جاقىندا «مەديكەر» كومپانياسى مەن «استانا ەكسپو-2017» ۇلتتىق كومپانياسى» اق اراسىندا ورتاق سەرىكتەستىك جونىندەگى مەموراندۋمعا قول قويىلىپ, «مەديكەر» كومپانياسى ەكسپو-2017 حالىقارالىق كورمەسىنىڭ وپەراتورى ءارى سەرىكتەسى اتاندى.
جاسالعان كەلىسىم اياسىندا «مەديكەر» جشس ءوزى سالاتىن ينۆەستيتسياسىنىڭ باسىم ءبولىگىن كورمە الاڭىندا اشىلاتىن مەديتسينالىق ورتالىقتار مەن 6 مەديتسينالىق پۋنكتتىڭ تالاپقا ساي جابدىقتالۋىنا باعىتتاماق. «ءبىزدىڭ كومپانيامىز ءۇشىن ەكسپو-2017 كورمەسىنىڭ مەديتسينالىق سەرىكتەسى اتانۋ – زور قۇرمەت. بۇل بىزگە دەگەن سەنىمنىڭ جوعارى دەڭگەيدە ەكەنىن كورسەتەدى. وسى رەتتە ۇلكەن جاۋاپكەرشىلىكتى ارقالاپ وتىرعانىمىز دا بەلگىلى. دەگەنمەن, ءوزىمىزدىڭ جاعىمىزدان قول قويىلعان مەموراندۋمنىڭ بارلىق تارماقتارىن ساپالى ءارى ۋاقتىلى ورىندايتىنىمىزعا كەپىلدىك بەرەمىز», – دەدى «مەديكەر» كومپانياسىنىڭ باسقارما ءتورايىمى گۇلجان سادىرباەۆا قول قويۋ راسىمىنەن كەيىن سويلەگەن سوزىندە.
ەكسپو-2017 كورمەسىندە حالىقارالىق ستاندارتتار بويىنشا ارنايى وقىتىلعان ماماندار – دارىگەرلەر, ۇيلەستىرۋشىلەر مەن باسقا دا مەديتسينالىق قىزمەتكەرلەر جۇمىس اتقاراتىن بولادى. كورمەنىڭ اشىلۋىنا دەيىن ولار كورمەنىڭ حالىقارالىق قاتىسۋشىلارى ءۇشىن مەديتسينالىق قىزمەت كورسەتۋگە جانە ەكسپو-2017 كورمەسىنىڭ بارلىق كەلۋشىلەرى ءۇشىن شۇعىل, جەدەل جانە باسقا دا مەديتسينالىق كومەكتەر كورسەتۋگە تولىقتاي دايىن بولماق.
«استانا ەكسپو-2017» ۇلتتىق كومپانياسى» اق-تىڭ باسقارما توراعاسى احمەتجان ەسىموۆ بولسا, حالىقارالىق قاتىسۋشىلارمەن قاتار, كورمەگە قاتىسۋشىلارعا كورسەتىلەتىن مەديتسينالىق قىزمەتتى جاڭا تەحنولوگيالاردى قولدانا وتىرىپ بارىنشا ساپالى ءارى ناتيجەلى دەڭگەيگە قويۋ كەرەك ەكەنىن اتاپ كورسەتتى.
«قازاقستانداعى ءىرى دە تانىمال مەديتسينالىق كومپانيانىڭ «استانا ەكسپو-2017» سىندى اۋقىمدى ءىس-شاراعا قاتىسۋعا دايىن ەكەنى ءبىز ءۇشىن وتە ماڭىزدى. «مەديكەر» جشس-ءنىڭ قازاقستان بويىنشا كەڭ كولەمدە تارالعان مەديتسينالىق قىزمەت جۇيەسى بار. ارينە, «مەديكەر» كومپانياسىنىڭ مەديتسينالىق قىزمەت كورسەتۋدەگى تاجىريبەسى قازاقستان ءۇشىن ماڭىزى جوعارى ءىس-شارانى وتكىزۋگە سەپتىگىن تيگىزبەك», – دەپ اتاپ ءوتتى احمەتجان ەسىموۆ.
وسى ورايدا ەسكە سالار بولساق, «مەديكەر» جشس مەديتسينالىق قىزمەتتەر نارىعىندا 15 جىلدان استام قىزمەت ەتىپ كەلەدى. «مەديكەر» – بۇل قازاقستان رەسپۋبليكاسىنىڭ بارلىق ايماعىندا ءوز كليەنتتەرىنە جوعارى كاسىبي نەگىزدەگى مەديتسينالىق قىزمەت كورسەتۋدى ۇسىناتىن قازاقستانداعى ەڭ سەنىمدى ءىرى كومپانيا. «مەديكەردىڭ» باستى ماقساتى ۇلتتىق جانە حالىقارالىق ساپا, ەكولوگيا, قاۋىپسىزدىك جانە ەڭبەكتى قورعاۋ ستاندارتتارىنا ساي مەديتسينالىق قىزمەت كورسەتۋ بولىپ تابىلادى. «مەديكەر» كومپانياسى «بولاشاقتىڭ ەنەرگياسى» اتتى ەكسپو-2017 حالىقارالىق مامانداندىرىلعان كورمەسىن تولىقتاي قولدايدى, سوندىقتان ءوز جۇمىسىن ەكولوگيانىڭ جوعارى ستاندارتتارىن ۇستانۋ ارقىلى جانە قورشاعان ورتاعا زياندى اسەرىن تيگىزبەي ەنەرگيانى ۇنەمدەۋ ساياساتىنا ساي جۇرگىزىپ وتىر.
ۇلان سانجار