افيشاسىز تەاتر

«تەاتر كيىم ىلگىشتەن باستالادى» دەگەن ءسوز بار. ءاسىلى, تەاتر افيشادان باستالادى. افيشادان الدىمەن ساحنالاناتىن سپەكتاكلدەردىڭ ۋاقىتى, مازمۇنى ءھام اۆتورلارىمەن تانىساسىز. كەي ادامدار تراگەديا, كومەديا دەپ جانر تاڭداپ كەلەدى. كەي كورەرمەن اتى مەن زاتىنا قانىق رەجيسسەرىن ىزدەيدى. پەسا اۆتورىنىڭ قالام قۋاتىنا, قولتاڭباسىنا دەن قوياتىن جاندار بار. باستى رولدەگى سۇيىكتى ءارتىستىڭ ورنى بولەك. بارلىعى افيشانى قاجەت ەتەدى. ال افيشاسىز تەاتر كوردىڭىز بە؟ الەمدە قانشاسى بار ەكەنىنە كوزىمىز جەتپەيدى, بىراق شىعىس قازاقستان وبلىستىق دراما تەاترى افيشاسىز جۇمىس ىستەپ كەلەدى... ەرتىستىڭ ەركە سامالى ەسكەن سول جاعالاۋدان بىلتىر بوي كوتەرگەن جاڭا تەاتر عيماراتى – ايدىك, اسەم. تەاتردىڭ اسەمدىگى سىرتقى پىشىمىندە عانا ما, تەاتردىڭ اسەرلىلىگى دە كەرەك. اسەردى بولىسەتىن كورەرمەن قوشەمەتىمەن تەاتر اسەمدەنە, سۇلۋلانا تۇسپەي مە! اشىلۋ سالتاناتىنا ەلباسى قاتىسقان مادەنيەت ورداسى ءوڭىر ونەرىنە وزگەشە ءورىس سىيلادى. دەسە دە تەاترعا ءتان ءبىر نارسە جەتىسپەيدى. ءارى ويلاپ, بەرى ويلاپ قاراساق, بۇل افيشا ەكەن. الماتىداعى م.اۋەزوۆ اتىنداعى «اكەمتەاتردىڭ», م.لەرمونتوۆ اتىنداعى ورىس دراما تەاترىنىڭ جانىنان ءوتىپ بارا جاتقاندا سىرتىنان قويىلىمداردىڭ قاي كۇنى قويىلاتىنىن كورىپ بىلە الاسىز. عابيت مۇسىرەپوۆ اتىنداعى جاستار تەاترىنىڭ باعدارلاماسى دا كوشە جيەگىندە مەنمۇندالاپ تۇرادى. وسكەمەندە شە؟.. رەسپۋبليكاداعى ەڭ جاڭا, سىڭعىرلاعان تەاتردىڭ اۋلاسى اتشاپتىرىم. قوس قاناتى كەڭ. الدى – اشىق. تەاتر قاسىنان شاھاردىڭ ەرتىستىڭ قوس جاعالاۋىنداعى بولىگىن جالعاستىرىپ جاتقان ساتباەۆ داڭعىلى وتەدى. كولىك اعىنى تولاستامايتىن وسى داڭعىلدىڭ بويىنداعى قولايلى ورىندى تەاتر اكىمشىلىگى ءتيىمدى پايدالانۋىنا بولار ەدى. ياعني, عيماراتتىڭ قوس قاپتالىنا, الدە داڭعىلدىڭ جيەگىنە تاياۋ الىپ افيشالار قويۋعا, سول ارقىلى قازاق جانە ورىس ترۋپپالارىنا, جاستار تەاترىنا دا كورەرمەن جيناۋعا بولار ەدى. بۇل كۇندە كوڭىلىن عالامتور جاۋلاعان كورەرمەندى تەاترعا تارتۋ قيىن. بىراق, افيشا – تەاتردىڭ ءداستۇرلى اتريبۋتتارىنىڭ ءبىرى. كوپتەگەن افيشالاردىڭ ارحيۆ ءۇشىن دە ماڭىزى ەرەكشە بولاتىنى تاريحتان ماعلۇم. زامان باسقا, لەپ باسقا. تەاتردىڭ سايتتاعى مەكەنجايى, ونلاين-افيشاسى بار. الايدا, تەاتر اۋلاسىنداعى افيشانىڭ ءجونى بولەك. كورەرمەنسىز – ساحنا جەتىم. كوشەدە, كوز الدىڭىزداعى الىپ افيشالار تەاتر ءۇشىن دە, قالا تۇرعىندارى ءۇشىن دە كەرەكتى اقپاراتتىق-مادەني دۇنيە. جاڭا ماۋسىمدا وسى وي-تىلەك ەسكەرىلەر دەگەن ويدامىز. دۋمان اناش, «ەگەمەن قازاقستان» وسكەمەن