فوتو: gov.kz
جىل باسىنان بەرى استانا مەن الماتى قالالارىندا وسى قىزمەت 266,8 مىڭ رەت پايدالانىلعان.
بىلتىر مۇگەدەكتىگى بار ادامدار ينۆاتاكسي قىزمەتىن 207,2 مىڭ رەت شاقىرعان. مينيسترلىك اكىمدىكتەرمەن بىرلەسىپ وسى قىزمەتتىڭ تەتىگىنە وزگەرتۋ ەنگىزۋ تۋرالى شەشىم قابىلداعان. مىسالى, ازاماتتارعا قىزمەت الۋدان ءبىر كۇن بۇرىن تەلەفون ارقىلى جازىلۋ قاجەت. بۇل ينۆاتاكسيدى كۇتۋ كەزەگىنىڭ جانە كولىك جەتىسپەۋشىلىگىنىڭ الدىن الادى.
وسى جانە وزگە شارتتاردى جەڭىلدەتۋ ءۇشىن وسى قىزمەتتى كورسەتۋگە سۇرانىس بىلدىرگەن تاكسي اگرەگاتورلارىن تارتۋ بويىنشا پيلوتتىق جوبا باستالعان. جوبادا ساپار اقىسىنا پايىز قوسىلمايدى. بۇعان دەيىن مۇنداي پايىز اگرەگاتور پلاتفورمالارىنىڭ پايداسىنا اۋدارىلىپ كەلگەن. پيلوتتىق جوبا شەڭبەرىندە ازاماتتار ياندەكس Go ءموبيلدى قوسىمشاسى ارقىلى ينۆاتاكسي قىزمەتىن قولدانا الادى. بۇل قىزمەتتى الۋشى ءۇشىن كولىكتى تەزىرەك تاڭداۋعا, ونلاين رەجيمىندە تاپسىرىس مارتەبەسىن قاداعالاۋعا جانە جاسالعان ساپارلارعا مونيتورينگ جۇزەگە اسىرۋعا مۇمكىندىك بەرەدى.
پيلوتتىق جوبا ءساتتى جۇزەگە اسسا باستامانى ەل بويىنشا ەنگىزۋ جوسپارلانعان.
