريحىنداعى ەڭ جاس كوماندانى اكەلدى. بۇل – دەلە اللي, دجەيمي ۆاردي مەن گارري كەيىن سىندى جارقىراعان جاس تالانتتاردى جانىنا تارتقان, ال ۋەين رۋني مەن دجەيمس ميلنەر باي تاجىريبەلەرىمەن ولاردى كۇشەيتە تۇسەتىن ديناميكالى, تاباندى دا شابۋىلعا قاتتى دەن قوياتىن كوماندا. ول 50 جىل بويى ءىرى جۇلدەلەردەن قاعىلىپ كەلگەن كوماندانى جەڭىسكە جەتەلەر الار ما ەدى؟ وندا شىندىقتىڭ بەتىنە تۋرا قارايىق: بيىل «لەستەر» انگليا پرەمەر-ليگاسىندا چەمپيون اتانىپ, ءبارىنىڭ دە مۇمكىن ەكەنىن كورسەتىپ بەردى. ەندەشە, نەگە بولماسقا؟!»
الەكسەي دوۆال, رەسەي:
«ءبارى – ءبىرى ءۇشىن, ءبىرى – ءبارى ءۇشىن؟». بۇل – رەسەي قۇراماسىنىڭ «ەۋرو-2016»-داعى رەسمي ۇرانى. لەونيد سلۋتسكيدىڭ كومانداسى قۇرامىندا الەمدىك دەڭگەيدەگى جۇلدىزدار جوق, بىراق ول ۇجىمشىل ۇيىمشىلدىعىمەن كۇشتى. قيىن ساتتەردە وسى كومەككە كەلەدى. ءتۋرنيردىڭ الدىندا رەسەيلىكتەر الاڭ ورتاسىنداعى ەكى ماڭىزدى ويىنشىسى – دزاگوەۆ پەن دەنيسوۆتەن ايرىلىپ قالدى. سوندىقتان ءبىرىنشى ماتچتا كوماندا قۇرامىنىڭ قانداي بولماعى مۇلدەم تۇسىنىكسىز. رەسەيلىك جانكۇيەرلەر كوماندانىڭ پلەي-وفف كەزەڭىنە شىعاۋ جەتىستىك دەپ ەسەپتەيدى. بىراق رەسەي قۇراماسىنىڭ فرانتسيادا سيۋپريز جاساپ, ودان دا قاتتى تاڭ قالدىراتىنىنا ۇمىتتەنىپ وتىر».
ۆيكتور سامماين, گەرمانيا:
«ەندى بۇل چەمپيوناتتىڭ «باستى» كومانداسى – گەرمانيا تۋرالى ايتايىق. وسى كەزگە دەيىن نەمىستەر ءۇش رەت «ەۋرونى» ۇتتى. بىراق ءبىر عانا كومانداعا بۇرىنعى اتاعىن ساقتاپ قالۋدىڭ ورايى كەلدى. ونى سوڭعى ەكى چەمپيوناتتا يسپانيا جاسادى. ءبىز سول ەكى چەمپيوناتتىڭ فينالىندا يسپانداردىڭ قالاي جەڭىسكە جەتكەندەرىن جاقسى ەستە ساقتاپ قالدىق. بىزگە 2008 جىلعى فينال وتە اۋىر ءتيدى. ال گەرمانيانىڭ سوڭعى جەڭىسىن ەشكىم دە ەستە ساقتاپ قالعان جوق. سەبەبى, ودان بەرى كوپ ۋاقىت ءوتىپ كەتتى. 1996 جىلدان بەرى دە 20 جىل ارتتا قالدى. قازىر 4 دۇركىن چەمپيون اتانىپ جاتساق, ءتىپتى كەرەمەت بولار ەدى!».
دەنيس كۋليك, ۋكراينا:
«ۋكراينا ەۋروپا چەمپيوناتى فينالدىق كەزەڭىنىڭ جاڭا كومانداسى بولىپ سانالمايدى, بىراق شەۆچەنكو مەن ونىڭ جاساعى سوڭعى «ەۋروعا» چەمپيوناتتى وتكىزۋشى ەلدەردىڭ ءبىرى رەتىندە ىرىكتەۋ تۋرنيرىنەن ءوتىپ جاتپاي-اق وعان بىردەن قاتىستى. بۇل جولى ميحايل فومەنكونىڭ كومانداسى ەۋروپا كۇشتىلەرىنىڭ قاتارىنداعى ورنىن ىرىكتەۋ جارىستارىنىڭ شايقاستارىندا, اقىرعى پلي-وففتا جەڭىپ الدى. سوندىقتان ۋكراينا قۇراماسىن چەمپيوناتتىڭ ءفاۆوريتى قاتارىنان قوسپاساق تا, ول فرانتسيادا فۋتبول جانكۇيەرلەرىنىڭ ىستىق ىقىلاسىنا بولەنىپ, كونوپليانكا مەن يارمولەنكودان باسقا دا جاقسى ويىنشىلارى بار ەكەنىن تانىتا الار ەدى».
پاۋلا ۆيللاپلانا, يسپانيا:
يسپانيا سوڭعى رەت برازيليادا وتكەن الەم كۋبوگى تۋرنيرىندە وتە ناشار ونەر كورسەتكەننەن كەيىن فرانتسياعا بۇل كوماندانىڭ ءالى دە ايتار ءسوزى بار ەكەنىن تانىتۋ ءۇشىن كەلىپ وتىر. ەندى «قىزىل فۋريا» ساپىندا بۇرىن كوپ نارسەنى ىستەپ كەلگەن حاۆي, پۋيول, سانتي كاسورلا سەكىلدى ويىنشىلار بولمايدى. بىراق موراتا مەن نوليتو سەكىلدى ءوز شەبەرىكتەرىن كورسەتۋگە اسىعىپ جۇرگەن جاس ويىنشىلار بار. بۇدان باسقا, يسپانيانىڭ قاتارىنان ءۇشىنشى رەت قۇرلىق چەمپيوندىعىن ۇتىپ الۋ سياقتى تاريحي جەتىستىككە جەتۋ ءۇشىن بارىن سالاتىنىن دا ۇمىتپاساق كەرەك».
فاتيح يەتيم, تۇركيا:
«تۇركيا ادەتتەگىدەي «ەۋرونىڭ» بيلەتىن ەڭ سوڭعى ساتتە الا الدى. ول 2012 جىلعى چەمپيون يسپانيامەن, سونداي-اق حورۆاتيامەن جانە چەحيامەن «ولىمگە باس تىككەندەر» توبىندا كەزدەسەدى. جارىس جولىن جالعاستىرۋ ءۇشىن تۇرىكتەرگە جارقىراپ ويناۋ كەرەك. ارينە, فاتيح تەريمنىڭ ويىنشىلارى ءتۋرنيردىڭ فاۆوريتتەرى قاتارىنا كىرمەيدى, بىراق مۇندا سيۋرپريز جاساۋعا بارىنشا قۇلشىنىپ وتىر».
برۋنو سوۋزا, پورتۋگاليا:
«سوڭعى 20 جىلدا پورتۋگاليا ەۋروپا چەمپيوناتىنىڭ كەمىندە شيرەك فينالىنا ۇدايى شىعىپ كەلدى. وسى جولى دا ودان وسىنى كۇتۋ قيسىندى بولادى. بۇل كوماندا وتە تاجىريبەلى. اسىرەسە, قورعانىستا. سونىمەن بىرگە «تىڭ كۇشتەر» دە بار. ولار – جواۋ ماريۋ, اندرە گومەش جانە رەناتو سانچەس سەكىلدى ەندى جانعان جۇلدىزدار. ال شابۋىلداعى بارلىق سالماق كريشتيانۋ ءرونالدۋدىڭ يىعىنا تۇسەدى. ەگەر ونىڭ دەنساۋلىعى دۇرىس بولىپ, بار كۇشىمەن ويناي السا, پورتۋگاليا ەڭ جوعارى ورىندار ءۇشىن تالاسا الار ەدى».
گابور كيسس, ۆەنگريا:
«بۇل – ۆەنگرلەردىڭ سوڭعى كوپتەگەن ۇرپاقتارى ءۇشىن ەۋروپادا ءوز كومانداسىنا جانكۇيەرلىك جاساعالى تۇرعان ءبىرىنشى چەمپيوناتى. بۇرىن مۇنداي باقىتقا ءبىزدىڭ اتالارىمىز كوبىرەك يە بولدى. ۆەنگريانىڭ سوڭعى رەت «ەۋروعا» بارعانىنا قازىر 44 جىل ءوتىپتى. 1972 جىلى ۆەنگرلەر 4 ورىن الدى. قازىر فرانتسياعا بارعانىمىزدىڭ ءوزىن تابىس كورىپ وتىرمىز. دەگەنمەن, جانكۇيەرلەر ءوز كومانداسىنىڭ ءۇش ماتچپەن عانا شەكتەلىپ قالماسىنا سەنگىلەرى كەلەدى. ياعني 1/8 فينالعا بارۋىن ارماندايمىز. توپتا ول اۆستريا, يسلانديا جانە پورتۋگاليا كوماندالارىمەن وينايدى».
رۋسلان يگىلىك.
فوتو: Euronews.