پاۆلوداردا جول-كولىك اپاتىنان ەكى جۇرگىزۋشى قازا تاپتى

«پاۆلودار — ومبى» تاسجولىندا ەكى جەڭىل كولىك بەتپە-بەت سوعىسىپ, سالدارىنان ەكەۋىنىڭ دە جۇرگىزۋشىلەرى وپات بولدى.

— وقيعا 27 جەلتوقسان كۇنى «پاۆلودار — ومبى» اۆتوجولىنىڭ بوبروۆكا اۋىلى ماڭىندا بولعان. Toyota Vitz ماركالى اۆتوكولىكتىڭ جۇرگىزۋشىسى كوكتايعاق جاعدايىندا كولىكتى باسقارا الماي, قارسى قوزعالىس جولاعىنا شىعىپ كەتىپ, Hyundai Accent اۆتوكولىگىمەن بەتپە-بەت سوقتىعىسقان. اتالعان جول-كولىك وقيعاسى سالدارىنان ەكى جۇرگىزۋشى وقيعا ورنىندا قازا تاۋىپ, ءبىر جولاۋشى اۋرۋحاناعا جەتكىزىلدى. اتالعان دەرەك بويىنشا قىلمىستىق ءىس قوزعالدى, — دەپ حابارلادى وڭىرلىك پوليتسيا دەپارتامەنتىنەن.

وبلىستىق دەنساۋلىق ساقتاۋ باسقارماسىنىڭ حابارلاۋىنشا, مەرت بولعانداردىڭ ەكەۋى دە ايەل. ونىڭ ءبىرى وقيعا ورنىندا قازا تاپسا, ەكىنشىسى تەرەڭكول اۋدانىنداعى اۋرۋحانادا كوز جۇمعان.

اۆتوكولىكتەر ارنايى ايىپتۇراققا قويىلعان. قايعىلى جايتتىڭ ءمان-جايى مەن سەبەپتەرى تەرگەۋ بارىسىندا انىقتالادى.

ءتارتىپ ساقشىلارى كوپشىلىكتى جول قوزعالىسى قاعيدالارىن قاتاڭ ساقتاۋعا, بەلگىلەنگەن جىلدامدىق رەجيمىن اسىرماۋعا, كولىك قۇرالدارىنىڭ تەحنيكالىق جاي-كۇيىن باقىلاۋعا جانە اۋا رايى جاعدايلارىن ەسكەرۋگە شاقىرادى.