فوتو: REUTERS/Eloisa Lopez
«كالماەگي» تايفۋنى بيىلعى جىلى ايماقتا تىركەلگەن ەڭ جويقىن داۋىلداردىڭ ءبىرى بولدى.
اپاتتان زارداپ شەككەن ايماقتاردى زەرتتەۋ كەزىندە اسكەري تىكۇشاق اپاتقا ۇشىراپ, التى ادام قازا تاپتى. قالعان ادامدار سۋ تاسقىنى, قۇلاعان اعاشتار مەن عيمارات قيراندىلارىنىڭ استىندا قالعان. 430 مىڭنان استام ادام ۇيلەرىن تاستاپ كەتۋگە ءماجبۇر بولعان.
ستيحيا ەلدىڭ ءۇش ءىرى ارال توبى – لۋسون, ۆيساياس جانە مينداناو ايماقتارىنداعى 24 پروۆينتسيانى قامتىدى. كوپتەگەن وڭىردە جارىق ءوشىپ, ونداعان اۋە رەيسى توقتاتىلعان.
5 قاراشادا سوققان تايفۋن قاتتى جەلمەن, نوسەر جاڭبىرمەن جانە بىرنەشە مەترلىك تولقىندارمەن بىرگە كەلگەن. ءفيليپپيننىڭ مەتەورولوگيالىق قىزمەتىنىڭ (Pagasa) حابارلاۋىنشا, داۋىلدىڭ كۇشى ازايعانىمەن, جەلدىڭ ەكپىنى ءالى دە ساعاتىنا 180 كم-گە دەيىن جەتىپ وتىر.
كوپتەگەن ەلدى مەكەندەردە كوشەلەر سۋ استىندا قالعان, كولىكتەردى سۋ اعىزىپ اكەتكەن نەمەسە اۋدارىپ تاستاعان. تۇرعىندار امان قالۋ ءۇشىن ۇيلەردىڭ شاتىرلارىنا كوتەرىلگەن.
مەتەورولوگتاردىڭ دەرەگىنشە, «كالماەگي» (فيليپپيندە ونى «تينو» دەپ اتايدى) جەتى رەت قۇرلىققا سوققان, سوڭعى رەت – تاڭعى ۋاقىتتا پالاۆان پروۆينتسياسىنداعى ەل-نيدو قالاسىندا. بولجام بويىنشا, تايفۋن سارسەنبى نەمەسە بەيسەنبى كۇنى ەل اۋماعىنان شىعىپ, ۆەتنام باعىتىنا قاراي بەت الادى. تايلاندتىڭ سولتۇستىك ايماقتارىندا دەمالىس كۇندەرى قاتتى جاڭبىر كۇتىلەدى.
مەتەورولوگتار دەرەگىنشە, فيليپپينگە جاڭا تروپيكالىق تسيكلون جاقىنداپ كەلەدى. ول جۇما نەمەسە سەنبى كۇنى قۇرلىققا جەتىپ, دەمالىس كۇندەرى سۋپەرتايفۋنعا – جەلدىڭ جىلدامدىعى ساعاتىنا 240 كم-دەن اساتىن اسا قۋاتتى داۋىلعا اينالۋى مۇمكىن.
فيليپپين جىل سايىن شامامەن 20 تايفۋننىڭ اسەرىنە ۇشىرايدى. ەڭ جويقىندارىنىڭ ءبىرى – 2013 جىلعى قاراشادا 6300-دەن استام ادامنىڭ ءومىرىن قيعان «حايان» تايفۋنى بولعان.
