سۋرەت: gov.kz
كانادا تاراپى data-centric (دەرەكتەرگە باعدارلانۋ) مودەلى بويىنشا دامىپ, ءۇش نەگىزگى ۆەرتيكالعا بولىنگەن ءوزىنىڭ تسيفرلىق ەكوجۇيەسىنىڭ قۇرىلىمىن ۇسىندى, ولار – وسىمدىك شارۋاشىلىعى, مال شارۋاشىلىعى جانە تۇتىنۋ تاۋارلارى. كومپانيانىڭ باعدارلامالىق جاساقتاماسى مەن جاساندى ينتەللەكتىگە نەگىزدەلگەن شەشىمدەرى بۇگىندە الەمنىڭ 60 ەلىندە شامامەن 101 ملن گەكتار ەگىستىك القابىن قامتيدى جانە اگرونومدار مەن الەمدەگى ەڭ ءىرى ازىق-ت ۇلىك برەندتەرىنە تەحنولوگيالىق قولداۋ كورسەتەدى.
كەلىسسوزدەر بارىسىندا سەرىك جۇمانعارين وتاندىق اوك الدىندا ءداستۇرلى ەكستەنسيۆتى ادىستەردەن زاماناۋي قارقىندى تەحنولوگياعا كوشۋدىڭ ستراتەگيالىق مىندەتى تۇرعانىن اتاپ ءوتتى.
«بۇگىندە ىشكى نارىقتا جانە ىرگەلەس مەملەكەتتەردىڭ نارىعىندا ەت پەن مال شارۋاشىلىعى ونىمىنە سۇرانىس قارقىندى ءوسىپ وتىر. بۇل جاعدايدا ءبىز ءوندىرىس كولەمى مەن تيىمدىلىگىن ساپالى تۇردە ارتتىرۋىمىز كەرەك. ءبىزدىڭ ميسسيامىز – قازاقستانعا جەتەكشى حالىقارالىق تەحنولوگيالىق چەمپيونداردى تارتۋ جانە ولاردىڭ تاجىريبەسىن تىكەلەي وندىرىستە توعىستىرۋ», دەدى س.جۇمانعارين.
كانادالىق ينۆەستورلار اقمولا وبلىسى مەن كانادانىڭ البەرتا پروۆينتسياسىنىڭ كليماتتىق جاعدايىنىڭ ۇقساستىعىن اتاپ ءوتىپ, بۇل سىناقتان وتكەن تسيفرلىق حاتتامالاردى ءتيىمدى تۇردە بەيىمدەۋگە مۇمكىندىك بەرەتىنىنە نازار اۋداردى. TELUS Agriculture باسشىلىعى اقمولا وبلىسىندا توپىراقتىڭ قۇنارلىلىعىن باقىلاۋ, وسىمدىكتەردى قورعاۋ جانە داقىلداردى ءدال ىرىكتەۋ ءۇشىن جي جانە مامانداندىرىلعان باعدارلامالىق قاناتقاقتى جوبانى ىسكە قوسۋعا دايىن ەكەندىگىن ءبىلدىردى.
كەزدەسۋ قورىتىندىسى بويىنشا تاراپتار اۋىل شارۋاشىلىعى مينيسترلىگىمەن بىرلەسىپ اقمولا وبلىسىنداعى قاناتقاقتى جوبانى ەگجەي-تەگجەيلى پىسىقتاۋ تۋرالى ۋاعدالاستى.
