دەپۋتات ءسوزدىڭ باسىن «مۇناي ءبىزدىڭ باعىمىز ءارى سورىمىز» دەپ باستاپ, ونىڭ قازاقستاندى اسىراپ وتىرعانى نە كەرەك, باتىس ءوڭىرىنىڭ جۇرتشىلىعى وسى مۇنايدىڭ زاردابىن تارتىپ وتىرعانىن العا تارتتى.
«مەنىڭ كوتەرگەلى وتىرعان ماسەلەم – كاسىپكەرلىك كودەكس پەن ەكولوگيالىق كودەكستىڭ اراسىنداعى پروبلەما. 2015 جىلى كاسىپكەرلىك كودەكستى قابىلدادىق, سوعان سايكەس كاسىپكەرلىك سۋبەكتىلەردى تەكسەرۋگە ءبىر اي بۇرىن ەسكەرتۋ دەگەن نورمانى ەنگىزىپ قويدىق. سودان بەرى باتىس وڭىرلەرىندە, اسىرەسە, مۇناي قالدىقتارىن توگۋ سالدارىنان زارداپتاردى جويۋ جانە جاۋاپكەرشىلىككە تارتۋ ماسەلەسى تۋىنداپ كەلەدى. ەڭ سوڭعى جاعداي 2024 جىلى «ماڭعىستاۋمۇنايگاز» كومپانياسىنا كاسپيگە مۇناي قالدىقتارىن توككەنى ءۇشىن 32 ملرد تەڭگەگە ايىپپۇل سالىندى. ءبىرىنشى سوت كۇشىندە قالدىردى, اپەللياتسيالىق سوت زاڭدى دەپ تاپتى. جوعارى سوت ءبىر اي بۇرىن ەسكەرتىلمەگەن دەگەن پروتسەدۋرالىق نەگىزدەرمەن بۇنىڭ ءبارىن زاڭسىز دەپ بۇزىپ تاستادى», دەدى ابزال قۇسپان.
دەپۋتاتتىڭ ايتۋىنشا, مۇنداي جاعداي سوڭعى 10 جىلدا تۇراقتى تۇردە قايتالىنىپ كەلە جاتىر. جوعارى سوت تومەنگى سوتتاردىڭ اكتىلەرىن بۇزا سالادى.
ءماجىلىس دەپۋتاتى ەدىل جاڭبىرشين بۇل ماسەلە تەك مۇناي گاز سالاسىنا قاتىستى ەمەس, بارلىق ءى جانە ءىى كاتەگوريالى نىساندارعا قاتىستى ەكەنىن ايتتى.
«بۇلار ەندى اسا قاۋىپتى نىساندار بولىپ ەسەپتەلەدى. كاسىپكەرلىك كودەكستەن ەكولوگيالىق باقىلاۋ, قاداعالاۋ ماسەلەسىن الىپ, وسى سالالىق ەكوكودەكسكە ەنگىزدىك. بۇل جەردە ءۇش ماسەلە – ديستانتسيالىق باقىلاۋ, باقىلاۋ جانە اۆتوماتتاندىرىلعان مونيتورينگتىك باقىلاۋ بار. ديستانيالىق باقىلاۋ بويىنشا ول جەردە قۇقىقبۇزۋشىلىق بولسا, ايىپپۇل سالىنبايدى. بىراق ول تەكسەرۋگە نەگىز بولادى», دەدى ەدىل جاڭبىرشين.
ونىڭ ايتۋىنشا, تەكسەرۋدىڭ ءوزى ەكىگە بولىنەدى – جوسپارلى جانە جوسپارسىز.
«ماسەلە سول جوسپارسىزدا بولىپ وتىر. قازىر تەكسەرگەندە پروكۋراتۋرادان تىركەلۋ كەرەك, وعان ۋاقىت كەتەدى, بۇل ارالىقتا كومپانيالار وزدەرىنىڭ بۇلدىرگەن زاتتارىن جاسىرۋى مۇمكىن نەمەسە جەل سوعىپ ۋلى گازداردى الىپ كەتەدى. فاكتىنى ول جەردە فيكساتسيا جاساۋ وتە قيىن. سوندىقتان بىزدەر وسى نورمانى ەنگىزدىك. ەكىنشى وقىلىمعا دەيىن بۇل ماسەلەگە نۇكتە قوياتىن شىعارمىز», دەدى دەپۋتات.
