وتكەن دەمالىس كۇندەرى اقتوبەدە ورىن العان لاڭكەستىك جانە قاندى وقيعالاردان كەيىن 6 ماۋسىمدا ەكى جوعارى وقۋ ورنىندا وتكىزىلۋگە ءتيىستى ۇلتتىق بىرىڭعاي تەستىلەۋ 7 ماۋسىمعا اۋىستىرىلعان بولاتىن. بۇل بالالاردىڭ قاۋىپسىزدىگىن قامتاماسىز ەتۋ ماقساتىندا جاسالعان قادام ەدى.
ال قازاقستان رەسپۋبليكاسى ۇكىمەتىنىڭ وسى دۇيسەنبىدەگى وتىرىسىندا پرەمەر-مينيستر كارىم ءماسىموۆ ءبىلىم جانە عىلىم ءمينيسترى ەرلان ساعاديەۆكە اقتوبە قالاسىنداعى تەستىلەۋدى جەكە باقىلاۋىنا الۋ جونىندە تاپسىرما بەرگەن بولاتىن.
كەشە مينيستر ە.ساعاديەۆ تاڭەرتەڭ ساعات 8.00-دە ق.جۇبانوۆ اتىنداعى اقتوبە مەملەكەتتىك ۋنيۆەرسيتەتىندە بولىپ, تەستىلەۋگە دايىندىق بارىسىمەن تانىستى. ال ساعات 8.40-تا تەستىلەۋ وتەتىن ەكىنشى ورىن – س.بايىشەۆ اتىنداعى اقتوبە ۋنيۆەرسيتەتىندە بولدى. ساعات 9.00-دە سىناق تاپسىرۋشىلار تەستىلەۋدى باستادى.
– مەن پرەمەر-ءمينيستردىڭ تىكەلەي تاپسىرماسىنا سايكەس بۇگىنگى تەستىلەۋدى باقىلاۋ ءۇشىن ارنايى كەلىپ وتىرمىن. بالالار دايىن. ۇلتتىق بىرىڭعاي تەستىلەۋ پۋنكتتەرى دە دايىن. تاڭەرتەڭنەن باستاپ دۇرىستاپ تەكسەرىلدى. ەشقانداي قاۋىپ-قاتەر جوق, – دەدى ءبىلىم جانە عىلىم ءمينيسترى باق وكىلدەرىنە بەرگەن سۇحباتىندا.
ايتا كەتۋ كەرەك, ەكى جوعارى وقۋ ورنىندا دا مەكتەپ بىتىرۋشىلەردىڭ قاۋىپسىزدىگىن قامتاماسىز ەتۋ جانە تۇلەكتەردىڭ الاڭسىز سىناق تاپسىرۋى ءۇشىن بارلىق ءىس-شارالار الدىن الا ويداعىداي جۇرگىزىلدى.
بۇل كۇنى وبلىس ورتالىعىنداعى 24 مەكتەپتىڭ 900-دەن استام تۇلەكتەرى باقتارىن سىنادى. تەستىلەۋ كەزىندە ورتالىق ماماندارى عانا ەمەس, قۇقىق قورعاۋ ورگاندارىنىڭ قىزمەتكەرلەرى دە كۇشەيتىلگەن تارتىپتە جۇمىس ىستەگەنىن ايتۋ ءلازىم. وسىنىڭ ناتيجەسىندە, ەكى تەستىلەۋ ورتالىعىندا دا سىناق تاپسىرۋ بارىسىندا ەشقانداي الاڭداتارلىق جاعداي بولعان جوق.
جالپى, بيىل اقتوبە وبلىسى بويىنشا 6,5 مىڭنان استام تۇلەك مەكتەپ ءبىتىردى. ولاردىڭ 74 پايىزى ۇلتتىق بىرىڭعاي تەستىلەۋگە ءوتىنىش بەرگەن. وتكەن ءۇش كۇن ىشىندە سولاردىڭ 5000-عا جۋىعى سىناق تاپسىردى. ولار نەگىزىنەن اۋدان مەكتەپتەرىنىڭ تۇلەكتەرى.
ساتىبالدى ءساۋىرباي,
«ەگەمەن قازاقستان»
اقتوبە