مانشۇك مامەتوۆانىڭ پۋلەمەتى

تۋعان جەرى – ورال قالاسىنا جەتكىزىلدى باتىس قازاقستان وبلىستىق م.مامەتوۆا اتىنداعى مەموريالدىق مۋزەيدىڭ قىزمەتكەرلەرى شىعىستىڭ ەكى شىنارىنىڭ ءبىرى – كەڭەس وداعىنىڭ باتىرى مانشۇك مامەتوۆانىڭ سوڭعى دەمى تاۋسىلىپ, ماڭگىلىككە دامىلداپ قالعان نەۆەل جەرىنەن ۇلكەن ولجامەن ورالدى. ولار قاھارمان قىزدىڭ, باتىر جەرلەستەرىنىڭ جاۋدى جوساداي قىرعان داڭقتى پۋلەمەتىن سول جاقتان ارقالاپ اكەلدى. بۇل باستاماشىل توپتى كەرەمەت ەنتۋزياست, مۋزەيدىڭ باسشىسى سۆەتلانا بەكتەنوۆانىڭ ءوزى باستاپ بارعان. كوپتەن بە­رى ۇلى وتان سوعىسى تۋرالى ما­تەريالدار جيناقتاپ, ونى ءتۇ­بىرلەي زەرتتەپ كەلە جات­قان ول وسى ساپار مانشۇكتىڭ پۋ­لە­مەت بولشەكتەرىن قۋانا-قۋا­نا الىپ جەتكەن. باتىر تۋعان توپىراققا جەتكىزىلگەن قا­رۋدىڭ ۇڭ­عىسى مەن قال­قانى مەن باس­قا دا ۇساق-تۇيەك ءبول­شەكتەرى جاقسى ساقتالىپتى. – ەرلىك­پەن قازا تاپ­قان قايسار قىزدىڭ كوپ زاتى قازىر مۋزەيدە تۇر. بىراق بۇل جولعى جادىگەردىڭ ءجونى بولەك, – دەي­دى مۋزەي ماماندارى. – ءبىزدىڭ مۋزەيىمىز ءۇشىن بۇل وراسان زور ءمانى بار ۇلكەن جاڭالىق بولىپ وتىر. شىن مانىندە سەنساتسيا وسىنداي-اق بولار. مانشۇك مۋزەيىنە مانشۇكتىڭ پۋلەمەتى كەلدى. بۇدان ارتىق نە كەرەك. ءۇش ۇيىقتاساق تۇسىمىزگە كىرمەگەن بۇل وقيعا جۇرتتىڭ ءبارىن كەرەمەت سەرپىلتتى. ءبىز باتىردىڭ جان سەرىگى بولعان قاسيەتتى قارۋىن نەۆەل قالاسىنان تاپتىق. وسىندا ارنايى كەزدەسكەن «گۆوزديكا» پاتريوتتىق جاساعى ونى قولىمىزعا بەردى. مەن وتە ريزامىن, – دەدى سۆەتلانا بەكتەنوۆا. تەمىر قۇسايىن, «ەگەمەن قازاقستان» ورال