ماۋسىم ايىنىڭ العاشقى كۇنى باستالعان «استانا كەشتەرى» حالىقارالىق فەستيۆالى مارەگە جەتتى. وسىمەن ءتورتىنشى مارتە ۇيىمداستىرىلعان ىزگىلىكتى شاراعا تالانتتارىمەن توپ جارعان الەمنىڭ تاڭداۋلى ونەرپازدارى قاتىستى.
الەمدىك دەڭگەيدەگى فەستيۆال
ايتۋلى ونەر فەستيۆالى 2012 جىلى ەلوردانىڭ تۋعان كۇنىنە تارتۋ رەتىندە تۇساۋى كەسىلگەن ەدى. ۇيىمداستىرۋشىسى – «دەگدار» گۋمانيتارلىق قورى مەن «JTI» كومپانياسى. دالىرەك ايتقاندا, «دەگدار» قورىنىڭ قامقورلىق كەڭەسىن باسقارۋشى د.نازارباەۆانىڭ باستاماسىمەن دۇنيەگە كەلگەن جوبا. ءان الەمىندە ايشىقتى قولتاڭباسى بار داريعا نۇرسۇلتانقىزىنىڭ ءوزى دە فەستيۆال كونتسەرتتەرىندە بىرنەشە رەت ونەر كورسەتكەن. الەمدىك دەڭگەيدەگى فەستيۆالدىڭ تىزگىنىن العاشقى جىلدارى ايگىلى مۋزىكاتانۋشى, تەلەجۇرگىزۋشى, رەسەي حالىق ءارتىسى سۆياتوسلاۆ بەلزا ۇستاعان. كوركەمدىگى جوعارى كونتسەرتكە ەلباسى دا ەكى رەت كورەرمەن رەتىندە قاتىسقان.
بۇگىنگى تاڭعا دەيىن اتالعان فەستيۆالدا سايدىڭ تاسىنداي تالاي ساحنا ساڭلاقتارى كوپشىلىك كوزايىمىنا اينالدى. ولاردىڭ ەسىمدەرىن تىزبەلەسەك, ۇزاققا كەتەمىز. ءارى اتاقتارىمەن ءدۇيىم ەلدى اۋزىنا قاراتقان دۇلدۇلدەردى بولە-جارعىمىز كەلمەدى. وسى ءتورت جىل ىشىندە باس قالامىزدا فەستيۆال اياسىندا 14 كونتسەرت وتكەن. وعان 600-دەن استام ءارتىستەر اتسالىسقان. ولاردىڭ ونەرىن 20 مىڭنان استام كورەرمەن تاماشالاعان. وسىدان-اق ورەلى ونەر دوداسىنىڭ كوركەمدىك كوكجيەگى مەن اسقاق ابىرويىن بايقاۋعا بولادى.
استىن سىزىپ تۇرىپ ايتا كەتەرلىگى, كونتسەرتتەردىڭ بارلىعى ەلوردانىڭ ەڭ ءبىر سالتاناتتى سارايلارىندا ءوتتى. قايىرىمدىلىق جوباسى بولعاندىقتان, بيلەتتەردىڭ بارلىعى تەگىن تاراتىلادى. سوندىقتان بولار, تىڭدارمانداردىڭ بارلىعى جاسى-كارىسىنە قاراماي, اسەم ءان مەن تاماشا ساز ورىلگەن كەشتەرگە قىزىعىپ كەلەدى. ونى ءوزىمىز دە اڭعاردىق. «استانا وپەرا» تەاترىنداعى مۋزىكا مەرەكەسىنە كەلگەن كورەرمەندەردە قيساپ بولعان جوق.
بەكزات ونەردىڭ بيىگى
جالپى, مۋزىكادان حابارى بار جۇرتشىلىق بەكزات ونەردىڭ بيىگىن كلاسسيكا دەپ باعالايدى. ءجون-اق دەيسىز. بۇگىنگىدەي جەڭىل-جەلپى اۋەندەردەن زاپىس بولعاندا, ءوزىڭىز دە ءبىر ءسات كلاسسيكالىق مۋزىكاعا قۇلاق تۇرسەڭىز, جان-دۇنيەڭىز جادىراپ سالا بەرەدى. سودان شىعار, عاسىرلار بويى قالىپتاسقان عاجايىپ ونەرگە دەگەن قۇرمەتىمىز دە ەرەكشە. وسى ورايدا يگىلىكتى شارانىڭ ۇيىمداستىرۋشىسى, ءوزى دە تالانتتى ونەرپاز قازاقستاننىڭ ەڭبەك سىڭىرگەن قايراتكەرى تيمۋر ۋرمانچەەۆكە جولىعىپ, از-كەم پىكىرىن بىلگەن ەدىك.
– بيىل ءبىزدىڭ حالىقارالىق فەستيۆالعا بەس جىل تولىپ وتىر. العاشقى مەرەيتويىمىز دەسەك بولادى. تام-تۇم بولسا دا ءوز تاريحىمىز بار. ءبىزدىڭ جوباعا ەلوردا تۇرعىندارىنىڭ ءىلتيپاتى ەرەكشە. بيىلعى فەستيۆال وتە جوعارى دەڭگەيدە ۇيىمداستىرىلۋدا. وعان الەمنىڭ ايگىلى جۇلدىزدارى قاتىسۋدا. ولاردىڭ ونەرىن جۇرتشىلىق جاقسى بىلەدى. العاشقى جىلدارى فەستيۆال اياسىندا ءبىز كورەرمەندەرگە ءۇش كونتسەرت وتكىزىپ جۇردىك. بيىل بەس باعدارلاما ۇسىندىق. ول ءبىر اپتاعا ۇلاستى. ءاربىر كونتسەرت انشلاگپەن ءوتىپ جاتىر. وعان ءبىز قاتتى قۋانىشتىمىز. بۇل ونەرپازدارعا شابىت, كوتەرىڭكى كوڭىل كۇي سىيلايدى. راسىن ايتار بولساق, حالىقارالىق شارانىڭ جىلدان-جىلعا قاناتى قاتايىپ كەلەدى. وسى جوبانى تىكەلەي قولداپ وتىرعان «دەگدار» گۋمانيتارلىق قورىنا ۇلكەن العىس ايتامىز. اتالعان قوردىڭ قامقورلىعى ارقاسىندا ونەرلى ورەندەر شەتەلدەردە ءبىلىم الىپ, تاجىريبەلەرىن شىڭداۋدا. ماسەلەن, بەلگىلى وپەرا ءانشىسى مەدەت شوتاباەۆ يتاليادا ءبىلىم الدى. وسىنداي-وسىنداي اتقارىلىپ جاتقان ىزگى ىستەر كوپ. كلاسسيكالىق مۋزىكاعا قويىلاتىن تالاپ قاشاندا جوعارى. سوندىقتان, ءبىزدىڭ كونتسەرتكە قاتىساتىنداردىڭ بارلىعى ءوز ونەرلەرىمەن ورگە ءجۇزگەن جامپوزدار دەسەك تە بولادى, – دەيدى فەستيۆالدىڭ كوركەمدىك جەتەكشىسى. تيمۋر – شەبەر پيانيست جانە كوپشىلىككە كەڭ تانىلىپ قالعان وتاندىق «FORTE-TRIO» توبىنىڭ جەتەكشىسى. حالىقارالىق ونەر فەستيۆالىنىڭ شىمىلدىعى 1 ماۋسىمدا استاناداعى قازاق ۇلتتىق ونەر ۋنيۆەرسيتەتىنىڭ ورگان زالىنداعى «كامەرالىق مۋزىكا» كەشى دە اتالعان توپتىڭ ونەرىمەن اشىلدى. ولارمەن بىرگە مەملەكەتتىك كامەرالىق وركەسترىنىڭ «سوليستەر اكادەمياسى» توبىنىڭ ونەرپازدارى دا قاتىستى. تالانتتى توپ مۇشەلەرى اسا كورنەكتى كومپوزيتورلاردىڭ كلاسسيكالىق شىعارمالارىن ورىنداپ, كورەرمەندەرگە ادەمى اسەر سىيلادى.
تالايلاردى تامساندىرعان تارلاندار
ءۇشىنشى ماۋسىمدا «استانا وپەرا» تەاترىندا وتكەن «كلاسسيكالىق مۋزىكا» كەشىنە رەسەيدىڭ ايگىلى ءارتىسى, پيانيست, پ.چايكوۆسكي اتىنداعى IX بايقاۋدىڭ جەڭىمپازى بوريس بەرەزوۆسكي قاتىستى. ون ساۋساعىنان سيقىرلى ساز ساۋلاعان دارىندى ءپيانيستىڭ ەسىمى دۇنيە جۇزىنە جاقسى تانىس. ول الەمدەگى ەڭ ۇزدىك وركەسترلەرمەن جانە ديريجەرلەرمەن جۇمىس ىستەيتىن بىرەگەي ءدۇلدۇل سانالادى. 2006 جىلدان بەرى ماسكەۋدە, ەكاتەرينبۋرگتە جانە ۆلاديميردە ءوتىپ كەلە جاتقان ن.مەتنەر اتىنداعى حالىقارالىق فەستيۆالدىڭ كوركەمدىك جەتەكشىسى. وسىنداي سان الۋان جۇمىستى اتقارىپ جۇرسە دە جۇيرىكتىگىنەن تانباعان تالانتتى تۇلعانىڭ شەبەرلىگى ەشكىمدى بەي-جاي قالدىرمادى. امەريكالىق فيليپپ كۆينتتىڭ اتاعى دا جەر جارىپ تۇر. ول اقش سكريپكاشىلارىنىڭ العاشقى ۇشتىگىنە كىرەدى. ماسكەۋدە اندرەي كورساكوۆتىڭ, سودان سوڭ امەريكانىڭ دجۋليارد مەكتەبىندە وقىعان. 2001 جىلى العاشقى البومىن جازىپ, «گرەممي» اتىنداعى سىيلىقتى يەلەنگەن. 2010 جىلدىڭ تامىز ايىنان فيليپپ كۆينت چيكاگودا ستراديۆاري قوعامى بەرگەن «رۋبي» سكريپكاسىندا وينايدى. سيقىرلى ساز توگەتىن سكريپكانىڭ ۇنىنە ەلتىمەگەن جان جوق.
جەكسەنبى كۇنى دە ءدال وسى تەاتردا «وپەرالىق مۋزىكا» كەشىنىڭ بايراعى جەلبىرەدى. وعان رەسەيلىك سوپرانو داۋىستى ءانشىلەر, وسەتيانىڭ حالىق ءارتىسى ۆەرونيكا دجيوەۆا مەن ماسكەۋ ۇلكەن تەاترىنىڭ ءسوليسى اننا اگلاتوۆا قاتىستى. رەسەيلىك باريتون ۆاسيلي لاديۋك بارىن سالىپ باقتى. قازاقستاننىڭ ەڭبەك سىڭىرگەن قايراتكەرى مەدەت شوتاباەۆ تا تىڭدارمانداردى ءتانتى ەتە ءبىلدى. بۇدان كەيىن فەستيۆال قازاق ۇلتتىق ونەر ۋنيۆەرسيتەتىنىڭ ورگان زالىندا جالعاستى. وعان گەرمانيادان ارنايى ات ارىتىپ كەلگەن, ەۋروپا ورگانيستەرىنىڭ ىشىندەگى كوشباسشىسى دەپ تانىلعان كريستيان فون بلون مەن رەسەيلىك «موسكوۆسكايا وپەراتتا» تەاترىنىڭ باس ديريجەرى كونستانتين حۆاتىنەتس قاتىستى. كەشە فەستيۆال شىمىلدىعى بەيبىتشىلىك جانە كەلىسىم سارايىندا «ەتنو-دجاز» كەشىمەن جابىلدى. وندا ازەربايجاننان كەلگەن «Jangi» توبى مەن قازاقستاندىق «Magic of Nomads» ەتنو-فيۋجن توبى شابىت شالقىتتى.
ازامات قۇسايىن