ەلباسى نۇرسۇلتان نازارباەۆ ۇلتتىق قاۋىپسىزدىك كوميتەتىنىڭ توراعاسى ۆلاديمير جۇماقانوۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا ۆ.جۇماقانوۆ مەملەكەت باسشىسىنا اقتوبە وبلىسىنداعى انتيتەررورلىق وپەراتسيانىڭ وسى كەزەڭگە دەيىنگى ناتيجەلەرى تۋرالى باياندادى.
ۇلتتىق قاۋىپسىزدىك كوميتەتىنىڭ توراعاسى قازىرگى ۋاقىتقا دەيىن 13 قىلمىسكەردىڭ كوزى جويىلىپ, 14-ءى جارالانعانىن ايتتى. بۇدان بولەك, دايىندىق كەزەڭىندە قىلمىسقا قاتىسۋدان 20 ادام باس تارتقان, ولار انىقتالىپ, جاۋاپ الىندى. قازىرگى كەزدە 6 ادام ىزدەستىرىلۋدە, قولدا بار اقپارات بويىنشا, ولار اقتوبە وبلىسىنىڭ اۋماعىندا ءجۇر.
قازاقستان پرەزيدەنتى اقتوبە وبلىسىنداعى تەرروريستىك ارەكەتتەرگە قاتىسى بار ادامداردى ۇستاپ, تۇتقىنداۋ جۇمىستارىن ءتيىمدى تۇردە جۇرگىزۋ قاجەتتىگىن اتاپ ءوتتى.
– ءبىز ولاردىڭ سول وڭىردە ەكەنىن ءبىلەمىز, جەكە باستارىنا قاتىستى ءمالىمەتتەر بەلگىلى, حالىققا ەسكەرتىلدى. قىلمىسكەرلەردىڭ ءبارىن تۇگەل تۇتقىنداۋ قاجەت. قارۋلى قارسىلىق كورسەتكەن جاعدايدا كوزدەرىن جويۋ كەرەك. بارلىعى ەڭ قاتال جازاعا تارتىلۋعا ءتيىس, – دەدى نۇرسۇلتان نازارباەۆ.
قازاقستان رەسپۋبليكاسى سىرتقى ىستەر مينيسترلىگىنىڭ ىستانبۇلداعى تەرروريستىك اكتىگە بايلانىستى مالىمدەمەسى
قازاقستان 2016 جىلعى 7 ماۋسىمدا ىستانبۇل قالاسىندا ورىن الىپ, كوپتەگەن ادامدار قۇربان بولعان تەرروريستىك اكتىنى ءۇزىلدى-كەسىلدى ايىپتايدى.
قازاقستان باۋىرلاس تۇرىك حالقىنا جانە قازا بولعانداردىڭ وتباسىلارىنا كوڭىل ايتادى.
بارشا مۇسىلمان ءۇشىن قاسيەتتى رامازان ايىندا جاسالعان تەراكت تەرروريستەردىڭ پاسىقتىعى مەن قاتىگەزدىگىن كورسەتىپ, ولاردىڭ يسلامعا ەشقانداي قاتىسى جوقتىعىن راستادى.
قازاقستان تەرروريزمنىڭ ورشۋىنە دەگەن ءوزىنىڭ الاڭداۋشىلىعىن ءبىلدىرىپ, الەمدىك قوعامداستىقتىڭ وسى ز ۇلىمدىقتى جويۋ ءۇشىن ءتيىمدى ۇجىمدىق كۇش جۇمىلدىرۋىن قۇپتايدى. قازاقستان تەرروريزم قاۋىپسىزدىكتىڭ جاھاندىق اۋقىمداعى قاۋىپ-قاتەرى ەكەنىنە سەنىمدى.
حالىقارالىق قۇقىق قاعيداتتارىنا جانە بۇۇ قاۋىپسىزدىك كەڭەسىنىڭ ءتيىستى قارارلارىن نەگىزگە الا وتىرىپ, قازاقستان بۇۇ اياسىندا الەمنىڭ بارشا مەملەكەتتەرىن تەرروريزم مەن ەكسترەميزمنىڭ تارالۋىنا قارسى كۇش بىرىكتىرۋگە شاقىرادى.