بۇركىت تويىنا كەلگەندەر تەڭگە ءىلۋ, جامبى اتۋ سىندى ۇلتتىق سپورت تۇرىنەن دە سايىسقا ءتۇستى. قىرىققا جۋىق كيىز ءۇي تىگىلىپ, قازان كوتەرىلدى. اق داستارحان جايىلدى.
قۇسبەگىلەر جارىس شارتى بويىنشا باپتاعان قىراندارىن قولعا شاقىردى, شىرعاعا سالدى. ودان ىرىكتەلگەندەرى قويانعا ءتۇستى.
قولونەر شەبەرلەرىنىڭ كورمەسى دە ءوتتى.
بوزانبايدىڭ جەلكە تۇسىنداعى بۇركىت توبەگە جينالعان جۇرت مارە-سارە, ارقا-جارقا.
وبلىس باسشىسى نۇرىمبەت ساقتاعانوۆپەن بىرگە تۋريزم جانە سپورت ءمينيسترى ەربول مىرزابوسىنوۆ تا كەلدى. «قۇسبەگىلىك» فەدەراتسياسىنىڭ ۆيتسە-پرەزيدەنتتەرى باعدات مۇپتەكەقىزى مەن جانجىگىت ومارحان دا وسى ورتادان تابىلدى.
تاقىمدى جىگىتتەر اساۋعا قۇرىق سالىپ تا باق سىناسقان.
جينالعان جۇرتشىلىققا قازاق ەستراداسىنىڭ تانىمال جۇلدىزدارى كەنجەبەك ءجانابىلوۆ, دوسىمجان تاناتاروۆ سىندى انشىلەر مەن «الاتاۋ سەرىلەرى» توبى اننەن شاشۋ شاتى.
فەستيۆال قورىتىندىسى بويىنشا يتەلگى سايىسىنان اقمولادان ات ارىتىپ كەلگەن ەرلان كەنجەتاەۆ جەڭىسكە جەتسە, قارشىعا جانە بۇركىت سايىستارىندا الماتىدان كەلگەن ءومىرحان باەتباي ءبىرىنشى ورىندى قانجىعاعا باستى. جۇلدەگەرلەردىڭ بارلىعى اقشالاي سىيلىققا يە بولدى.
شىعىس قازاقستان وبلىسى
