كورمەدە 200-دەن استام كەسكىندەمە, گرافيكا, ءمۇسىن, قولونەر سالاسى بويىنشا قازاقستان سۋرەتشىلەرىنىڭ شىعارماشىلىق تۋىندىلارى ۇسىنىلدى. الماتى, الماتى وبلىسى, استانا, پاۆلودار, كوكشەتاۋ, پەتروپاۆل, اقتوبە, اتىراۋ, ورال, قىزىلوردا, تاراز, تۇركىستان, شىمكەنت وڭىرىنەن 150-گە جۋىق سۋرەتشى قاتىستى.
قازاقستان سۋرەتشىلەرى, ماڭىزى مەن ءمانى جوعالماعان قازاق بەينەلەۋ ونەرى قاي زامان بولسا دا ۇلتتىق قاسيەتتى, ونداعى دۇنيەتانىمدى ساقتاپ كەلەدى. قازاق بەينەلەۋ ونەرىنىڭ وركەن جايىپ, الەمدىك ونەر ارەناسىندا ۇلتتىق سيپاتتى تانىتۋدا سۋرەتشىلەردىڭ سىڭىرگەن ەڭبەگى ەرەن. ۇلتتىق بەينەلەۋ ونەرىنىڭ قالىپتاسۋى مەن دامۋىنا قوسقان ۇلەسىن سارالاپ, وزىندىك جەكە تۇلعالىق قولتاڭباسىمەن ونەر تاريحىندا ءىز قالدىرعان ساڭلاقتاردىڭ مەرەيتويلارىنا وراي ۇيىمداستىرىلعان كورمەنىڭ نەگىزگى ماقساتى تەرەڭ ءارى اۋقىمدى. ەسەپتىك كورمە ء«ححى عاسىردىڭ سۋرەتشىلەرى ۇلتتىق ونەر مەكتەبىنىڭ دامۋىنا قانداي ۇلەس قوسۋدا», «قازىرگى قوعام ومىرىندەگى كوممەرتسيالىق قۇرامداس بولىكتەن ارىلۋ جانە جاڭا مىندەتتەردى بەلگىلەۋ», «وزەكتى پلاستيكالىق يدەيالاردى قالىپتاستىرۋ», «ادام مەن قوعام اراسىنداعى وزىندىك دامۋدىڭ جاڭا تاريحي كەزەڭىنە شىعۋ ماڭىزدىلىعى» سەكىلدى سۋرەت ونەرىندەگى وزەكتى ماسەلەلەردى قامتيدى.
كورمە جەتەكشىسى گۇلنار جۇبانيازوۆانىڭ ايتۋىنشا, كورمەنىڭ تۇجىرىمداماسىنا سايكەس, سۋرەتشىلەر شىعارماشىلىعىنداعى تۋىندىلاردا ۋاقىت پەن كەڭىستىك اعىمىنىڭ اقيقاتى, ۇلتتىق رۋحتىڭ تىنىسى, ەلدىڭ ماقسات-مۇراتى باياندالادى. ەكسپوزيتسيادا كورەرمەن ءتۇرلى جانردا ءار قىرىنان كورىنىس تاپقان, كومپوزيتسيالىق جانە كولوريتتىك شەشىمدە, كرەاتيۆتى وي-تۇجىرىمدا ايقىندالعان ديناميكالىق ۇندەستىك پەن ءوزارا تۇتاس, تەرەڭ ماعىنالى تۋىندىلاردى تاماشالاي الادى.
الماتى
