قازىر الماتى سياقتى ۇلكەن مەگاپوليستىڭ باستى ماسەلەسىنىڭ ءبىرى – تازالىق. قالانى قوقىستان ءبىرجولاتا ارىلتۋعا الدىمەن الماتىلىقتاردىڭ وزدەرى عانا سەپتەسە الادى. الايدا مۇددەلى ماقسات ءالى دە تولىق ىسكە اسپاي تۇر. ونىڭ ۇستىنە, پاتەر يەلەرى كووپەراتيۆىنىڭ قىزمەتى ءتىپتى سىن كوتەرمەيتىندىگىن وتكەن اپتادا قالا اكىمى باۋىرجان بايبەك تە قاتاڭ سىناعان بولاتىن.
دەگەنمەن, قالانىڭ تازالىق ماسەلەسىنە قولۇشىن سوزىپ, ارنايى اكتسيالار ۇيىمداستىرىپ, قوعامدىق سانانى وزگەرتۋگە كۇش سالىپ جۇرگەن كومپانيالار دا بار. ماسەلەن قوماقتى جۇلدە قورى بار «ەڭ ۇزدىك اۋلا سىپىرۋشى» جىل سايىنعى بايقاۋى «ەفەس قازاقستان» شس» اق دەمەۋشىلىك ەتۋىمەن جانە «ناعىز الماتىشا» قوعامدىق قورى تاراپىنان قولعا الىنعان-دى. بۇرناعى جىلى «ەڭ ۇزدىك اۋلا سىپىرۋشى» باستاماسىنا جۋرناليستەر مەن بلوگەرلەر تارتىلعان ەدى. ەندى, مىنە, 2 ماۋسىمدا الماتىدا «ەپتى اۋلا سىپىرۋشى» شەبەرلىك ساباعى ءوتىپ, وعان باق وكىلدەرىنەن بولەك, الماتى قالاسى ءماسليحات دەپۋتاتتارى كونستانتين اۆەرشين, قانات توسەكباەۆ, ماحامبەت حاسەنوۆ «ەپتى اۋلا سىپىرۋشى» بايقاۋىنا قاتىستى.
اۋلالاردى تازا ۇستاپ, قابىرعالار مەن جول جيەكتەرىن سىرلاۋ, گۇلزارلار مەن كوك شالعىندى تەگىستەپ قىرقۋدى وزىنە مىندەت ەتىپ العان جاندارعا ارنالعان بۇل بايقاۋ وسىمەن ءتورتىنشى جىل قاتارىنان وتكىزىلىپ كەلەدى. وسىلايشا بايقاۋ ارقاسىندا مەگاپوليس تۇرعىندارى كۇندە قالانى تازالىقتا ۇستاپ جۇرگەن ادامدارمەن تانىسىپ, اۋلا سىپىرۋشىلارعا ولاردىڭ اۋىر جۇمىسى ءۇشىن العىس بىلدىرۋگە مۇمكىندىك الىپ وتىر.
سونىمەن, بيىل دا 15 ماۋسىمعا دەيىن الماتىنىڭ ەڭ ۇزدىك اۋلا سىپىرۋشىسى دەگەن جۇزدەگەن وتىنىمدەر جينالىپ, ۇمىتكەرلەر 15 تامىزعا دەيىن سوزىلاتىن ەكىنشى داۋىس بەرۋ كەزەڭىنە وتەدى. دەمەك, قالانىڭ ءاربىر تۇرعىنى سايت ارقىلى وسى مارتەبەگە لايىق ادامعا ءوز داۋىسىن بەرە الادى.
بيىل «ەڭ ۇزدىك اۋلا سىپىرۋشى» بايقاۋىنىڭ جۇلدە قورى 650 000 تەڭگەنى قۇراپ وتىر: ءبىرىنشى ورىنعا – 200 000 تەڭگە, ەكىنشى ورىنعا – 150 000 تەڭگە بەرىلەدى. ءۇشىنشى ورىنعا بەرىلەتىن 100 000 تەڭگەگە تەڭ سىيلىقتى ءۇش قاتىسۋشى الا الادى. سونىمەن قاتار, ءاربىر اۋداننىڭ اۋلا سىپىرۋشىلارىنا ماداقتاۋ سىيلىقتارى مەن ديپلومدار تابىستالماق.
– جوبا قازاقستاننىڭ ەڭ ءىرى مەگاپوليسىندەگى تۇرعىنداردىڭ ءومىر ءسۇرۋ ساپاسىن جاقسارتۋعا باعىتتالعان. سوندىقتان ءبىز كومپانيامىزدىڭ كورپوراتيۆتىك-الەۋمەتتىك جاۋاپكەرشىلىگى اياسىندا جوبانى قولداپ وتىرمىز. ال الماتىلىقتار وعان بۇرىنعىسىنشا بەلسەندى اتسالىسادى دەپ ۇمىتتەنەمىز, – دەيدى «ەفەس قازاقستان» شك» اق كورپوراتيۆتىك قاتىناستار دەپارتامەنتىنىڭ ديرەكتورى شىڭعىس قاسكەەۆ.
ايناش ەسالي,
«ەگەمەن قازاقستان»
الماتى