ولگا پەرەپەچينانىڭ سوزىنشە, جاڭا كونستيتۋتسيا جوباسى – ماڭىزدى ءارى جاۋاپتى جۇمىستىڭ جەمىسى جانە قوعامنىڭ زاماناۋي قاجەتتىلىكتەرىن ەسكەرە وتىرىپ, مەملەكەتتىك قۇرىلىمدى جاڭارتۋعا باعىتتالعان.
«جاڭا كونستيتۋتسيا بيلىكتىڭ تۇراقتى ءارى تۇسىنىكتى ۇلگىسىن قالىپتاستىرىپ, وكىلەتتى ينستيتۋتتاردىڭ ءرولىن نىعايتادى جانە مەملەكەت پەن ازاماتتار اراسىنداعى ءوزارا قاتىناستىڭ ناقتى ەرەجەلەرىن بەلگىلەيدى. بارلىق وزگەرىستەردىڭ باستى ماقساتى – ادام, ونىڭ قۇقىقتارى, قادىر-قاسيەتى مەن بولاشاققا دەگەن سەنىمىن قورعاۋ», دەدى سەنات توراعاسىنىڭ ورىنباسارى.
سونىمەن قاتار ول پارلامەنت ءرولىن قۇرىلتاي ينستيتۋتى ارقىلى قايتا قاراۋ نەگىزگى شەشىمدەردىڭ ءبىرى ەكەنىن اتاپ ءوتتى.
ماسەلەن, قۇرىلتاي ەكى پالاتانىڭ ءىزباسارى جانە جوعارى وكىلدى ورگاننىڭ جاڭا اتاۋى. بۇل ونىڭ مەملەكەتتىك بيلىك جۇيەسىندەگى ەرەكشە ماڭىزىن, تاريحي داستۇرمەن بايلانىسىن جانە حالىق الدىنداعى جاۋاپكەرشىلىگىن كورسەتەدى.
«ماسەلە ينستيتۋتتىڭ سيمۆولدىق جانە ساياسي مارتەبەسىن كۇشەيتە وتىرىپ, ونىڭ پارلامەنتتىك تابيعاتىن ساقتاۋ تۋرالى بولىپ وتىر», دەدى ولگا پەرەپەچينا.
كونستيتۋتسيا جوباسىندا قۇرىلتايدىڭ ىشكى ۇيىمداستىرىلۋىنا, ونىڭ ىشىندە كوميتەتتەرى مەن كوميسسيالارىنىڭ قىزمەتىنە دە ەرەكشە نازار اۋدارىلدى. سەنات توراعاسى ورىنباسارىنىڭ پىكىرىنشە, ولاردىڭ جۇمىس ىستەۋ نەگىزدەرىن كونستيتۋتسيالىق دەڭگەيگە شىعارۋ پارلامەنتتىك جۇيەنى نىعايتۋعا ماڭىزدى قادام بولادى.
«كوميتەتتەر مەن كوميسسيالار زاڭداردى دايىنداۋ مەن پىسىقتاۋدا, ساراپتامالىق قورىتىندىلار مەن پارلامەنتتىك باقىلاۋدى قالىپتاستىرۋدا ماڭىزدى ءرول اتقارادى. ولاردىڭ مارتەبەسى, وكىلەتتىكتەرى مەن جۇمىس قاعيداتتارىن ناقتى كونستيتۋتسيالىق دەڭگەيدە رەتتەۋ زاڭنامالىق پروتسەستىڭ ساپاسىن ارتتىرىپ, ونى بارىنشا اشىق جانە بولجامدى ەتەدى», دەدى ولگا پەرەپەچينا.
ءادىل ەڭبەك, قاۋىپسىز جۇمىس, لايىقتى جالاقى: ماكسيم روجين جاڭا كونستيتۋتسيانىڭ ماڭىزدى تۇسىن اتادى
ول تۇراقتى كوميتەتتەردىڭ سالالىق قاعيدات بويىنشا قۇرىلاتىنىن جانە ءوز سالاسىنا سايكەس مامانداندىرىلعان تالقىلاۋلاردى جيناقتايتىنىن ەسكە سالدى. وسى مەحانيزم شەڭبەرىندە قابىلدانعان بارلىق زاڭ جوبالارى جان-جاقتى تالقىلانادى. كوميسسيالار بەلگىلى ءبىر ماسەلەلەر بويىنشا شوعىرلاندىرىلعان شەشىم قابىلداۋعا مۇمكىندىك بەرەتىن قۇرال قىزمەتىن اتقارادى.
«جاڭا كونستيتۋتسيا جوباسى وكىلەتتى بيلىكتى كۇشەيتۋگە, ازاماتتاردىڭ سەنىمىن ارتتىرۋعا جانە جەتىلدىرىلگەن پارلامەنتتىك مادەنيەتتى قالىپتاستىرۋعا باعىتتالعان. ءبىزدىڭ ازاماتتارىمىزدىڭ جوباعا دەگەن بەلسەندى قىزىعۋشىلىعىن ەسكەرە وتىرىپ, كونستيتۋتسيانى قابىلداۋ ماسەلەسىن بۇكىلحالىقتىق رەفەرەندۋمعا شىعارۋ ۇسىنىسىنا قولداۋ بىلدىرگىم كەلەدى», دەدى ولگا پەرەپەچينا.
سەنات توراعاسى ورىنباسارىنىڭ ايتۋىنشا, بۇل ءراسىم حالىقتىق ەگەمەندىك قاعيداتىنا سايكەس كەلەدى جانە قابىلداناتىن شەشىمنىڭ ەرەكشە ماڭىزدىلىعىن كورسەتەدى.
«اتالمىش جوبانى قولداي وتىرىپ, ءبىز ونى جۇزەگە اسىرۋعا جانە ەلىمىزدىڭ پارلامەنتتىك جۇيەسىن ودان ءارى دامىتۋعا جاۋاپكەرشىلىك الۋعا دايىن ەكەندىگىمىزدى دالەلدەيمىز», دەپ تۇيىندەدى ول.
ايتا كەتەيىك, بۇگىن, 7 اقپاندا قازاقستاندا كونستيتۋتسيالىق رەفورما جونىندەگى كوميسسيانىڭ كەزەكتى وتىرىسىء وتىپ جاتىر. وتىرىس بارىسىندا جاڭا كونستيتۋتسيانىڭ جوباسىنا تەڭگەنى ۇلتتىق ۆاليۋتا رەتىندە بەكىتەتىن نورما ەنگىزىلگەنى ايتىلدى. سونداي-اق ماجىلىس دەپۋتاتى, «ۇلتتىق ۆولونتەرلىك جەلى» زتب جەتەكشىسى ۆەرا كيم قازاقستاندا كونستيتۋتسيالىق دەڭگەيدە ۆولونتەرلىكتى ىنتالاندىرۋدى بەكىتۋ قاجەت دەگەن باستاما كوتەردى.
