كەشە ەرەۆاندا ۇقشۇ-عا مۇشە مەملەكەتتەر قاۋىپسىزدىك كەڭەستەرى حاتشىلارى كوميتەتىنىڭ كەزەكتى ءماجىلىسى بولىپ ءوتتى. وعان قازاقستان رەسپۋبليكاسى قاۋىپسىزدىك كەڭەسى حاتشىسىنىڭ ءبىرىنشى ورىنباسارى مارات شايحۋتدينوۆ قاتىستى.
بۇل جولعى ءماجىلىس ءۇستىمىزدەگى جىلدىڭ كۇزىندە ۇقشۇ-عا مۇشە ەلدەر مەملەكەت باسشىلارىنىڭ قاتىسۋىمەن وتەتىن ۇجىمدىق قاۋىپسىزدىك كەڭەسىنىڭ كەزەكتى سەسسياسىنا دايىندىق كەزەڭدەرىنىڭ ءبىرى بولدى.
شاراعا قاتىسۋشىلار 2015 جىلدىڭ 21 جەلتوقسانىندا ماسكەۋدە ۇجىمدىق قاۋىپسىزدىك كەڭەسى تاراپىنان بەرىلگەن تاپسىرمالاردىڭ ورىندالۋ بارىسىن قاراستىردى.
ۇقشۇ-نىڭ 2025 جىلعا دەيىنگى كەزەڭگە ارنالعان ۇجىمدىق قاۋىپسىزدىك ستراتەگياسىنىڭ جوباسى بويىنشا پىكىر الماسۋلار ءوتتى.
دەلەگاتسيالار باسشىلارى, سونداي-اق, حالىقارالىق تەرروريزم مەن ءدىني ەكسترەميزمگە قارسى بىرلەسىپ ءىس-قيمىل تانىتۋ ماسەلەلەرىن, جەدەل جاۋاپ بەرەتىن ۇجىمدىق كۇشتەردى ءارى قاراي دامىتۋدى قوسا العاندا, ۇقشۇ-عا مۇشە ەلدەردىڭ اسكەري ىنتىماقتاستىعىنىڭ جەكەلەگەن باعىتتارىن تالقىلادى.
ءماجىلىس قورىتىندىسى بويىنشا قاۋىپسىزدىك كەڭەستەرىنىڭ حاتشىلارى ۇقشۇ-عا مۇشە مەملەكەتتەر جاۋاپتى ورگاندارىنىڭ ءوزارا ءىس-قيمىلىن جەتىلدىرۋگە باعىتتالعان ءبىرقاتار شەشىمدەرگە قول قويدى.
دەلەگاتسيالار باسشىلارى ارمەنيا رەسپۋبليكاسىنىڭ پرەزيدەنتى س.سارگسياننىڭ قابىلداۋىندا بولدى.
«ەگەمەن-اقپارات»