قازاقستان مەن رەسەي ونەركاسىپتىك ىنتىماقتاستىقتىڭ جاڭا مودەلىن ازىرلەپ جاتىر

بۇگىنگى تاڭدا جالپى ينۆەستيتسيا كولەمى 52,7 ملرد دوللاردى قۇرايتىن 177 جوبادان تۇراتىن پۋل قۇرىلدى, ونىڭ ىشىندە 22,4 ملرد دوللارعا باعالانعان 122 جوبا ىسكە اسىرىلدى, جالپى قۇنى شامامەن 10 ملرد دوللارعا تاعى 24 جوبا ىسكە اسىرىلۋ ساتىسىندا, سونداي اق  20,3 ملرد دوللار سوماسىنا باعالانعان 31 پەرسپەكتيۆالى جوبا پىسىقتالدى.

شىن مانىندە, قازاقستان مەن رەسەي قازىرگى ۋاقىتتا تەحنولوگياعا, لوكاليزاتسياعا جانە جوعارى قوسىلعان قۇن ونىمدەرىن بىرلەسىپ وندىرۋگە نەگىزدەلگەن ونەركاسىپتىك ىنتىماقتاستىقتىڭ جاڭا مودەلىن ازىرلەپ جاتىر. ۆ.ءپۋتيننىڭ قازاقستانعا ساپارى جاڭا بىرلەسكەن كاسىپورىنداردى ىسكە قوسۋعا قوسىمشا سەرپىن بەرەدى جانە ەكى ەلدىڭ ونەركاسىپتىك الەۋەتىن ودان ءارى نىعايتادى دەپ كۇتىلىپ وتىر.

ەڭ ءىرى مىسالداردىڭ ءبىرى – قازاقستان مەن رەسەي اراسىنداعى ۇكىمەتارالىق كەلىسىم شەڭبەرىندە ىسكە اسىرىلىپ جاتقان «ەۆروحيم» حيميالىق كەشەنى. جوبا جىلىنا 600 مىڭ تونناعا دەيىن مينەرالدى تىڭايتقىشتار مەن 800 مىڭ توننا كۇكىرت قىشقىلىن ءوندىرۋدى كوزدەيدى جانە ازىق-ت ۇلىك قاۋىپسىزدىگى مەن ونىمەن بايلانىستى سالالاردى دامىتۋ ءۇشىن ستراتەگيالىق ماڭىزدى بولىپ سانالادى.

قازاقستان مەن رەسەي ونەركاسىپتىك ىنتىماقتاستىقتىڭ جاڭا مودەلىن ازىرلەپ جاتىر

قوستانايداعى «كاماز» جاق-پەن بىرلەسكەن كاسىپورىن KamLitKZ ماشينا جاساۋ سالاسىندا ەرەكشە ورىن الادى. بۇل كوممەرتسيالىق كولىكتەرگە ارنالعان اۆتوموبيل كومپونەنتتەرىنىڭ زاماناۋي, جوعارى تەحنولوگيالىق ءوندىرۋشىسى. اۆتوماتتاندىرۋ جانە تەحنولوگيالىق شەشىمدەر تۇرعىسىنان كاسىپورىندى گەرمانياداعى ەڭ ءىرى, كەلەسى بۋىن قوزعالتقىشتارىنا ارنالعان كومپونەنتتەر شىعاراتىن Daimler زاماناۋي ءوندىرىس الاڭدارىمەن سالىستىرۋعا بولادى.

Tengri Tyres كومپانياسىنىڭ «تاتنەفت» جاق-پەن بىرلەسكەن «Attar» وتاندىق برەندىمەن شينا شىعارۋ جوباسى دا بەلسەندى دامىپ كەلەدى. كومپانيا قازىردىڭ وزىندە جىلىنا 3,5 ملن شينا ءوندىرۋ جوسپارلانعان قۋاتىمەن قازاقستانداعى جالعىز ەكسپورتقا باعىتتالعان شينا وندىرۋشىسىنە اينالدى.

تاۋ-كەن ونەركاسىبىن 2007 جىلى رەسەيدىڭ مىس كومپانياسى ىسكە قوسقان اقتوبە مىس كومپانياسى ۇسىنادى. ونىڭ قازىرگى ءوندىرىس كولەمى جىلىنا 4,8 ملن توننا كەندى قۇرايدى, بۇل 2 332 جۇمىس ورنىن قۇرۋعا جانە سوڭعى 5 جىلدا شامامەن 18 ملرد تەڭگە ينۆەستيتسيا تارتۋعا مۇمكىندىك بەرەدى, بۇل ونەركاسىپتىك ىنتىماقتاستىقتىڭ پراكتيكالىق اسەرى مەن ۇزاق مەرزىمدى سيپاتىن كورسەتەدى.

مۇنىمەن قوسا, قازىرگى ۋاقىتتا ماشينا جاساۋ جانە قۇرىلىس ماتەريالدارىن ءوندىرۋ سالاسىندا بىرقاتار جوبالار ىسكە اسىرىلۋ ساتىسىندا, ولاردى 2026 جانە 2028 جىلدار ارالىعىندا اياقتاۋ جوسپارلانىپ وتىر. ولاردىڭ قاتارىنا اۋىل شارۋاشىلىعى تەحنيكاسىن ءوندىرۋدى جەرگىلىكتەندىرۋ بويىنشا Kazrost Engineering جانە «روستسەلماش» جوبالارى, «سەماز» جشس مەن «گاز» جشق بىرلەسكەن اۆتوموبيل ءوندىرىسى, الماتى وبلىسىندا «تەحنونيكول» كورپوراتسياسىمەن بىرلەسىپ جىلۋ وقشاۋلاعىش ماتەريالدار ءوندىرىسى جانە قاراعاندى وبلىسىندا «زاۆود تەحنو» جشق-مەن بىرلەسىپ ىسكە اسىرىلاتىن زاماناۋي, جوعارى ءتيىمدى جىلۋ وقشاۋلاعىش ماتەريالدارىن وندىرۋگە ارنالعان Karaganda Insulation جوباسى كىرەدى.