فوتو: اشىق دەرەككوز
ونىڭ ايتۋىنشا, بۇل ماسەلە دەپۋتاتتىق ساۋال ارقىلى بىرنەشە رەت كوتەرىلگەن بولاتىن.
«قولدانىستاعى ەرەجەلەرگە سايكەس, ماماندىعىنا قاراماستان, بارلىعىنا اعىلشىن ءتىلىن بىلەتىنىن راستايتىن سەرتيفيكات مىندەتتى ەدى», دەپ جازدى دەپۋتات.
دەپۋتاتتىڭ سوزىنشە, عىلىمداعى اعىلشىن ءتىلىنىڭ ماڭىزى زور بولعانىمەن, بارلىق سالا ءۇشىن بىردەي تالاپ قويۋ ادىلەتسىزدىككە اكەلگەن.
«قازاق فيلولوگياسى نەمەسە مۋزىكا سالاسىنداعى تالانتتى زەرتتەۋشىلەر تەك شەت ءتىلى سەرتيفيكاتىنىڭ جوقتىعىنان دوكتورانتۋراعا تۇسە الماي جۇرگەن جاعدايلاردى كوردىك», دەدى ول.
اسحات ايماعامبەتوۆ بۇل تالاپتاردىڭ GPT مەن Gemini سياقتى زاماناۋي قۇرالدار پايدا بولعانعا دەيىن ورىندى بولعانىن, الايدا قازىر جاعداي وزگەرگەنىن اتاپ ءوتتى.
عىلىم جانە جوعارى ءبىلىم مينيسترلىگى دەپۋتاتتىڭ باستاماسىن قولدادى. ءمينيستردىڭ №490 بۇيرىعىمەن ۇلگىلىك ەرەجەلەرگە وزگەرىستەر ەنگىزىلدى.
«بۇل ماسەلەگە سارالانعان ءتاسىل قولدانۋدى ۇسىندىم, ناتيجەسىندە ناقتى شەشىم قابىلداندى», دەپ جازدى دەپۋتات.
ەندى تومەندەگى ءبىلىم بەرۋ باعدارلامالارى بويىنشا دوكتورانتۋراعا ءتۇسۋ ءۇشىن شەت ءتىلىن مەڭگەرگەنىن راستايتىن سەرتيفيكات تالاپ ەتىلمەيدى:
D005 – دەنە شىنىقتىرۋ پەداگوگتەرىن دايارلاۋ
D006 – مۋزىكا پەداگوگتەرىن دايارلاۋ
D017 – قازاق ءتىلى مەن ادەبيەتىنىڭ پەداگوگتەرىن دايارلاۋ
D018 – ورىس ءتىلى مەن ادەبيەتىنىڭ پەداگوگتەرىن دايارلاۋ
سونىمەن قاتار, اسحات ايماعامبەتوۆ دوكتورانتۋراعا قابىلداۋ كەزىندە ەسسە ورنىنا Research Proposal ەنگىزۋدى ۇسىنعان. بۇل ۇسىنىس تا قولداۋ تاپقان.
«ۇمىتكەردىڭ شىنايى عىلىمي الەۋەتىن باعالاۋ ءۇشىن زەرتتەۋ جوسپارىن دايىنداۋ الدەقايدا ءتيىمدى», دەپ ەسەپتەيدى دەپۋتات.
مينيسترلىكتىڭ مالىمەتىنشە, Research Proposal ەنگىزۋ جانە تاۋەلسىز ساراپشىلاردى تارتۋ نورماسى 2026–2027 وقۋ جىلىنان باستاپ جۇزەگە اسىرىلادى.
دەگەنمەن دەپۋتات بارلىق ۇسىنىس بىردەي قابىلدانباعانىن دا جاسىرمادى. ونىڭ ايتۋىنشا, Scopus تالاپتارىن وزگەرتۋ, ءتىزىمدى وزگە شىعارماشىلىق باعىتتارعا كەڭەيتۋ جانە ءتىل ەمتيحانىن تاپسىرۋ مەرزىمىن وقۋ سوڭىنا اۋىستىرۋ ماسەلەلەرى ءالى دە قارالۋى ءتيىس.
