قازاقستان رەسپۋبليكاسىنىڭ گرەك رەسپۋبليكاسىنداعى ەلشىلىگى احارنون قالاسىندا وتكەن ءىرى گۇل جارمەڭكەسىنە قاتىستى. بۇل قالا الەمدىك ماڭىزى بار تاريحي جانە ساۋلەت ەسكەرتكىشتەرىمەن ەرەكشەلەنەدى, بۇعان قوسا, 150 000 قالا تۇرعىنىنىڭ باسىم بولىگىن ىدىراعان كەڭەس وداعىنىڭ وكىلدەرى, ولاردىڭ اراسىندا بۇرىنعى قازاقستاندىقتار دا بار, قۇرايدى.
جارمەڭكە قوناقتارى قاتارىندا گرەكيا قورشاعان ورتانى قورعاۋ جانە ەنەرگەتيكا ءمينيسترىنىڭ ورىنباسارى ي.تسيرونيس, احارنون قالاسىنىڭ ءميتروپوليتى پ.فيليپپۋ, گرەكيا پارلامەنتىنىڭ دەپۋتاتتارى, كورشىلەس قالالار مەن ايماقتار باسشىلارى بولدى.
احارنون قالاسىنىڭ باسشىسى يا.كاسساۆوس قۇتتىقتاۋ سوزىندە ۇستىمىزدەگى جىلى وڭتۇستىك قازاقستاندا (شىمكەنت جانە تۇركىستان قالالارى) ساپارمەن بولعانىن ايتا كەلىپ, احارنون تۇرعىندارى وزدەرىنىڭ ەكىنشى وتاندارىمەن تىعىز بايلانىستا ەكەنىن اتاپ ءوتتى. 2008 جىلدان باستاپ احارنون مەن شىمكەنت باۋىرلاس قالالار اتاندى. بۇگىنگى تاڭدا اتالعان ەكى قالا اراسىندا ەكىجاقتى ىنتىماقتاستىق پەن سەرىكتەستىك دامۋ ۇستىندە.
قازاقستان رەسپۋبليكاسىنىڭ گرەك رەسپۋبليكاسىنداعى ەلشىسى ا.ۆولكوۆ قۇتتىقتاۋ سوزىندە مەملەكەتىمىز بيىل ۇلكەن تاريحي وقيعا – ءوز تاۋەلسىزدىگىنىڭ 25 جىلدىعىن اتاپ وتەتىنىن ايتتى. رەسپۋبليكامىز اتالعان ارالىقتا تۇراقتى جانە مىقتى مەملەكەت, دامىعان ەكونوميكاسى مەن جاھاندا نىق ۇستانىمى بار ايماقتىق دەرجاۆاعا اينالعانىنا دا توقتالدى. قازاقستاندا ۇلتارالىق جانە دىنارالىق كەلىسىمنىڭ تۇراقتى جۇيەسى قالىپتاسقانىن, 10 000-نان استام گرەك دياسپوراسى كىرەتىن قازاقستان حالقى اسسامبلەياسىنىڭ ۇلتارالىق تاتۋلىق باعىتىندا ۇلكەن جۇمىستار اتقارىپ كەلە جاتقانىن اتاپ ءوتتى.
ا.ۆولكوۆ گرەك حالقىنا قازاقستان رەسپۋبليكاسىنداعى ەكونوميكالىق, ساياسي, بەيبىتشىلىك, دىنارالىق جانە ۇلتارالىق كەلىسىمدى دامىتۋعا قوسقان ۇلەسى ءۇشىن العىس ءبىلدىردى. بۇعان قوسا, جينالعان قاۋىم قازاقستاننىڭ تاريحي قىسقا مەرزىم – تاۋەلسىزدىك جىلدارىندا قول جەتكىزگەن تابىستارىمەن تانىستىرىلدى.
احارنون قالاسىنىڭ باسشىلىعى مەن قازاقستاندىق ديپلوماتتاردىڭ اتسالىسۋىمەن ۇيىمداستىرىلعان ءىس-شارادا ەلىمىزدە تاۋەلسىزدىك مەرەيتويىنا قىزۋ دايىندىق جۇمىستارى جۇرگىزىلىپ جاتقانى جايلى اقپاراتقا تۇرعىندار زور قىزىعۋشىلىق تانىتتى. ءىس-شارا احارنون قالاسى مۋنيتسيپاليتەتى فيلارمونيالىق وركەسترىنىڭ كونتسەرتىمەن جالعاستى. ءبىر ايتا كەتەرلىگى – وركەستر قۇرامىندا بۇرىنعى وتانداستارىمىز دا ونەر كورسەتتى.
«ەگەمەن-اقپارات»