كورمەگە تاشكەنت قالاسىنداعى مەملەكەتتىك ونەر مۋزەيى مەن ورال تاڭسىقباەۆتىڭ مۋزەي-ۇيىنەن جانە نۇكىس قالاسىنداعى قاراقالپاقستان رەسپۋبليكاسى مەملەكەتتىك ونەر مۋزەيىنەن كەلگەن, سونىمەن قاتار ءابىلحان قاستەەۆ اتىنداعى مەملەكەتتىك ونەر مۋزەيىنىڭ قورىنان الىنعان سۋرەتشىنىڭ ەرەكشە ءستيلىن, شىعارماشىلىق مۇراسىن جانە ۇلتتىق كەسكىندەمەنىڭ دامۋىنا قوسقان ۇلەسىن كورسەتەتىن 78 كەسكىندەمە جانە گرافيكا تۋىندىلارى قويىلدى.
ەكسپوزيتسيا – ورال تاڭسىقباەۆتىڭ ءومىرى, ونىڭ دراماعا تولى شىعارماشىلىق تاعدىرى مەن شەبەردىڭ قولتاڭباسىنىڭ كۇردەلى ەۆوليۋتسياسى تۋرالى, باستاپقى كەزەڭدەردەگى مودەرنيستىك ەكسپەريمەنتتەردەن باستاپ, تەرەڭ سيمۆوليزم مەن فيلوسوفيالىق ماعىناعا تولى مونۋمەنتالدى پەيزاجدارعا دەيىن كەڭىنەن تانىستىرادى. كورمەدە و.تاڭسىقباەۆتىڭ ورىس اۆانگاردىنىڭ جانە فرانتسۋز مودەرنيستەرىنىڭ ىقپالىن كورسەتەتىن العاشقى تۋىندىلارىنا ەرەكشە نازار اۋدارىلعان. ەكسپوناتتار اراسىندا اتاقتى «كۇرەڭ كۇز» (1931), «اۆتوپورترەت» (1935) كارتينالارى, سونداي-اق ەكىنشى دۇنيەجۇزىلىك سوعىسى كەزەڭىندەگى تۋىندىلار مەن «جىلىمىق» كەزەڭىنىڭ كورنەكتى پەيزاجدارى ۇسىنىلدى.
ءوز سوزىندە ايدا بالاەۆا ورال تانسىقباەۆتىڭ ونەرى ەكى ەلدىڭ حالقىن جاقىنداستىرىپ, سانعاسىرلىق دوستىق پەن ءوزارا تۇسىنىستىكتى نىعايتۋعا ۇلەس قوسقانىن اتاپ ءوتتى.
«ول تۋعان جەرى وزبەكستاننىڭ كوركەم تابيعاتى مەن تاۋ-تاسىن شىنايى ءارى اسقان شەبەرلىكپەن بەينەلەپ, ونەرسۇيەر قاۋىمنىڭ جوعارى باعاسىن الدى. ايتا كەتەرلىگى, ورال تاڭسىقباەۆ ءابىلحان قاستەەۆپەن ءبىر جىلدا دۇنيەگە كەلگەن. ەكى ازامات تا ءوز ەلدەرىندە ۇلتتىق كوركەمسۋرەت مەكتەبىنىڭ قالىپتاسۋىنا ىقپال ەتىپ, كەيىنگى تولقىن جاستارعا اسەر ەتتى. ولاردىڭ شىعارماشىلىعى – تۋعان جەرىنە, حالقىنا, تابيعاتىنا دەگەن شىنايى سۇيىسپەنشىلىكتىڭ كورىنىسى», دەدى مينيستر.
سونداي-اق ايدا بالاەۆا قازاقستان مەن وزبەكستاننىڭ مادەني سالاداعى بەلسەندى ىنتىماقتاستىعىن اتاپ ءوتتى. ءمينيستردىڭ ايتۋىنشا, كەيىنگى جىلدارى مادەنيەت كۇندەرى, كينو كۇندەرى, تەاتر گاسترولدەرى مەن كوركەمونەر كورمەلەرى جەمىستى ۇيىمداستىرىلىپ كەلەدى.
سايدا ميرزيوەۆا ءوز كەزەگىندە كورمەنىڭ ۇيىمداستىرىلۋىنا ريزاشىلىعىن ءبىلدىرىپ, قازاقستان مەن وزبەكستان اراسىنداعى مادەني ديالوگ پەن ىنتىماقتاستىقتىڭ ماڭىزىن اتاپ ءوتتى. كورمەنى تاماشالاعان كەيىن س.ميرزيوەۆا ءوز تەلەگرام-ارناسىندا: «بۇل بىرەگەي كورمە قىلقالام شەبەرى شىعارماشىلىعىنىڭ باستاپقى كەزەڭىندەگى ەكسپەريمەنتتەر مەن تولىسقان كەزدەگى تۋىندىلارىنىڭ دامۋ ساتىلارىن كورۋگە كەڭ مۇمكىندىك بەرەدى. تاڭسىقباەۆتىڭ شىعارماشىلىعى قازاقستانمەن تىعىز بايلانىستى وركەن جايدى. ول كوپ ەڭبەكتەندى, ءابىلحان قاستەەۆپەن دوس بولدى», دەپ جازدى.
ورال تاڭسىقباەۆتىڭ تۋعانىنا 120 جىل تولۋىنا وراي ۇيىمداستىرىلعان كورمە وسى جىلدىڭ ماۋسىم ايىنا دەيىن جالعاسادى. كورمە بەينەلەۋ ونەرىندەگى كوشباسشى تۇلعانى ۇلىقتاۋعا ارنالعان ۇلت رۋحانياتىنداعى ماڭىزدى مادەني وقيعا عانا ەمەس, جاڭا كەزەڭدەردىڭ زامانداسى بولىپ قالا بەرەتىن جاسامپاز سۋرەتشىنىڭ ۇلى مۇراسىن زەردەلەۋدىڭ جاڭا باستاماسى بولماق.
الماتى
