كەيىپكەرىمىز وزبەكستاننىڭ ناۋاي وبلىسىندا تۋىپ-وسكەن. بۇحاراداعى اۋىل شارۋاشىلىعى تەحنيكۋمىن بىتىرگەن سوڭ, 19 جىل بويى ناۋاي كەن زاۋىتىندا ايگىلى «بەلاز» كولىكتەرىنىڭ ەلەكتر جۇيەسىن جوندەۋمەن اينالىسقان.
– ەلەكتر سلەسارى ماماندىعى – تەحنيكا مەن تەحنولوگيانىڭ توعىسقان جەرى. ءبىزدىڭ مىندەتىمىز تەك تەمىر بۇراۋ نەمەسە سىم جالعاۋ ەمەس, كەن بايىتۋ كومبيناتىنىڭ جۇزدەگەن توننا تاۋ جىنىستارىن وڭدەيتىن, كەشەندى ەلەكتر جۇيەلەرى مەن اۋىر تەحنيكالاردىڭ جۇمىسىن كىدىرتپەي, دەر كەزىندە الدىن الىپ نەمەسە جوندەپ وتىرۋ, – دەيدى ەرتۋعان.
2012 جىلى تاريحي وتانىنا ورالعان بىلىكتى ەرتۋعان بىردەن سوكولوۆ-سارىباي كەن بايىتۋ وندىرىستىك بىرلەستىگىنە جۇمىسقا ورنالاسادى. بۇگىندە «ERG Service» سەرىكتەستىگىندە ەنەرگەتيكالىق قۇرىلعىلار مەن «اقىلدى» تەحنولوگيا جابدىقتارىن قالىپقا كەلتىرىپ ءجۇر. امبەباپ مامان كەن وندىرىسىندە پايدالانىلاتىن قۋاتتى قۇرىلعىلاردىڭ قوزعالتقىشتارىن, الىپ تەحنيكالار مەن وزگە دە كەنىش جابدىقتارىنىڭ ەلەكترلىك, مەحانيكالىق اقاۋىن جويىپ, قايتادان ىسكە قوسىپ بەرىپ وتىرادى.
– اۋىر تەحنيكامەن جۇمىس ىستەگەن سوڭ قاۋىپسىزدىككە قاتاڭ قارايمىن. قازىرگى كاسىپورىنداردا قۇرىلعىلار ءجيى جاڭارادى. سوندىقتان جاڭا تەحنولوگيالاردى, زاماناۋي دياگنوستيكا قۇرالدارىن دەر كەزىندە مەڭگەرىپ وتىرۋ ماڭىزدى. ءبىز تەحنيكا كەشەنىنىڭ ۇزدىكسىز جۇمىس ىستەۋىن قامتاماسىز ەتەمىز, – دەيدى ول.
بۇگىندە اعا بۋىن قاتارىنا ىلىككەن ەرتۋعان ءىزباسار تاربيەلەۋدەن دە جالىققان ەمەس. كەنىش جولدارىندا جۇرەتىن اۋىر تەحنيكانىڭ ەلەكتر جۇيەسىن دياگنوستيكادان وتكىزۋ, جوندەۋ ءتارىزدى ماڭىزدى مىندەتتى اتقارۋ جان-جاقتى ءبىلىمدى, تياناقتىلىقتى, ۇلكەن جاۋاپكەرشىلىكتى قاجەت ەتەدى. سوندىقتان سەرىكتەستىككە ەندى كەلىپ جاتقان جاس مامان جۇمىسقا ابدەن توسەلىپ العانشا ەرتۋعاننىڭ قاراۋىندا بولادى.
– قازىر وندىرىسكە جاستار كوپ كەلىپ جاتىر. ەلەكتر جۇيەسىندە قاتەلىككە جول جوق, كىشكەنتاي اقاۋدىڭ ءوزى ۇلكەن اپاتقا اكەلۋى مۇمكىن. سوندىقتان كەيىنگى بۋىنعا بىلمەگەنىن ۇيرەتىپ, باعىت-باعدار بەرەمىن. جاستار بىلىممەن قوسا, جىلدار بويى جيناعان تاجىريبەدەن كەيىن كەلەتىن بىلىك دەگەن نارسە بار ەكەنىن ءاردايىم جادىندا ۇستاۋى كەرەك. تەحنيكانىڭ ءبارى بىردەي ەمەس. ارقايسىسىنىڭ ءوز سىرى, ءوز قۇپياسى بار. شاكىرتتەرىم قازىر ءار جەردە, تاۋ-كەن سالاسىندا ەڭبەك ەتىپ ءجۇر. مىسالى, باقداۋلەت سوپىبەكوۆ دەگەن شاكىرتىمە ەلەكتر سىزبالارىن, قۇرىلعىلاردى جوندەۋ ادىستەرىن ۇيرەتتىم. سونىمەن قاتار جۇكتەلگەن مىندەتكە اسا جاۋاپكەرشىلىكپەن قاراۋدى, جۇمىسقا كىرىسپەس بۇرىن قاۋىپسىزدىككە ءمان بەرۋدى كۇن سايىن قۇلاعىنا قۇيىپ وتىردىم. شاكىرتىم ءۇمىتىمدى اقتادى, قازىر وسى ءوزىم جۇمىس ىستەپ جاتقان ۋچاسكەنىڭ باس ەنەرگەتيگى بولىپ قىزمەت ەتەدى, – دەيدى ەلەكترشى.
ءوز ءىسىنىڭ ناعىز شەبەرى ە.قۇداباەۆ بۇكىل ۇجىمنىڭ الدىندا ابىرويلى. ءتۇتىنى ءتۇزۋ ۇشقان ءبىر شاڭىراقتىڭ ارقا سۇيەرى بولىپ وتىرعان ازامات ءوز وتباسىنا, تۋىس-تۋعان, اينالاسىنا دا قادىرلى.
قوستاناي وبلىسى
