ەدينبۋرگ ۋنيۆەرسيتەتىنىڭ عالىمدارى كوگەرگەن ناننان ونەركاسىپكە وتىن جاساۋدىڭ جولىن تاپتى. اتالعان جوعارى وقۋ ورنىنىڭ «www.ed.ac.uk» سايتىندا زەرتتەۋشىلەردىڭ گيدروگەنيزاتسيا ۇدەرىسىندە قازبا وتىنىنان الىنعان سۋتەكتى اۋىستىرۋ ءۇشىن نان قالدىقتارىن پايدالاناتىن ميكروبيولوگيالىق فورمۋلانى ازىرلەگەنى جازىلعان. مۇندا «E.coli» باكتەريالارى تاماق قالدىقتارىنان قانتتى جەپ, سۋتەگىنى شىعارادى. بولمە تەمپەراتۋراسىندا كاتاليزاتوردىڭ كومەگىمەن گيدرلەۋ باستالادى, بۇل – ازىق-ت ۇلىك, فارماتسەۆتيكا, پلاستماسسا, باسقا دا كۇندەلىكتى تاۋارلاردى وندىرۋدە كەڭىنەن قولدانىلاتىن حيميالىق رەاكتسيا. تەحنولوگيا قوقىستاردى پوليگونداردان ەكولوگيالىق تازا شيكىزاتقا اينالدىرادى ءارى سۋتەگىنەن ارىلتادى. قازىر عالىمدار ءادىستى تولىعىمەن جاسىل تەحنولوگياعا اينالدىرۋ ماقساتىندا مەتالل كاتاليزاتورىن اۋىستىرۋعا ارەكەتتەنىپ جاتىر.
ەدينبۋرگ ۋنيۆەرسيتەتىنىڭ پروفەسسورى ستيۆەن ۋوللەس جاڭالىق تۋرالى: «گيدروگەنيزاتسيا – قازىرگى ءوندىرىستىڭ ۇلكەن بولىگىنىڭ نەگىزى, بىراق بۇل ءالى دە تولىعىمەن دەرلىك قازبا وتىنىنان الىنعان سۋتەگىگە تاۋەلدى. ءبىز ءتىرى جاسۋشالار قالدىقتاردى شيكىزات رەتىندە پايدالانۋ ارقىلى سۋتەگىنى تىكەلەي وندىرە الاتىنىن, ونى كومىرتەگى تەرىس بولاتىنداي ەتىپ جاساي الاتىنىن كورسەتتىك», دەدى.
عىلىمدا ەڭ ماڭىزدىسى – ىرگەلى زەرتتەۋ ارقىلى جاڭالىقتىڭ تەورياسىن, تىڭ تەحنولوگياسىن تابۋ. ال ودان دا قاجەتتىسى – دايىن تەحنولوگيانى وندىرىسكە ءساتتى ەنگىزىپ, ەل يگىلىگىنە پايدالانۋ. ءبىز وسىنىڭ ەكىنشىسىن جاساي الساق تا جامان بولماس ەدى-اۋ...
