اتىنا زاتى ساي ەكەنىن تانىتىپ, ەرلىكپەن قازا تاپتى
ورازا الدىنداعى ماۋسىم ايىنىڭ 5-ءى – دەمالىس كۇنى ەدى. ءدال وسى كۇنى ءتۇس اۋا مۇزداي قارۋلانعان ءبىر توپ تەررورشى اقتوبە قالاسىنداعى №6555 اسكەري بولىمگە شابۋىل جاسادى. ولاردىڭ باستى ويى وسىنداعى قارۋ-جاراق قويماسىن باسىپ الۋ بولاتىن. وسىنداي سىني ساتتە مۇنداعى ىشكى قاراۋىل قارۋلانعان قىلمىستىق توپقا تويتارىس بەرە ءبىلدى. ءسويتىپ, ەكسترەميستەردىڭ كوزدەگەن ماقساتىنا جەتۋلەرىنە جول بەرمەدى. قارۋلى قاقتىعىستار كەزىندە اتقىشتار باتالونى ساپىنداعى اسكەري قىزمەتشى بەرىكجان قاليەۆ قازا تاپتى.
كەشە قىلمىسكەرلەرگە قاسقايىپ قارسى تۇرا بىلگەن ەسىل ەردى ءوزى تۋىپ-وسكەن ورال ءوڭىرىنىڭ جۇرتشىلىعى سوڭعى ساپارعا شىعارىپ سالدى. جانىبەك اۋدانىنىڭ جاقسىباي اۋىلىندا وتكىزىلگەن قارالى ميتينگكە باتىس قازاقستان وبلىسىنىڭ اكىمى التاي كولگىنوۆ, ۇلتتىق ۇلاننىڭ «باتىس» وڭىرلىك قولباسشىلىعىنىڭ باسشىلارى جانە اقتوبەدەگى № 6555 اسكەري ءبولىمىنىڭ وكىلدەرى قاتىستى.
– بەرىكجان قاليەۆ تەررورشىلارمەن تىرەسۋ كەزىندە اتىنا زاتى ساي بەرىك جان ەكەنىن تانىتا ءبىلدى. ول ەلدىڭ تىنىشتىعى مەن تاۋەلسىزدىگىنىڭ تۇعىرلى بولا ءتۇسۋى ءۇشىن شىبىن جانىن پيدا ەتتى. ۇرپاققا ۇران بولا الاتىنداي ەرلىك كورسەتتى. وسىنداي باتىل دا باتىر ەر تاربيەلەي بىلگەن بەرىكجاننىڭ اتا-اناسىنا قايعىرىپ كوڭىل ايتامىز. ولاردىڭ الدىندا باسىمىزدى يەمىز. سىن ساعاتى تۋعان كەزدە بەرىكجان تايسالعان جوق. ونىڭ ەسىمى ەل ەسىنەن وشپەيدى, – دەدى قازاقتىڭ قايسار ءبىر ۇلىن سوڭعى ساپارعا شىعارىپ سالۋ ءراسىمى كەزىندە ا.كولگىنوۆ.
سودان سوڭ ءوڭىر باسشىسى وبلىستىق اكىمدىك اتىنان قارالى وتباسىنا ماتەريالدىق كومەك رەتىندە قوماقتى كونۆەرت ۇسىندى. بۇدان كەيىن ءسوز العان ۇلتتىق ۇلاننىڭ اقتوبە قالاسىنداعى №6555 اسكەري ءبولىمى باستىعىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى باقبەرگەن انەشەۆ شايقاس كەزىندە مەرت بولعان بەرىكجان قاليەۆتى مەملەكەتتىك ماراپاتقا ۇسىنعاندارىن ايتتى. سونىمەن بىرگە, جانىبەك اۋدانىنىڭ اكىمى ناۋرىزباي قاراعويشين ەرلىكپەن كوز جۇمعان باتىر جەرلەسىنىڭ ەسىمىن ءوزى تۋىپ-وسكەن اۋىلدىڭ ءبىر كوشەسىنە بەرۋ جونىندە وكىلەتتى ورگاندارعا ءتيىستى ۇسىنىستارمەن شىعاتىندارىن جەتكىزدى.
تەمىر قۇسايىن,
«ەگەمەن قازاقستان»
باتىس قازاقستان وبلىسى,
جانىبەك اۋدانى,