كورمە كەڭىستىگىنە اتاقتى مايتالمانداردىڭ, قىرعىزستان سۋرەتشىلەرى جاڭا بۋىن تالىمگەرلەرىنىڭ, ماسكەۋ مەن سانكت-پەتەربۋرگ ءىرى كوركەمسۋرەت ينستيتۋتتارىنىڭ تۇلەكتەرى: قادىرقۇل ورازماتوۆ, سۇيىتبەك توروبەكوۆ جانە ساپار وسموناليەۆتىڭ تۋىندىلارى توپتاستىرىلعان. قاتىسۋشىلار قاتارىندا بەلگىلى قىرعىز سۋرەتشىلەرى جولدوشبەك قازاقباەۆ, شەكەربەك اناربەكوۆ, چينگيس ورمونبەكوۆ, ەركين اقنازاروۆ, جانىبەك سۇيىنبەكوۆ, المازبەك شارشەكەەۆ, ءابدىسادىر ترۋسبەكوۆ بار. كوركەم كارتينالار اراسىنداعى ەكسپوزيتسيا مونۋمەنتاليست بووبەك ارىكوۆتىڭ قولادان جاسالعان بىرنەشە تۋىندىسىنا دا ءوز قاتارىنان ورىن بەردى. توپتىڭ ءاربىر قاتىسۋشىسى قىرعىزستان مەن شەتەلدە جەكە جانە حالىقارالىق كورمەلەردە ۇلكەن تاجىريبەگە يە.
قىرعىز حالقىنىڭ ءبىرتۋار پەرزەنتتەرىنىڭ وي-پىكىرلەرى, ادام تاعدىرى, ۇرپاقتار ساباقتاستىعى, تۋعان جەرگە دەگەن سۇيىسپەنشىلىك پەن تابيعاتتىڭ اداممەن ۇندەستىگى تۋرالى تولعاۋلارى توپ مۇشەلەرىنىڭ شىعارمالارىندا ءوزىنىڭ كوركەمدىك ورنەكتەرىن تاپتى. شىڭعىس ايتماتوۆ: «تۋعان جەر – اتا-بابامىزدان قالعان جەرىمىز عانا ەمەس, ۇرپاقتارىمىزعا قالدىراتىن جەرىمىز», دەپ جازدى. تۇركى الەمىنىڭ ۇلى تۇلعاسىنىڭ بۇل ءسوزى تۋعان ولكەنىڭ رۋحىمەن تامىرلاس جاتقان كەسكىندەمەلەر مەن مۇسىندەرگە دە ماعىنا بەرىپ, ۇلتتىق ايبىنىن ارتتىرا تۇسەدى.
ۇسىنىلعان اۆتورلاردىڭ شىعارماشىلىعى – بۇگىنگى قىرعىز ونەرىنىڭ كورىنىسى, وندا ءداستۇرلى ۇلتتىق سارىن كوركەم ءبىلىم بەرۋدىڭ اكادەميالىق بازاسىنا سۇيەنەتىن جاڭا ىزدەنىستەرمەن ۇشتاسادى. قىرعىز اۆتورلارىنىڭ قولتاڭباسى سان الۋان, دارا, تاريحي ميفولوگيا شىنايىلىعىمەن كۇندەلىكتى ءومىر مەن دەرەكسىزدىك ەكپىنىن جەتكىزىپ, جۇزجىلدىقتار كوشىنىڭ جۇمباعىن العا تارتادى.
الماتى
