جاڭا سالىق رەجيمى بيزنەسكە قانداي مۇمكىندىكتەر سىيلايدى؟

ارنايى سالىق رەجيمى جەكە بيزنەسكە بىرقاتار ماڭىزدى جەڭىلدىك ۇسىنادى. كاسىپكەر جاننۇر مومىش ءۇشىن ەڭ باستىسى – سالىقتىڭ مينيمالدى مولشەرلەمەسىنىڭ تومەندەۋى. 

«كاسىپكەرلەردىڭ كوبى عيماراتتى ساتىپ الۋ قىمبات بولعاننان كەيىن ونى جالعا الۋعا ءماجبۇر. بۇعان قىزمەتكەرلەردىڭ جالاقىسى مەن شيكىزاتقا كەتەتىن شىعىندارى قوسىلادى. وسى شىعىستاردى الىپ تاستاعاندا تابىس وتە از قالادى. جاڭا جىلدان باستاپ سالىق كولەمى ازايادى. بۇل ءبىز ءۇشىن ۇلكەن قولداۋ بولادى دەپ ويلايمىن», دەيدى كاسىپكەر جاننۇر مومىش.

كاسىپكەرلىك جانە ونەركاسىپ باسقارماسىنىڭ ءبولىم باسشىسى ماۋە سەيداليەۆانىڭ ايتۋىنشا, جەرگىلىكتى وكىلەتتى ورگاندار سالىق مولشەرلەمەسىن قىزمەت ءتۇرى مەن نىساننىڭ ورنالاسۋىنا قاراي 50%-عا دەيىن كوتەرۋگە نەمەسە تومەندەتۋگە قۇقىلى. ءبىزدىڭ وڭىردە مولشەرلەمە 4%-دان 2%-عا تومەندەتىلدى.

ءوزىن-ءوزى جۇمىسپەن قامتىعان ازاماتتار ءۇشىن جەكە سالىق رەجيمى كوزدەلگەن. رۇقسات ەتىلگەن قىزمەت تۇرلەرىنىڭ ءتىزىمى 40 باعىتتى قامتيدى. باستى شارت – جالدامالى قىزمەتكەرلەردىڭ بولماۋى جانە ايلىق تابىستىڭ 300 اەك-تەن اسپاۋى. بۇل جاعدايدا بىرىڭعاي مولشەرلەمە 4% جانە ول تەك الەۋمەتتىك تولەمدەردى عانا قامتيدى.

«مۇنداي كاسىپ ءتۇرى جەكە تابىس سالىعىنان بوساتىلادى. ءوزىن-ءوزى قامتىعاندارعا جشس نەمەسە جەكە كاسىپكەر رەتىندە تىركەلۋ قاجەت ەمەس. جالعىز تالاپ – تابىستىڭ 4%-ى كولەمىندە الەۋمەتتىك تولەم ەنگىزۋ. ونىڭ 2%-ى – مىندەتتى زەينەتاقى جارنالارى, 1%-ى – الەۋمەتتىك اۋدارىمدار, 1%-ى – مەديتسينالىق ساقتاندىرۋ. بارلىق پروتسەستەر ءموبيلدى قوسىمشا نەمەسە ينتەرنەت-پلاتفورمالار ارقىلى جۇرگىزىلەدى. ولار چەكتەردى اۆتوماتتى تۇردە قالىپتاستىرىپ, كىرىستەردى ەسەپتەپ, قاجەتتى ەسەپتەۋلەردى ورىندايدى», دەيدى مەملەكەتتىك كىرىستەر دەپارتامەنتى باسقارما باسشىسى گۇلسارا قارىمساقوۆا.

وڭايلاتىلعان دەكلاراتسيا جانە بولشەك ساۋدا سالىعى ءبىر رەجيمگە اينالدى. نەگىزگى تالاپتار ساقتالادى, بىراق ەندى ونى جىلدىق كىرىسى 600 مىڭ اەك-تەن اسپايتىن, ياعني شامامەن 2,5 ملرد تەڭگە بولاتىن كاسىپكەرلەر قولدانا الادى.

«ارنايى سالىق رەجيمىنە كوشۋ 2026 جىلدىڭ 1 قاڭتارىنا دەيىن, 1 قاڭتار مەن 1 ناۋرىز ارالىعىندا جۇرگىزىلەدى. قازىرگى تاڭدا ءموبيلدى قوسىمشا ارقىلى جۇمىس ىستەيتىن جەكە كاسىپكەرلەر وزدەرىن جەكە كاسىپكەر رەتىندە تىركەۋدەن شىعارىپ تاستاۋى كەرەك. تىركەۋدەن شىققاننان كەيىن مۇنداي ازاماتتار قوسىمشادا العاشقى چەك قالىپتاسقان كۇننەن باستاپ ءوزىن-ءوزى جۇمىسپەن قامتىعان تۇلعا رەتىندە تانىلادى», دەيدى مەملەكەتتىك كىرىستەر دەپارتامەنتى باسقارما باسشىسى گۇلنار يساەۆا.