كورنەكتى اقىن, حالىقارالىق «الاش» ادەبي سىيلىعىنىڭ لاۋرەاتى, قازاقستاننىڭ ەڭبەك سىڭىرگەن قايراتكەرى, ماحامبەت سىيلىعىنىڭ يەگەرى, كوپتەگەن جىر ءمۇشايرالارىنىڭ جەڭىمپازى سەرىك تۇرعىنبەك ۇلىنىڭ 70 جاسقا تولعان مەرەيتويى قوستاناي قالاسىندا كەڭ كولەمدە, جوعارى دەڭگەيدە ءوتتى.
قالاداعى ءىلياس وماروۆ اتىنداعى وبلىستىق مۋزىكالىق دراما تەاترىندا وتكەن بۇل كەشتە كورەرمەن قاۋىم الدىمەن, عيماراتتىڭ الاڭىنا ورنالاسقان ادەبي كورمەنى اينالىپ وتە المادى. وندا اقىننىڭ ءار جىلدارى شىققان كىتاپتارى مەن جىر جيناقتارى جۇيەلى ورنالاسىپتى. قالامداس اعالارىنىڭ, زامانداستارىنىڭ اق تىلەك لەبىزدەرى تايعا تاڭبا باسقانداي تىزبەكتەلىپ تۇر. وندا اقىن-جازۋشىلار – سىرباي ماۋلەنوۆ, عافۋ قايىربەكوۆ, ءسابيت دوسانوۆتىڭ ءىنى جايلى ىزگى لەبىزدەرى جازىلعان. سونداي-اق, بەلگىلى ادەبيەتشىلەر – سەرىك قيراباەۆ, ءابىش كەكىلباەۆ, اقسەلەۋ سەيدىمبەكتىڭ وي-ءپىكىرلەرى دە ورايىمەن كوزگە ءتۇستى. اقىننىڭ شىعارماشىلىعى مەن ءومىر جولىن باياندايتىن فوتو-كورمە دە كورەرمەندەردى قىزىقتىرا ءبىلدى.
سالتاناتتى كەشتى وبلىس اكىمىنىڭ ورىنباسارى مارات جۇندىباەۆ اشىپ: – ءسىز تورعايدا تۋىپ, توپ جارعان بار قازاققا ورتاق تۇلعاسىز. بۇكىل سانالى عۇمىرىڭىزدى ۇلتتىق ادەبيەتىمىزگە ارنادىڭىز. وزىندىك ءسوز ساپتاۋىڭىزدىڭ سىرتىندا, شەشەندىگىڭىزبەن, ولەڭ-سوزدەگى كوسەمدىگىڭىزبەن قازاقتىڭ كورنەكتى اقىندارىنىڭ بەل ورتاسىنان بەرىك ورىن الدىڭىز, – دەگەن سوزىنە كورەرمەن كوپشىلىك قۋانا قول سوقتى. سونداي-اق, سەرىك اقىندى ءماسكەۋدەن ارنايى قۇتتىقتاي كەلگەن رەسەيدەگى «قازاق ءتىلى» قوعامى توراعاسىنىڭ ورىنباسارى, تيميريازەۆ اتىنداعى ۋنيۆەرسيتەت پروفەسسورى, رەسەي جۋرناليستەر وداعىنىڭ مۇشەسى سەرىك تويعامباەۆتىڭ لەبىزى جىلى قابىلداندى.
كەشتە سەرىك اقىننىڭ ولەڭدەرىنە جازىلعان كوپشىلىككە كەڭ تانىمال اندەر ورىندالىپ, قوستاناي تەاترىندا بىرنەشە جىلداردان بەرى ءجۇرىپ كەلە جاتقان «كەيكى باتىر» دراماسىنان ءۇزىندى كورسەتىلدى. قازاقتىڭ تۇڭعىش عارىشكەرى توقتار اۋباكىروۆتىڭ اقىنعا اق تىلەگىن ارناۋى دا ابدەن جاراسىمدى بولدى. سەرىكتىڭ قالامداستارى عۇمار احمەتشين, سەرىكباي وسپانوۆ, اقىلبەك شاياحمەتوۆ, ناعاشىباي مۇقاتوۆ اقىنعا ارنالعان لەبىز-تىلەكتەرىن ايتىپ, ارناۋ ولەڭدەرىن وقىدى. توبىلدىڭ تولقىنىندا تەربەتىلگەن اقىن جىرلارىنا ءان جازعان كومپوزيتورلار باقىتجان ساۋەكەنوۆ, قاليبەك دەرىپسالدين ءان شاشۋ ارنادى. وبلىس اقساقالدارى اتىنان قالانىڭ قادىرمەندى قاريالارى جانداربەك سەيىتوۆ, تارعىن ادەنوۆ, ىبىراش ەستاەۆ سىندى ارداگەرلەر اق باتاسىن بەرىپ, اقىنعا اق جول تىلەدى.
سوڭىنان سەرىك تۇرعىنبەك ۇلىن وبلىس اكىمى ارحيمەد مۇحامبەتوۆ قابىلداپ, ارقالى اقىنعا شىعارماشىلىق تابىستار تىلەدى. سىي-سياپات ۇسىندى.
قابىلاحات سەيداحمەتوۆ
قوستاناي