جوسپارلى رەيد كەزىندە ۇلتتىق پارك ينسپەكتورلارى اقىلباي ورمانشىلىعىنىڭ ماماندارىمەن بىرگە پاترۋلدەۋ جۇمىستارىن جۇرگىزگەن. سول ساتتە ولار اقىلباي اۋىلى جاعىنان كوكشە تاۋى ماڭىنداعى شيە ساي باعىتىنا قاراي ءجۇزىپ بارا جاتقان ۇرعاشى ەلىكتى بايقايدى.
مامانداردىڭ ايتۋىنشا, جابايى جانۋارلاردىڭ سۋ ايدىندارىن ءجۇزىپ ءوتۋى قالىپتى قۇبىلىس بولعاندىقتان, باستاپقىدا بۇل جاعداي الاڭداۋشىلىق تۋدىرماعان. الايدا ينسپەكتورلار جانۋاردى باقىلاۋدى جالعاستىرعان.
«بۋراباي» ۇلتتىق پاركىنىڭ اۋماعىنان 263 تەكشە مەتر قوقىس شىعارىلدى
ەكى ساعاتتان استام ۋاقىت وتكەن سوڭ ەلىكتىڭ السىرەپ, سۋ بەتىندە ارەڭ قوزعالىپ جۇرگەنى انىقتالعان. سول كەزدە پارك قىزمەتكەرلەرى جانۋاردىڭ وزدىگىنەن جاعاعا جەتە المايتىنىن تۇسىنگەن.
ء«بىز موتورلى قايىقپەن دەرەۋ جەتىپ, ەلىكتى سۋدان شىعارىپ الدىق. ۋاقىتىلى كومەك كورسەتىپ, جاعاعا جەتكىزدىك», دەيدى جانۋارلار دۇنيەسىن قورعاۋ جانە ءوسىمىن مولايتۋ ءبولىمىنىڭ ينجەنەر-يحتيولوگى سەرگەي كۋچەرەنكو.
قۇتقارىلعان جانۋار ءبىراز تىنىعىپ العان سوڭ ورمانعا قاراي جۇگىرىپ كەتكەن.
مامانداردىڭ باعالاۋىنشا, بۇل شامامەن ەكى جاستاعى جاس ۇرعاشى ەلىك بولعان. ونىڭ ۇزاق قاشىقتىققا جۇزۋگە تاجىريبەسىنىڭ ازدىعى مەن فيزيكالىق ءتوزىمىنىڭ جەتىسپەۋى السىرەۋىنە سەبەپ بولۋى مۇمكىن.
ۇلتتىق پارك وكىلدەرى مۇنداي جاعدايلار تابيعاتتى تۇراقتى باقىلاۋ مەن رەيدتىك جۇمىستاردىڭ ماڭىزىن كورسەتەتىنىن ايتادى. ينسپەكتورلار جابايى جانۋارلارعا قاۋىپ تونگەن جاعدايدا جەدەل ارەكەت ەتۋگە ءاردايىم دايىن ەكەنىن اتاپ ءوتتى.
