فوتو: مادەنيەت جانە اقپارات مينيسترلىگى
مادەنيەت جانە اقپارات مينيسترلىگىنىڭ مالىمەتىنشە, كورمەگە شوقان ءۋاليحانوۆتىڭ ءومىرى مەن شىعارماشىلىعىنا, عىلىمي ەڭبەكتەرىنە قاتىستى قۇندى جادىگەرلەر قويىلعان. ولاردىڭ قاتارىندا عالىمنىڭ قولجازبالارى, عىلىمي ەڭبەكتەرى, رەسەي گەوگرافيالىق قوعامىنىڭ مۇشەلىگىنە قابىلدانعانى تۋرالى ديپلومنىڭ كوشىرمەسى, سونداي-اق جەكە زاتتارى – بوركى, مىلتىقتىڭ ءدۇمى, قاشعار ەكسپەديتسياسىنان اكەلىنگەن قىتاي ۆازاسى, جورىق تورسىعى, مىس كەسە, زەرلى بەلدىك سىندى تاريحي بۇيىمدار بار.
كورمەگە ۇسىنىلعان جادىگەرلەر ورتالىق مەملەكەتتىك مۋزەي مەن «التىنەمەل» مەموريالدىق مۋزەي-قورىنىڭ قورلارىنان الىنعان.
كورمەنىڭ ەرەكشەلىگى – شوقان ءۋاليحانوۆتىڭ تۋىستارىنا تيەسىلى جەكە بۇيىمداردىڭ العاش رەت كوپشىلىككە ۇسىنىلۋى. سولاردىڭ ىشىندە قارىنداسى ءتاجىباي كيگەن سيرەك اققۋ قاۋىرسىنىن تىگىلگەن شاپان, بادۇگۇل اپاسىنىڭ بەشپەنتى, سونداي-اق بەلگىلى كەڭەستىك سۋرەتشى ن. يا. ترەتياكوۆ سالعان شوقان پورترەتى ەرەكشە قىزىعۋشىلىق تۋدىردى.
ءىس-شارا اياسىندا «شوقاننىڭ عىلىمي مۇراسى» اتتى دوڭگەلەك ۇستەل ءوتىپ, وعان تاريحشى, فيلوسوف, ەتنوگراف, گەوگراف جانە مۋزەيتانۋشى عالىمدار قاتىستى. ولار عالىمنىڭ عىلىمي مۇراسىنىڭ ماڭىزىن سارالاپ, ونىڭ قازاق رۋحانياتى مەن عىلىمىنا قوسقان ولشەۋسىز ۇلەسى تۋرالى باياندامالار جاسادى.
