كۇلاش قۇنانتايقىزى – قازاق ايەلدەرىنىڭ اراسىنان شىققان العاشقى پەداگوگيكا عىلىمدارىنىڭ دوكتورى. ۇلتتىق عىلىم اكادەمياسىنىڭ اكادەميگى. بىرقاتار لاۋازىمدى قىزمەت اتقارعان. قازاق كسر جوعارى جانە ورتا ءبىلىم ءمينيسترىنىڭ ورىنباسارى بولدى. اسىرەسە قۇنانتايقىزىنىڭ باسقارۋ قابىلەتى مەن ۇيىمداستىرۋشىلىق شەبەرلىگى قازاق قىزدار پەداگوگيكالىق ينستيتۋىنىڭ رەكتورى بولعان جىلدارى جارقىراپ كورىندى. ەلىمىزدەگى بىرەگەي ءبىلىم ورداسىنىڭ ماتەريالدىق-تەحنيكالىق بازاسىن نىعايتۋعا كۇش سالدى. ونىڭ باسشىلىعىمەن جاڭا وقۋ كورپۋسى بوي كوتەرىپ, ستۋدەنتتەر جاتاقحاناسى سالىندى. ينستيتۋت قىزمەتكەرلەرىنە كوپپاتەرلى ءۇي تۇرعىزىلدى. قىسقاسى, قازاق قىزدارىنىڭ الاڭسىز ءبىلىم الۋىنا تولىق جاعداي جاسادى. ءبىر جاعىنان, عالىم باسشىلىق قىزمەتتە ءجۇرىپ, عىلىمنان دا قول ۇزبەدى. قانشاما شاكىرت تاربيەلەدى. ول كىسىنىڭ جەتەكشىلىگىمەن 4 عىلىم دوكتورى مەن 20-دان استام عىلىم كانديداتى دايارلاندى.
اتالعان عىلىمي كونفەرەنتسيادا ايتۋلى اكادەميكتىڭ عىلىمي-پەداگوگيكالىق مۇراسىمەن بىرگە زاماناۋي ءبىلىم جۇيەسىندە ءتيىمدى وقىتۋ ادىستەرىن قولدانۋعا باعىت بەرۋ ماسەلەلەرى قوزعالدى. سونداي-اق عىلىم قايراتكەرىنىڭ پەداگوگيكالىق يدەيالارى مەن عىلىمي تۇجىرىمدارىنىڭ بۇگىنگى ءبىلىم سالاسىنداعى ماڭىزىنا دا ءمان بەرىلدى.
كونفەرەنتسياعا ەلىمىزدەگى جەتەكشى جوعارى وقۋ ورىندارىنىڭ عالىمدارى ونلاين قاتىستى. ايتالىق, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ پروفەسسورى ءامينا ءامىروۆا, قازاق ۇلتتىق قىزدار پەداگوگيكالىق ۋنيۆەرسيتەتىنىڭ پروفەسسورى ءمارياش مۇقاشەۆا, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى پەريزات سەيىتقازى اكادەميكتىڭ عىلىمي ەڭبەكتەرى مەن پەداگوگيكا عىلىمىنداعى ورنى تۋرالى مازمۇندى بايانداما جاسادى. وندا عالىمنىڭ زەرتتەۋلەرى قازاق پەداگوگيكاسىنىڭ دامۋى-نا تىڭ سەرپىن بەرگەنى اتاپ ءوتىلدى. اسىرەسە اكادەميك كۇلاش قۇنانتايقىزىنىڭ مەكتەپ ۇيىمدارىنىڭ قالىپتاسۋى مەن تاربيە جۇيەسىنىڭ ەۆوليۋتسياسى جونىندەگى ەڭبەكتەرى بۇگىنگە دەيىن قۇندى دەرەككوز ەكەنى ايتىلدى. جيىن اياسىندا «cross-training» الاڭى ۇيىمداستىرىلدى. مۇندا ءپان مۇعالىمدەرى زاماناۋي وقىتۋ ادىستەرى مەن تسيفرلىق تەحنولوگيالاردى ءبىلىم ۇدەرىسىنە ەنگىزۋ جانە وقۋشىلاردىڭ شىعارماشىلىق قابىلەتىن دامىتۋ جولدارى جايىندا پىكىر الماستى. بۇل الاڭدا ۇستازدار بىرلەسكەن جوبالارىن ۇسىنىپ, يننوۆاتسيالىق پەداگوگيكالىق تاسىلدەردى تالقىلادى.
كۇلاش قۇنانتايقىزىنىڭ مەرەيتويىنا ارنالعان ءىس-شارالار لەگى ۇلان اۋدانىنىڭ وزگە ءبىلىم وردالارىندا دا جالعاستى. ماسەلەن, سارسەن امانجولوۆ اتىنداعى ورتا مەكتەپتە «ۇلان – عالىمدار تۇلەتكەن كيەلى مەكەن» اتتى ارداگەر ۇستازدارمەن كەزدەسۋ ءوتتى. وعان عالىمنىڭ نەمەرە ءىنىسى ورال قۇنافين قاتىسىپ, بىرەگەي تۇلعانىڭ ادامي بولمىسى مەن قايراتكەرلىگى جايىندا اڭگىمەلەدى.
سونىمەن بىرگە مازمۇندى كەشكە جەرلەسىمىز, استانا حالىقارالىق ۋنيۆەرسيتەتىنىڭ رەكتورى انار مىرزاعاليەۆا, پەداگوگيكا عىلىمدارىنىڭ كانديداتى, پروفەسسور نۇرجامال سمانوۆا, عالىمنىڭ جيەنى ساۋلە ىبىراەۆا ونلاين قاتىسىپ, اسەرلى ەستەلىكتەرىمەن ءبولىستى. اكادەميك تۋرالى ارنايى كورمە ۇيىمداستىرىلىپ, وعان ۇلاعاتتى ۇستازعا قاتىستى قۇجاتتار مەن فوتوسۋرەتتەر قويىلدى.
ءاليا ابىشەۆا,
ۇلان اۋداندىق ءبىلىم بولىمىنىڭ ادىسكەرى
شىعىس قازاقستان وبلىسى
