كەشە بىشكەكتە قازاقستان پرەمەر-ءمينيسترى كارىم ءماسىموۆ تمد ۇكىمەتتەرى باسشىلارى كەڭەسىنىڭ كەزەكتى وتىرىسىنا قاتىستى.
وتىرىس قاتىسۋشىلارى ساۋدا-ەكونوميكالىق, ەنەرگەتيكا, دەنساۋلىق ساقتاۋ جانە ءبىلىم بەرۋ سالالارىنداعى ينتەگراتسيالىق ءوزارا ءىس-قيمىلدى دامىتۋعا ارنالعان ماسەلەلەردىڭ كەڭ اۋقىمىن تالقىلادى. اتاپ ايتقاندا, بىرجاقتى پىشىمدەگى وتىرىستا دەلەگاتسيا باسشىلارى تمد ورگاندارىنىڭ 2016 جىلعا ارنالعان بىرىڭعاي بيۋدجەتىنە وزگەرىستەر ەنگىزۋ تۋرالى ماسەلەنى قارادى, دەپ مالىمدەدى اتقارۋشى كوميتەتتىڭ توراعاسى –تمد اتقارۋشى حاتشىسى سەرگەي لەبەدەۆ كەڭەيتىلگەن قۇرامداعى وتىرىس بارىسىندا. كۇن تارتىبىنەن تىس تمد اتقارۋشى كوميتەتىنىڭ تمد ەلدەرى مەملەكەت باسشىلارى كەڭەسىنىڭ قازاقستان رەسپۋبليكاسىنىڭ 2015 جىلعى 16 قازانداعى ۇسىنىستارى تۋرالى حاتتاما شەشىمىن جۇزەگە اسىرۋ بارىسى جايلى مالىمەتى تىڭدالدى.
«وسى ماسەلە اياسىندا تمد قىزمەتىن جەتىلدىرۋ تۋرالى وتكىر جانە كونسترۋكتيۆتى پىكىر الماسۋ ءوتتى جانە كەڭەسكە تمد ەلدەرىنىڭ تۇراقتى وكىلەتتى وكىلدەرىنە, ەكونوميكالىق ماسەلەلەر جونىندەگى كوميسسياعا جانە تمد اتقارۋشى كوميتەتىنە بىرجاقتى پىشىمدە وتكەن وتىرىس بارىسىندا ايتىلعان بارلىق ەسكەرتۋلەردى, پايىمداۋلار مەن پىكىرلەردى ەسكەرتۋدى تاپسىراتىن حاتتاما شەشىمى قابىلداندى», – دەدى س.لەبەدەۆ. سونداي-اق, ول بۇل ماسەلە بيىلعى جىلدىڭ 16 قىركۇيەگىندە بىشكەكتە تمد مەملەكەت باسشىلارى كەڭەسىندە قارالاتىنىن ايتتى. كەڭەستە دوستاستىق ەلدەرىنىڭ ءتۇرلى سالاداعى ىنتىماقتاستىعىن ودان ءارى كەڭەيتۋ جانە تەرەڭدەتۋگە باعىتتالعان جيىرمادان استام قۇجات جوبالارى قارالدى. تمد ۇبك-ءنىڭ كەلەسى وتىرىسى 2016 جىلعى 28 قازاندا مينسكىدە وتەتىن بولدى, دەپ حابارلادى قازاقستان پرەمەر-ءمينيسترىنىڭ ءباسپاسوز قىزمەتى.