سوعىس باستالعاندا ەرىكتىلەر قاتارىندا مايدانعا اتتانىپ, ستالينگرادتى جاۋدان ازات ەتۋگە قاتىسادى. جاۋىنگەرلىك ەرلىكتەرى ءۇشىن I,II دارەجەلى وتان سوعىسى وردەندەرىمەن, بىرنەشە مەدالدارمەن ماراپاتتالىپ, ەلىنە امان-ەسەن ورالادى.
ەلگە ورالعان سوڭ قاتارداعى مۇعالىمنەن اۋداندىق پارتيا كوميتەتىنىڭ ءبىرىنشى حاتشىسىنا دەيىنگى جولدان وتكەن م.تورەگەلدين حالىقتىڭ شىنايى قۇرمەتىنە بولەندى. ول زەينەت جاسىنا شىققان سوڭ ازىرگە ورتا ازيادا تەڭدەسى جوق تاۋ-كەن جانە بالقىتۋ ءىسى مۇراجايىن ۇيىمداستىردى. ماكەن تورەگەلدين كوپتەگەن وردەن, مەدەلدارمەن ماراپاتتالدى, جەزدى, ۇلىتاۋ اۋداندارىنىڭ, تۇركىستان قالاسىنىڭ قۇرمەتتى ازاماتى, جەزقازعان ۋنيۆەرسيتەتىنىڭ قۇرمەتتى پروفەسسورى, قازاقستان رەسپۋبليكاسىنىڭ مادەنيەت قايراتكەرى اتاقتارىن يەلەندى.
ۇلىتاۋ وبلىسىنداعى ۇلى جەڭىستىڭ 80 جىلدىعىنا بايلانىستى العاشقى ءىس –شارا ماكەن تورەگەلديندى ەسكە الۋعا ارنالعان وبلىستىق امبەباپ كىتاپحانادا وتكەن «عيبراتتى عۇمىر» دەپ اتالعان كەشتەن باستاۋ الدى.
«تاريحقا تابان تىرەگەن تارلان» بەينەفيلمىمەن اشىلعان كەشكە قاتىسۋشىلاردى ۇلىتاۋ وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى ماعجان تابىلدين قۇتتىقتادى.
ۇلىتاۋ وبلىسى ارداگەرلەر كەڭەسىنىڭ توراعاسى س. قوجامسەيىتوۆ ءوز ەستەلىگىندە ماكەن تورەگەلديننىڭ سوعىستا قازا تاپقان جاۋىنگەر دوسىنىڭ اتا –اناسىن ارادا 30 جىل وتكەندە تاۋىپ, رەسەيدىڭ ءبىر دەرەۆنياسىنا ىزدەپ بارعانىنا توقتالدى. ولار «ەكەۋمىزدىڭ ءبىرىمىز ءولىپ, ءبىرىمىز ءتىرى قالساق, اكە –شەشەمىزگە قالاي ولگەنىمىزدى ايتىپ بەرەمىز» دەپ ۋادەلەسكەن ەكەن.
«سوندا الگى كىسىلەر: «قازاق دەگەن نەتكەن كەرەمەت حالىق ەدىڭدەر. سوعىستا وسىدان وتىز جىل بۇرىن بەرگەن ۋادەم بار ەدى دەپ, ءبىزدى سوناۋ قازاقتىڭ قيىرىنان ىزدەپ كەلىپ وتىرسىڭ. ال, مەنىڭ سول بالامنىڭ قۇرداستارى وسى دەرەۆنيادا تۇرىپ, بىزگە كەلىپ سالەم بەرۋدى دە بىلمەيدى» دەپ ريزاشىلىعىن بىلدىرگەن ەكەن. ءسويتىپ, ماكەڭ ءوزىنىڭ اسقان پاراساتتىلىعىنىڭ ارقاسىندا ۇلتىمىزدىڭ اتىن اسقاقتاتا بىلگەن اعامىز ەدى», دەدى ساعىندىق ۇسەن ۇلى.
ساتباەۆ قالاسىنىڭ قۇرمەتتى ازاماتى وتەش احمەتوۆ جەزدى اۋدانىندا ماكەن اعامەن قىزمەتتەس بولعان.
«1983 جىلى 60 جاسقا تولۋىنا بايلانىستى اعاعا قوس قالامساپ سالىپ قويۋعا ارنالعان شاعىن سۋۆەنير ازىرلەدىك, قۇتتىقتاۋ لەبىزىمىزدى ويدىرىپ جازدىق. جەمە –جەمگە كەلگەندە باسقا سىيلىق بەرىلدى دە, بۇل قالىپ قويدى. بىراق, «اعاعا ارنالعان سىيلىق ەدى عوي» دەپ لاقتىرىپ تاستاۋعا قيماي وسى كەزگە شەيىن ۇيدە ساقتاپ كەلىپ ەدىم. ەندىگى جەردە ماكەڭنىڭ مۋزەيىن تولىقتىرىپ تۇرسىن», دەگەن ول ارادا 42 جىل وتكەندە شاعىن سۋۆەنيردى جەزدى كەنتىندەگى م.تورەگەلدين اتىنداعى تاۋ-كەن جانە بالقىتۋ ءىسى مۇراجايىنىڭ ديرەكتورى زەيپىن قازانباەۆاعا تابىستادى.
قازاقستاننىڭ ەڭبەك سىڭىرگەن ءارتيسى عالىم مۇحامەديننىڭ ورىنداۋىنداعى رامازان ەلەباەۆتىڭ «جاس قازاق» ءانى تىڭداعانداردى تەبىرەنتپەي قويمادى. كەش سوڭى «م.تورەگەلدين.مەنىڭ پارىزىم» اتتى جىلجىمالى كورمەنى تاماشالاۋعا ۇلاستى.
