«شابۋىلدى ۇرەي شاقىرۋ ءۇشىن جاساعان»
قازاقستاندا تەررورلىق قاۋىپتىڭ «سارى» دەڭگەيى جاريالاندى. اقتوبە قالاسىنداعى اسكەري بولىمگە قارۋلى شابۋىل جاسالدى. ساياساتتانۋشى يگور شاتروۆ اقتوبەدەگى جاعدايدى قوزدىرۋشى ەلەمەنتتەردىڭ ەلدەگى احۋالدى تۇراقسىزداندىرۋعا باعىتتالعان ارەكەتى دەپ باعالايدى.
«ساياساتتانۋشى, رەسەي ۇلتتىق قازىرگى زامانعى يدەولوگيانى دامىتۋ ينستيتۋتى ديرەكتورىنىڭ ورىنباسارى يگور شاتروۆ Sputnik راديوسىنىڭ ەفيرىندە اقتوبەدەگى جاعدايدى رەسپۋبليكاداعى احۋالدى تۇراقسىزداندىرۋعا ارەكەت ەتۋدىڭ جالعاسى دەگەن پىكىر ءبىلدىردى. «ارنايى قىزمەت ورگاندارى مەن رەسپۋبليكا باسشىلىعىنا مەملەكەتتىك توڭكەرىس جاساۋعا ازىرلىك ءجۇرىپ جاتقانى تۋرالى ءبىرازدان بەلگىلى بولدى. بىراق ونىڭ اۆتورلارى جەرگىلىكتى تۇرعىندار اراسىنان قولداۋ تاپقان جوق, ەلدىڭ باسشىلىعى سوعان دەيىن وتە سالماقتى ساياسي قادامدار جاساپ ۇلگەردى. اتاپ ايتقاندا, قازاقستاندى بىرىكتىرەتىن جاڭا يدەياعا, پرەزيدەنت نۇرسۇلتان نازارباەۆتى قولداۋعا باعىتتالىپ, مەرزىمىنەن بۇرىن وتكىزىلگەن پارلامەنت سايلاۋى بۇل ميسسيانى تابىستى اتقارىپ شىقتى. ءبىز مۇنى قازىر قوزدىرۋشى ەلەمەنتتەردىڭ قوعامعا تۇراقسىزدىق اكەلۋگە تىرىسقان ارەكەتتەرى ارقىلى اقتوبەدەن كورىپ وتىرمىز», دەيدى يگور شاتروۆ», – دەپ اتاپ كورسەتەدى اگەنتتىك.
«ونىڭ پىكىرىنشە, بۇل اكتسيالاردىڭ ءبارىنىڭ ارتىندا بەلگىلى ءبىر تاپسىرىسشىلار تۇر», – دەپ قورىتادى ءتىلشى ءسوزىن.
«ورىنبور جەرىندە پوليتسيا جۇمىسى كۇشەيتىلدى»
ورىنبور وبلىسىندا كۇشتىك قۇرىلىمدار جوعارى دايىندىق رەجىمىندە جۇمىس جاساپ جاتىر. باسىلىمنىڭ اتاپ وتۋىنشە, وسىلايشا قازاقستانمەن شەكتەسەتىن بىرنەشە اۋداندا پوليتسيا بولىمدەرىنىڭ عيماراتتارى كۇشتى كۇزەتكە الىنعان. پاترۋل جاساقتارى قارۋ-جاراق ساتاتىن دۇكەندەر بار اۋدانداردى ۇدايى تورۋىلداپ ءجۇر. قاۋىپتىڭ بولۋ ىقتيمالدىلىعى جونىندە جەكە كۇزەت كاسىپورىندارى مەن پوشتا بولىمشەلەرىنە ەسكەرتىلگەن, دەپ جازادى RIA56 پورتالى.
ورىنبور وبلىسى ىشكى ىستەر مينيسترلىگى باسقارماسىنىڭ باستىعى ميحايل داۆىدوۆ وبلىس تۇرعىندارىن الاڭداماۋعا شاقىردى. ونىڭ ايتۋىنشا, ورىنبور جەرىنىڭ تەرريتورياسى تۇگەل باقىلاۋدا تۇر.
پورتال, سونىمەن بىرگە, قازاقستاننىڭ اقتوبە قالاسىنداعى احۋالدىڭ ءالى قاۋىپتىلىكتىڭ «قىزىل» دەڭگەيىندە تۇرعانىنا قاراماستان, تولىق باقىلاۋعا الىنعانىن, ونداعى كۇشتىك قۇرىلىمداردىڭ قىراعىلىقپەن جۇمىس جاساپ جاتقانىن باياندايدى.
«قازاقستان انتيتەررورلىق وپەراتسيا وتكىزدى»
بەلارۋستىڭ باستى اقپارات اگەنتتىگى قازاقستاننىڭ باتىس وڭىرىندە 6 ماۋسىم كۇنى ورىن العان تەررورلىق وقيعا تۋرالى جازا كەلىپ, كۇشتىك قۇرىلىمدار وعان قارسى باعىتتالعان وپەراتسياسىن ءساتتى وتكىزگەنىن جەتكىزەدى.
«قۇقىق قورعاۋ ورگاندارىنا شابۋىل جاساۋشىلاردىڭ ۇشەۋىن ءولتىرىپ, بىرەۋىن جارادار ەتىپ, بىرەۋىن قولعا ءتۇسىرۋدىڭ ورايى كەلدى. بىرنەشە قىلمىسكەر قاشىپ كەتە الدى. قازىر ولاردى ۇستاۋدىڭ شارالارى جاسالىپ جاتىر. قالادا بارلىق كوڭىل كوتەرۋ مەكەمەلەرى, ساۋدا ورتالىقتارى مەن ءىرى دۇكەندەر جابىلعان, ولاردىڭ كەلۋشىلەرى سىرتقا شىعارىلعان», دەپ جازادى اگەنتتىك ءتىلشىسى.
«سودىرلار اياۋشىلىق تانىتقان جوق»
ۇلىبريتانيانىڭ بي-بي-سي راديوسى تەررورشىلاردى اۋىزدىقتاۋ بارىسىندا كۇدىكتى يسلاميست سودىرلاردىڭ قارۋ-جاراق دۇكەندەرىنە شابۋىل جاساۋ بارىسىندا التى ادامدى ولتىرگەنىن اتاپ كورسەتەدى. «پوليتسيامەن اتىس كەزىندە شابۋىل جاساۋشىلاردىڭ تورتەۋى ءولتىرىلدى, بىراق بىرقاتارى قاشىپ كەتە الدى», – دەلىنگەن حاباردا.
«قازاقستاندا يسلامشىلاردىڭ شابۋىلدارى بولا قويادى دەپ كۇتىلمەگەن ەدى. الايدا, اقتوبە – رەسەي شەكاراسىنا جاقىن ورنالاسقان قالا, وسى جەردە 2011 جىلى قازاقستاندا العاش رەت تەراكت جاسالعان بولاتىن», – دەپ جازادى بۇدان ءارى پورتال.
شەتەلدىك باسىلىمدار حابارلارى
بويىنشا دايىندالدى